2 “Sɛ yire o Tafun Nyiɛkpɔɔ Suminyuŋgo kre jlonwee nyu kre na, mu kee ŋga yo Judah leele pre pan na.

Yire Judah leele mblɛ e troi kre jlonwee ŋga nu na paan na o Tafun Nyiɛkpɔɔ wre sumi kre, e loo, 3 O Tafun Nyiɛkpɔɔ Jaŋgafun wre, Israel Nyiɛkpɔɔ wre yo na, e kolo sisaa ŋga na e troi, na kefuɛn nyjɛ e pini yire ti, e kolo chiriri wru, kre mbe ti mbe e tni kre lawee ŋga nu. 4 Yaa na eyɛ fana mbra yuu na, ‘O Tafun Nyiɛkpɔɔ wre Suminyuŋgo yi kre, ki tia yaka wa jaa o ta.’ 5 Na e chinɛ e kooloe, na e kaalɛɛ nyjɛ e pini yire na, mu na kpra lii na eyɛ ni, 6 a e n na fumblɔ mblɛ pe yiri waŋgra ka nu mu pan mu tni e nu pre fiŋge, pre na bijile, na lekuchiɛlɛ ni. A e n na leele yiri na kuu finfin lawee ŋga nu, mu eyɛ wru mu taa sɛɛnlɛ kro mu eyɛ kla kre, 7 kena mi e tafun Nyiɛkpɔɔ we ti mbe e tni kre tra ŋga ndaa e tolɛɛlɛ ŋga puli kre nu. 8 La, kewɛɛ nyjɛ ni pe e fana yire nu e dankna nyi.

9 Ee sɛ ju, mbe linku kee pe, mbe leŋgeere kla, mbe danyi wɛɛ da, mbe sɛ tuwe ndiom tɛɛn sro mbe sɛɛn Baal ŋga, mu na sɛɛnlɛ nyjɛ kee e n chin sumi, 10 mbe yiri kre kro mbe paan yire ni yiɛ ni Suminyuŋgo, ŋga na ni mɛɛ taa ŋga nu, mbra yuu na, ‘Yaka wa jaa o ta.’ Kena afunyi kee nyjɛ e pini ŋga kɔkro ni yaka wa jaa e ta ra? 11 Kena ni Suminyuŋgo ŋga na ni mɛɛ taa kre sɛ kaari juolo ndra haa mu e ŋga ra? La, nyiɛlɛ ni ka mu wa na e dɔɔ taa. Pan mi e Tafun Nyiɛkpɔɔ wre yo.”

12 “E sɛ Shiloh na e sɛ Yoŋgo Nyuŋgo ŋga na ni mɛɛ na taa jle kre lawee le fuŋga, Israel leele sisam ndra na, ee nya imi na ndaa ki kla mu da. 13 Ŋga e yire kee nyjɛ krɛrɛ piin ŋga, ni kee ŋga mu chin ŋga kro yo e pan, a e je yaa ndie tɛɛ. Na ni e yeeri kuraa yaa kna mbe ni le kple. 14 Ki tia, kee ŋga ndaa pe Shiloh na kre, kre mbe pe Suminyuŋgo ŋga na ni mɛɛ taa, a e na dankna ki na kre na, kre lawee ŋga ndaa yire na e tolɛɛlɛ ŋga kre. 15 Mbe e ni, mbe flo ni yiɛ imi na ndaa e tolɛɛlɛ Israel leele pre ni kre.

16 Kena Jeremiah, maashia nyiɛtali mbe pre leele mblɛ ŋga. Na mu kee ŋgi na ŋgi yo ni pan, mba ki loo. 17 Mu n kee nyjɛ pe pini Judah chiɛ, na Jerusalem lete na yire nya ra? 18 Pe biile pre kejenyi chaa na paan, a pe lɛɛlɛ na kanhun gbeerii, a pe chiɛlɛ na paanu mimi tuŋgo, na yi kla na sɛɛn chlɔ ŋga pe yeeri Nyjeeri Ŋuchlɔ kre kaan. Pe simi woni sɛɛnlɛ na, na ni krɔ kuun.” 19 O Tafun Nyiɛkpɔɔ wre mbo, “Kena mi krɔ pe kuun ŋgaa? Peyɛ pe pini, na yire nyifɛɛrɛ kee yire pini.”

20 Ki tia kee ŋga o Tafun Nyiɛkpɔɔ Jaŋgafun wre yuu yi kre mbo, “Mbe ni krɔkuɔn sisaa kre kna mbe wo kre lawee ŋga nu na nyumu yi. Kie wo leele, na yurɛ, na tinyi, na seele, na yirɛ kro na. Kie nyi na kanhun yi, a ndro wa jaa ki fii.”

21 Kee ŋga Israel Nyiɛkpɔɔ Jaŋgafun wre yuu yi kre mbo, “E kro e na e yurɛ sroo sra woni, e na yaa sra hɛnyi nyjɛ yire na, e na yi kaara yire kaa rɛ. 22 Ŋgi na hin? Ŋga ndaa yiri na e tolɛɛlɛ ni Egypt tra nu kre, ndaa paara pe pan, a yurɛ sroo sra, na sra hɛnyi yire kee chiin ma ndaa yo pe pan. 23 La, kee ŋga ndaa yo yi na, e ndie tɛɛ ni pan. Na e li ni kee na mbe pe e Nyiɛkpɔɔ, mbe ni e wru mbe pe ni leele. Ndaa yo pe pan na pe taa kooloe nyjɛ ni pe nyina yire kro na, kre kee kro we nyu mbe pe ŋga. 24 La, pe nsra ndie tɛɛ ni pan. Sisam ndikana kee nyjɛ pe lolonyi nu yire kro pra taa, ŋga pie sɛ yiɛ kre, a kra tia pra ndru na shie kro. 25 Mu yire nyjila ŋga e tolɛɛlɛ na yili Egypt tra nu mu pan mu su aŋga na, nyjila kro nu, pan ni tia ni sumifɛɛnlɛ keenyanyofɛɛnlɛ pre na paara e pan. 26 A e je, e n ndie tɛɛ ni pan. E sisam kuraa wɛ e tolɛɛlɛ pre na.”

27 Jeremiah, hali mu yire kee nyjɛ krɛrɛ yo pe pan, pia mu kee kre loo, a na mu pe yeeri, pia shɔ mu pan. 28 Kena yo pe pan na, “Waŋgra ŋga leele pe n li pe Tafun Nyiɛkpɔɔ kee na, mu tia u pe fraka lɛ kre. Kpra lie fun pe nu, a ki fiɛn kuraa n wa pe nyu na. 29 Jerusalem leele, e e ndrɛ klu e wo, e kuulo tɔɔnri nyambie lawee yire nu. Ŋgi na hin? E Tafun Nyiɛkpɔɔ wre e je, yire aŋga leele mblɛ, Nyiɛkpɔɔ krɔ yii na e ni.”

30 O Tafun Nyiɛkpɔɔ wre yo mbo, “Judah leele sisam pe ni yiɛ, pe sɛ sɛɛnlɛ nyjɛ yi pe afunyi yirɛ yire tɛɛ Suminyuŋgo ŋga na ni mɛɛ taa kre nu, mu ki tɔ na nɛɛrɛ ni. 31 Pe sɛɛnlɛ sumi lawee sin sin na bawa yeeri Topheth, a kii wa Ben-Hinnom landɛɛ kre nu, mu na pe biile sroi na sra woni. Kre kee ŋga n pe kee ŋga ndaa yo pe pan na pra piin, a kre kee kre n da mu pan ni jawala nu tun kple? 32 E na le, nyjila ka we kɔɔ da mbe pia na kre lawee ŋga yeeri Topheth, ndee Ben-Hinnom landɛɛ na, la, pie na ki yeeri landɛɛ ŋga nu pe leele kuu, ŋgi na hin? Pie gboolo le wa chiin mbe kɔɔ lawee chaa la pe lehaa. 33 Legboolo we kaari hanyiɛlɛ na nyaa lam yurɛ sro, a ndro n wa mbe pe ni mbe laa. 34 Kre nyjila kre, mbe ti mbe bijaala pilɛ na pe chiɛlɛ mblɛ pee wa Judah tra nu, na Jerusalem lete na kro yɛshɔɔrɔ, na pe gblee nyu to, ŋgi na hin? Pia ndro gbra kun tra kre nu na.”