Ndro N Wa Mu Fraka
5
O Tafun wre na yo ni pan mbo,Jerusalem lete yii,
mu yiɛ wa mu le,
mu fɛ mu kun,
lawee nyjɛ nu lenɛɛmu shie,
na fni yire le,
na mu ndro nunu chom,
ŋmba u fraka mu na kpra lii,
Nyiɛkpɔɔ yiɛ nya.
Na mu wa nya ma,
kena mbe Jerusalem leele,
sisam ti mbe pe kɛ.
2 Pe ni mɛɛ tɛɛ na dani
na yuu mbo,
O Tafun Nyiɛkpɔɔ wree wa,
a nde danyi wɛɛ pe dani.
3 A ndaa yo
o Tafun Nyiɛkpɔɔ pan na,
Nyiɛkpɔɔ, ni chin
na kpra mu chaa.
A mu leele pre ndikana ndra na,
mu pe ndie tinii.
Pe kanyana nyjila nu kuraa kre,
kre pe ndikana kee pini na yaa,
hali pia jaa chinɛ.
4 Ndaa jawa na,
ŋga pre leele pre pɔlɛ kre,
kre ki tia pra pini na jijiele lɛ.
Ŋgi na hin?
Pe n Nyiɛkpɔɔ kolo chin,
a pe n chin,
ŋga u chaa mbe pe pe.
5 Kena mbe sɛ paara
pe loplombo pre pan.
Ŋgi na hin?
Pe kee ŋga Nyiɛkpɔɔ chaa chin.
La, pe kro jawala nunu ta,
mu peyɛ wɔ,
Nyiɛkpɔɔ jaŋga kre jaara.
6 Pe kro laa ni na,
mu yiri mu ni taan kpɔɔ,
ki tia pe loŋgo we paan pe yii,
na jira yili klɔ nu,
mbe paan pe yii mbe ka.
Ndee na kombo u yili
tablɔ tra kre nu,
mbe paan pe ka.
Pe loŋgo we pe,
na kajinyurɛ wi,
mbe paan pe shie,
pe chiɛ yire jlonwee nyu na,
mbe pe yii wa,
mbe pe kaara knumu bujibuji.
7 O Tafun Nyiɛkpɔɔ wre yo mbo,
Ŋgi kie ti mbe ni e sisam ti,
mbe e kɛ hin?
E biile ni je,
mu sɛ na sɛɛnlɛ wɛɛ dani.
Mi ni pe kaan yirɛ,
nyjɛ yi pe shian kro,
la, pe leŋgeere kla,
mu peyɛ wru mu taa,
tiɛrifɛɛnlɛ na.
8 Pan pe tnimu nyi na yurɛ lɛ,
nyjila kro nu,
blɔ u ŋmbrɔ chɔ chaa mbe cha.
9 O Tafun Nyiɛkpɔɔ wre mbo,
Kena ki n fna mbe
ni pe ndie tini,
yire kee nyjɛ na ra?
Kre waŋgra ŋga nyini,
ki n fna mbe ni fɔlɔ tɔ pe na ra?
10 Mbe yo pe loŋgoolo pan na,
E sɛ le pe tre seele nu,
e yi klɛ yire knumu e wo,
la, yaashia tinyi yire knumu,
yi nɔɔ na.
Ŋgi na hin?
Mi Nyiɛkpɔɔ wre leele ma na.
11 Kolo kro na,
Israel leele, na Judah leele pre,
kro n kpra li na ni ni.
Pan mi pe Tafun Nyiɛkpɔɔ,
wre yo.
12 Pre leele mblɛ kakra lii
na yuu mbo,
Nyiɛkpɔɔ wre wa o pe yaka,
wa o pe kee sisaa ka,
oo tni wejinyiŋge nu,
a klo wa to o na.
13 Pan pe keenyanyofɛɛnlɛ kee,
nyjɛ pe yuu yire,
pan yi pe na fuflɛ,
na pe paara na woni.
Mi Nyiɛkpɔɔ wre kee
kre n wa, pe nu,
kena kee nyjɛ pe yuu yire,
we pe nya.
14 Kena kee nyjɛ o Tafun Nyiɛkpɔɔ Jaŋgafun wre yuu yi kre mbo,
Jeremiah, ŋga leele pre,
yire kee nyjɛ yuu kre ndra na,
mbe ti mbe ni kee kre pe,
mu nyuu na kanhun yi,
mbe leele pre shɔ na kɛɛn yi.
15 Israel leele,
mbe ti mbe waŋgra ka leele,
yiri haalee ka nu,
mbe paan wi na e ni,
ŋga pe yiri aŋga ma,
a faŋgaa wa pe nu,
leele mblɛ kayolo nɔɔ,
yaa na ndru.
16 Pe ŋunɔwifɛɛnlɛ pree faŋga ni,
a pe snimi kuu nyaanyaa.
17 Pie e sro kro shɔ e pan mbe li,
mbe e biile yii mbe gbo,
mbe e yurɛ yii mbe ka,
pie e seele yirɛ kro kla,
mbe e chiɛ nyjɛ e mboe sin,
mu fɛ mu kun,
na kaan yi na yire kro juari.
18 La, mi e Tafun Nyiɛkpɔɔ wre yo na, mba ti mbe pe e kla poŋgo. 19 Na leele pre waa mu wie na, ŋgi kra tia o Tafun Nyiɛkpɔɔ wre na yire kee nyjɛ nyini pe o na ma hin? Yo pe pan pan na, “Ŋga mi wi pe Tafun Nyiɛkpɔɔ, a pe ni je, mu sɛ sɛɛnlɛ koli waŋgra fɔŋgɔ nu mu pan na sumi pre titi tra nu kre ndra na. Kre kie ti pe sɛ kaari tinlɛ waŋgra fɔŋgɔ nu. 20 Kre kee ŋga kpali, mbe Judah leele mblɛ lɛ Jacob nanae pre loo.”
21 Kena yire jijiele, jawala lafɛɛnlɛ,
ee nyiɛlɛ ni, a nde e n na nyaa,
ee ndiile ni, a nde e n na ndru.
22 Ŋgi ki tia e n na ni fiɛ ŋga hin?
Mi e Tafun Nyiɛkpɔɔ ni ki yo.
Kena ki n fna,
mbe e na seeri ni yiɛ ra?
Mi ni tanyiɛ tɛɛ,
mu epo samu gbun,
mbe ki nyumu kre,
wa jaa gbun mbe tro ki na.
Imi kie mbapilɛ wa,
mbe gble mbe da kpan,
kia jaa gbun,
mbe tanyiɛ yire tro.
23 Yire kee nyjɛ ni pe,
nyjɛ krɛrɛ kɔkro ni,
e je mu ndikana pe,
mu yiri mu ni taan,
mu krɔ kna mu wa ni na.
24 Hali e n paara eyɛ pan na,
“E ti mbe o o Tafun
Nyiɛkpɔɔ wre fiɛ,
ŋgi na hin?
Wre u tia nyiɛ na paan,
yi nyjila nu,
mu tia o na sro taa,
na kuun nyjila ŋga ki fna nu.”
25 E kefuɛn nyjɛ e piin kre ki tia,
yaa yire yirɛ nyjɛ nya na,
e sisam tia yaa yira chichie ka ta.
26 Sisampefɛɛnlɛ plɛɛ wa,
mu chaa ni leele pre nu.
Pan pe jee na sri na lewo,
ŋmba u hanyini pɛɛri pɛlɛ yi.
Pan pe kepele nyi to,
na mblɛ pe leele peerii,
pɛɛlɛɛ na pe yiri lɛ.
27 Imi na pe hanyiɛlɛ yiri,
na leni denkre nu
mbe ki nyi kre,
pan pe leele yirɛ dnumu,
a pe kalonyi nyi.
Pe kaari swafɛɛnlɛ, mu jaŋga ta.
28 Pe lii taan, mu kpɔɔkpɔɔ,
a pe kefuɛn pee nyu wa jaa to.
Na bijro kala ta,
praa yo mbe u ŋga,
a na shianfun wo tna kuraa kre,
pia yire u kro.
29 Kena mi Nyiɛkpɔɔ wre n fna,
mbe pre leele pre ndie tini ra?
Kena yire waŋgra nyjɛ,
yi yire kee nyjɛ pini kre,
mba fɔlɔ tɔ pe na ra?
30 Pe wrekroo,
na keesɛɛ titi pini tra kre nu.
31 Pe keenyanyofɛɛnlɛ kala fnɛ,
a pe srawɔfɛɛnlɛ pre,
na pre titi jaŋga teeri,
na tnumu tuni,
a ki tna ni leele pre pan,
a pe taa pe kro.
Kena na yira kro nyu waa to,
mni pie pe hin?