Israel Leele Jawala Chinɛɛ
4
Mi e Tafun Nyiɛkpɔɔ ni yo na,Na ee ndru e kro kre,
kena e ndru e pan ni pan.
Na ee kpra li,
mbe e sɛɛnlɛ
nyjɛ yi pe afunyi yirɛ
yire waari,
mbe yaa eyɛ wa mbe fun.
2 Na ee fraka, mbe kpra li,
mbe da mbe ni ŋga wala,
ŋga mi, e Tafun Nyiɛkpɔɔ
wree wa ŋga,
waŋgrɛ yire we e nya,
mbe ni ŋga mɛɛ,
a mbe pe ŋga yɛnyiŋge.
3 Kee ŋga o Tafun Nyiɛkpɔɔ wre yo, mu wru Judah, na Jerusalem leele kro haa yi kre mbo,
Pan e nyi na wuuro tra ŋga pe n fali,
mu yirɛ luu ki nu yi,
tnu ka wa yili wa mbe pan.
4 Yire Judah na Jerusalem leele,
e li ni nyu nunu
ŋga mi na yire pe kre na,
na kre ma, na e ndikana pe,
ni krɔ we nyi na kanhun yi,
e sisam ndra na.
A na ki waa nyi,
ndro n wa mbe jaa ki fii.
Judah Ŋunɔ Gbra Kun
5 Bnɔ fɔ mu ki kpali
mbe Judah na Jerusalem
leele kro ki loo,
Ki kpali kpɔɔ, tra kre nu kro,
gble le kpɔɔ, mu yo pe pan,
na e fni titɛɛ.
E ti mbe pe fɛ mbe sɛ kakpɔɛ,
nyjɛ pe mboe sin
mu fɛ mu kun yire na.
6 E yiɛ tɛɛ Jerusalem na,
e fɛ nyaanyaa e shɔ,
e eyɛ ndra ta.
Ŋgi na hin?
Ni tia kala kpɔɔ titi,
ŋga kie lawee kla
yiri nyjeeri haa na paan.
7 Imi na jira we yili u ndra haa,
mbe to fimi na kre,
pan waŋgrɛ klafun wa
uyɛ kna na paan.
U paan mbe Judah kla.
U yili u tni haa na paan,
mbe e tra kre kla putuu.
We e chiɛ yire kaari kajɛɛ,
mbe e leele cha yi na mbe la.
8 Kena e kumu yonyi tɔ poŋgo,
e na nyɛni e na julo,
ŋgi na hin?
O Tafun Nyiɛkpɔɔ wre
krɔ kuɔn kpɔɔ kre n laa o kro.
9 Mi e Tafun Nyiɛkpɔɔ wre yo na,
Kre ble kre,
ŋunu na u loplombo kro
lɛɛ we be.
Kee ŋga kie pe kre we
srawɔfɛɛnlɛ pre,
na keenyanyofɛɛnlɛ pre fo,
mbe ki ti fiɛrɛ kpɔɔ pe yii.
10 A ndaa yo na, “O Tafun Nyiɛkpɔɔ Jaŋgafun, mni a mu Judah na Jerusalem leele pre fana ma ŋga hin? Ŋu mna yo pe pan na mu pe ŋga wejinyiŋge, a kre yi ŋga, brɔfiɛn yiɛshiin pe leni o lagboo.”
11 Na kre nyjila kre waa da, mbe yo Jerusalem leele pre pan na, “Fuflɛ wrɛŋgɛ ki gbuun mu yiri tablɔ tra kre nu na paan pe pan. Kia pe fuflɛ ŋga kie yirɛ fue chiin fɔ mbe wo, 12 kie pe fuflɛ ŋga nyu ki sheli, a mi Nyiɛkpɔɔ mbe ti ki gbun ma. Ŋgi na hin? Mi ni ni leele pre ndie tinii ma.”
13 E le, o loŋgoolo pre klo titɛɛ
na tlo yi na paan.
Pan pe ŋunɛ wi sookɛɛ yire
paan na legboo fuflɛ yi,
pe soolo pree nyaanyaa
mu wɛ nyuu na,
o fun, o wo kɔ aŋga.
14 Yire Jerusalem leele,
e e sisam wɔ e yili e lolonyi nu,
mbe ni e shɔ.
Ŋgi nyjila ee sisam kee
nyjɛ e jawala nu ŋga ti wo?
15 Bitumblɔ yiri mandiɛ sisaa ni
Dan kakpɔɔ kre,
na Ephraim nyambie yire lawee
na paan na yuu mbo
16 E ti mbe waŋgrɛ yire leele loo,
mbe e ki kpali Jerusalem na.
Ŋunɔwifɛɛnlɛ tataara
plɛ yiri haalee ka nu na paan,
mbe Jerusalem, na Judah chiɛ
yire fɛ mbe kun.
Mi e Tafun Nyiɛkpɔɔ wre ni ki yo.
17 Pie pan mbe ki fɛ mbe kun,
na lawee shiefɛɛnlɛ pe ki sri.
Ŋgi na hin? Pe yiri mu ni taan.
Mi e Tafun Nyiɛkpɔɔ ni ki yo.
18 Yire titi kepele nyjɛ e pini,
kre ki tia yire kee nyjɛ
na paan e na.
A ndie tinɛɛ ŋga ki fna
na e ni e taa kre,
ki yaa loloŋgo nu.
Jeremiah Na Fooro Li
19 A ndaa yo na ni lɛɛ,
ni lɛɛ bie ni yaa,
jawala na gbun yɔɔlɛɛ we ni gbo.
Mba ja mbe nyu tɔ. Ŋgi na hin?
Ni bnɔɛ tiŋge loo,
na ŋunɔwifɛɛnlɛ gblee ndru.
20 Ni kanyana kpɔɔ nyini nyini nya,
a yi taala yi yɛ na na paan.
A ni nya na lawee kro kla,
ŋga mbe nya to,
na lawee ŋga ni ta mu ndra le
kre kla titɛɛ kre nu.
21 A ndaa Nyiɛkpɔɔ wie na,
ŋgi nyjila kre kakrɔ ŋga,
na yire bnɔɛ nyjɛ tiŋge nyu
we to wo?
22 Ndaa loo na o Tafun Nyiɛkpɔɔ
wre yuu mbo,
Ni leele pre daŋga.
Ki tia pe n ni chin,
a pe n jawala ni,
a pe n na kala nɔɔ ndru.
Sisam pee kolo chiin pe chin,
pe n chin imi na
pe chichie piin.
23 Yire kee nyjɛ kɔkro kre,
ndaa yiɛ wa mu tra le,
na yaka n wa ki na,
na ki sni waara kpokpo.
A ndaa yiɛ yire mu le nyjeeri,
na yila, na yeŋge,
na wɔɛlɛɛ krɛrɛ n wa na.
24 Ŋga ndaa yiɛ wa mu nyuɛ le kre,
na yii wa na seeri,
a nyambie yire na mɔŋɔi
na shie na paan.
25 Ni n sra ndro nya tra yiɛ na,
a ni nsra hanyini nya nyiɛ yiɛ na.
26 Ndaa tra taan kre nya,
na ki kaari tablɔ tra.
A ki chiɛ yire kro kaari kajɛɛ.
O Tafun Nyiɛkpɔɔ wre krɔ,
ŋga kii fiɛrɛ ni kre kra yire kee nyjɛ krɛrɛ pe.
27 Kee ŋga o Tafun Nyiɛkpɔɔ
wre yuu yi kre mbo,
Tra ŋga kro we sni waara,
la, mba ki kro kla.
28 Ki tia waŋgra ŋga leele we nyɛni,
mbe ndram wɔmu nyiɛ yiɛ tɔ.
Ni paara, a mba laa ki kro,
ni jawala wru, a mba ki chinɛ.
29 Soolo nduufɛɛnlɛ,
na snimi wafɛɛnlɛ gblee,
we ti mbe chiɛ yire leele kro fɛ.
Pe plɛ we fɛ mbe sɛ le klɔɛ nu,
mbe pe plɛ fɛ
mbe nyuɛ dnɛ nduu.
Pie fɛ mbe pe chiɛ yire kro ti,
a ndro wa kro yi na.
30 Jerusalem leele, e wo kɔ.
Mni a e dodonyi nyiɛ piipii,
na swanyiɛ lagboo jlɔnyi le le,
mu eyɛ pe na
tiɛrifɛɛnlɛ lɛ ŋga hin?
E eyɛ san finfin.
E korifɛɛnlɛ pre e je,
pre kuraa e chaa mbe gbo.
31 Ni nyɛnɛɛ loo,
na siirefun ŋmba lɛɛ yaa wi,
ndee na chapɔlɔ u u sijle sii.
Jerusalem leele pe nyɛni,
ki pe na ŋumu ki klo ndro nu.
A u kɛ tini na yuu mbo,
“Ni wo kɔ rɔ.
Ni ŋmaa to linkufɛɛnlɛ kɛɛ.”