Loŋgoolo Jerusalem Fɛ Mu Kun
6
Benjamin nɔɔ leele,e yiri e fɛ e shɔ e loŋgoolo kɛɛ.
E fɛ e yili Jerusalem na.
E bnɔ fɔ Tekoa na.
E yire Beth-Hakkerem na,
e ki kpali mbe leele loo.
Ŋgi na hin? Kanyana kpɔɔ yiri,
nyjeeri haa wa na paan,
kie yira kla titi.
2 Jerusalem nyu titi,
a nde mbe ki kla.
3 Ŋulo na pe ŋunɔwifɛɛnlɛ,
we paan ki kun mbe le lalaa,
mbe pe yonyi nyinyi kan,
mbe fɛɛ ki kun,
mbe chia kre yɔɔlɛ,
mbe peyɛ ŋga.
4 E eyɛ kna,
mbe o sɛ wi na pe ni.
E yiri, oo wi na pe ni lafo na.
La, yila chaa mbe kɔ,
a ndram kre paari.
5 Kena e yiri,
oo wi na pe ni blee ŋga,
mbe lawee nyjɛ nu pe feni,
na ndra yire juari mbe wo.
6 Kee ŋga o Tafun Nyiɛkpɔɔ Jaŋgafun wre yuu yi kre mbo,
Mbe yo pe wifɛɛnlɛ pre pan na,
E tinyi knumu,
e yi tle tle Jerusalem mboo
kre na,
e nduu yi na e le ki lam.
Kolo kro na ki fna,
mbe ni ki leele ndie tini.
Ŋgi ndra na hin?
Pe leele fiŋge wa titi.
7 Imi na luuluu nyumu gbuun,
na yili blo nu kre,
pan sisam kee yilii
Jerusalem na.
Pɔɔrɔ, na lawee klaa kee
chiin tiŋge ki ndru wa.
Yambla, na leele,
mblɛ na klɛ nyi ni nyaa wa.
8 Jerusalem leele,
e jaaraa loo, na kre ma,
mbe krɔ knaa wa e na,
mbe e tra kre kla,
mbe ndro wa jaa tni,
tra kre nu na.
9 Kee ŋga o Tafun Nyiɛkpɔɔ Jaŋgafun wre yuu yi kre mbo,
Israel leele,
mblɛ pie kro Jerusalem na kre,
pie pe pe na tre tiŋge,
ŋga sɛnyi pe kunumu ki na,
mu ndru mu ki yaa.
Jeremiah Krɔ Na Kun
10 A ndaa yo na,
kena ndro ŋmbi pan,
mbe kee ŋga yo,
mbe u jaari hin?
A ŋmbi we loo ni pan hin?
Pe ndie kan mu tro,
Nyiɛkpɔɔ kee ŋga mu yo pe pan,
kro pe bin,
pe n na kee ka chaa mbe loo.
11 Ni o Tafun Nyiɛkpɔɔ wre,
krɔ ŋga ki kun kre,
gbra kun niyɛ nu,
a mba jaa ki tɔ mbe ta.
A o Tafun Nyiɛkpɔɔ na kna mu yo ni pan mbo,
Ti mbe biile, na yirifumblɔ,
mblɛ pee wa lete na,
pre ni krɔkuɔn kre nya.
Bilɛ na pe chiɛlɛ kro,
pie pe yii mbe sɛ,
hali pe blɛlɛɛlɛ titie pre kro,
pia wa ti.
12 Na ni waa ni jaŋga nyina pe na,
pie pe kalonyi wru,
mbe plɛ ŋga,
mbe pe chiɛlɛ na pe seele kro,
wru mbe ya pe pan.
Pan mi Nyiɛkpɔɔ yo.
13 Mu yire pe biile na,
mu sɛ su pe loplombo na,
pe kro jajaarafɛɛnlɛ lɛ.
Pe keenyanyofɛɛnlɛ,
na pe srawɔfɛɛnlɛ pre,
leele pe kro fana.
14 Na pe ni leele pre bre,
pe kanyana nu kre,
mu yo kala fiɛn ka yi.
Pe yuu na wejinyiŋgee wa,
nde wejinyiŋge n wa.
15 Kena nyifɛɛrɛ pe kuu,
pe afunyi kee nyjɛ pe pini,
yire na ŋgaa?
Pe n nyifɛɛrɛ chin,
a nyifɛɛrɛ n wa pe yiɛ na.
Ki tia imi na plɛ to kre chɔɔ,
pan pe hamblɛ pre we to.
Na ni waa pe ndie tini to,
mu chin na pe kɔlɔ yi.
Mi e Tafun Nyiɛkpɔɔ wre,
ni ki yo.
16 O Tafun Nyiɛkpɔɔ wre yo mbo,
Ni leele,
e yiri e sɛ yire kochiɛnlɛ na,
e yiɛ wa e le,
e fafa kooloe yire haa wie.
Ee kolo chichie kre nya,
e tro ki na,
kre na ee wejinyiŋge ta,
mbe e nyiɛ wuu.
La, e je na yuu na,
yaa tro ki na.
17 Ndaa leele wɔ mbe pra e le,
na pe waa bnɔɛ fɔ,
mu e jaari kre,
e ndie tɛɛ pe pan.
La, e na yo na yaa ndie tɛɛ.
18 Ki tia ni yo waŋgrɛ nyjɛ yii wa tra yiɛ na pan na,
e pan e ni dansiɛrɛ li,
ee nya kee ŋga mbe pe pe na.
19 Leele mblɛ ee wa tra na e loo,
ni paan mbe ni leele pre kla,
pe sisam nyjɛ pe pe kre na,
ŋgi ndra na hin?
Pe n kee nyjɛ ni yo pe pan
yire loo,
a pe ni mbra yire je.
20 Ni kee ka ma,
na e tuwe ndiom tɛɛn,
nyjɛ ni e yiri Sheba na,
na haalee lawee yire nu,
na paan na ni kaan yire ni.
Yurɛ sroo sra nyjɛ e woni,
na ni kaan,
kre n tna ni pan,
a ni kee ka ma,
na sra hɛnyi nyjɛ e woni,
na ni kaan yire ni.
21 Ki tia kee ŋga mi e Tafun Nyiɛkpɔɔ wre yuu yi kre,
Mbe gbrontohaa pe,
mbe tɛɛ ni leele pre yiɛ.
Lɛɛlɛ na pe bibilɛ kro,
we gbro ki na mbe to,
a pe tnifɛɛnlɛ, na nɔɔlɔ kro,
we ku mbe fun.
22 Kee ŋga o Tafun Nyiɛkpɔɔ wre yuu yi kre mbo,
“E le, ŋunɔwifɛɛnlɛ plɛ paan,
nyjeerihaa tra ka nu pe yiri.
Waŋgra kre leele faŋga ni,
a ni kanyaa le pe nu,
a pe peyɛ kna na paan.
23 Pe bɛnyi, na pe chombooloo
wa pe kɛɛ,
pe ndra sheli,
a pra ndro fooro chin.
Pan pe soolo mblɛ pe nduu,
pre tini na epo yi.
Pe pe nyina kolo ŋga na pie tro,
mbe jaa wi na Jerusalem
leele ni.
24 A leele pre na kna mbo,
Ŋga o pe kee loo kre,
ki tia fiɛrɛ kpɔɔ o yii,
a o na bli oyɛ nu, na chlɔ
ŋmba siire lɛɛ yaa wi.
25 A o Tafun Nyiɛkpɔɔ na yo pe pan mbo,
Yaa shia yili mbe sɛ seele nu,
ndee mbe kolo yii, ŋgi na hin?
E loŋgoolo pre lawee kro shɔ
mu ta,
mu pe brɔfiɛn yiɛshiin yii,
mu yire yire,
a pe kee fiɛrɛ ni.
26 Kena ni leele,
e kumu yonyi tɔ,
e gbila tɔɔnrɔ nu,
e na fooro lii.
E nyɛni e kuulo tɔɔnri,
na ndro biblɔ nunu chom u ku.
Ŋgi na hin?
Kia mu mbe e klafun wre pan.
27 Jeremiah, ni leele pre pe mu le,
imi na pe tɔɔnrɔ pini na le kre,
kre mu nya imi na pe nyi.
28 Pe kro pe ndikambla,
mblɛ pe yiri,
mu mi Nyiɛkpɔɔ wre taan.
Pe kefuɛn pee tia pe sheli,
mu pe na swafre, na tɔɔnrɔ yi,
mu na kala fnɛ.
29-30 Mu jaa swafiŋge le fnunu nu,
ŋga ki wɛɛrɛ titi nu,
mbe nɛɛrɛ wɔ ki nu,
la, ni leele pre sisam kpɔɔ mu tro,
a ndro wa jaa nɛɛrɛ laa pe na,
a ki tia mi Nyiɛkpɔɔ pe je.”