8
O Tafun Nyiɛkpɔɔ wre yo mbo, “Na nyjila kre waa da, pie Judah ŋulo, na ki loplombo, na ki srawɔfɛɛnlɛ pre, na keenyanyofɛɛnlɛ, na Jerusalem leele pre pe ku ku kre kajle wɔ fanyi nu mbe wa fimi na. 2 Pie yi wɔ mbe wo fimi na mbe yila yi gbun, mbe nyiɛpɔ, na wɔɛlɛɛ na nyaa mbe to yi na. Yire yirɛ nyjɛ kro pra tɔ mu na yi sumi, na pe ndrɛ chaa yi pan. Pe kajle yire we nyina mbe sni na kafuŋgo kra yi, a yi keshian ka wa pe ndro na. 3 Pre sisam pefɛɛnlɛ waŋgra ŋga leele pre plɛ we kro mbe ŋmaa ta lawee nyjɛ nu mbe pe gbun mbe nyina kre nu, a pe kumu kuraa we prɔ pe pan pe ŋmaa na. Mi pe Tafun Nyiɛkpɔɔ Jaŋgafun wre ni ki yo.”Sisam Na Ki Ndie Tiniɛ
4 Jeremiah, yo pe pan na, Mi pe Tafun Nyiɛkpɔɔ wre na yo na,
Na lewo gbro mu to,
wra ndru mbe yiri ra?
A na lewo fun kolo na,
wra ndru u kro ra?
5 Kena ŋgi ki tia pe laa ni kro,
mu fun,
a pia ndru pe kro,
mbe pan ni pan ŋga hin?
A pe sɛ kun mu mbra sɛɛnlɛ,
nyjɛ yi pe fana yire na,
mu je na pia ndru,
mbe pan ni pan ŋga hin?
6 Ni ndie chan na ndru pe pan,
la, ni nya,
na pe n na kpra yuu.
Pe wa n wa mu u jawala pe,
na we laa u sisam kro.
Pe yuu peyɛ pan mbo,
Sisaa ŋgi o pe hin?
Mna wa chaa kpan,
bawa we yiɛ le.
Pan pe nyi na soolo pnaŋa,
na shie ŋunɔ.
7 Hanyiɛlɛ mblɛ pe tro nyiɛ yiɛ na,
ŋga kuraa nyjila chin.
Pe chin nyjila ŋga nu,
ki fna pe yiri lawee ka nu,
mbe sɛ lawee fɔŋgɔ nu.
La, mbra nyjɛ,
ni ni leele pre ŋga yire,
pe n yi chin.
8 Yire e yuu na,
o kala chin, ŋgi na hin?
Wre kɛɛ o Tafun Nyiɛkpɔɔ,
mbra yire nyi.
E ti ni yo e pan mbe e loo,
e nyinafɛɛnlɛ pre,
mbra yire nyunɔ,
mu yi ndra kna mu soo.
9 Ki tia nyifɛɛrɛ,
we e kachimblɛ pre gbo.
Pe peyɛ pɛɛri pɛlɛ,
a pe n chin kee ŋga pe pini.
Ŋga pe mi pe Tafun Nyiɛkpɔɔ,
wre kee je ŋga,
sena pe kachindɛ nyi na hin?
10 Kre kee ŋga pe pe ŋga ndra na,
mbe pe chiɛlɛ,
na pe seele kro wru,
mbe lefumblɔ ŋga.
Pe lekpɔɛ, na pe bɛɛlɛ kro,
jajaarafɛɛnlɛ lɛ,
mu yire pe keenyanyofɛɛnlɛ na,
mu sɛ su,
pe srawɔfɛɛnlɛ na kro,
dankna leele ma.
11 Pe ni leele pre pini na,
kala ka n wa pe na,
na yuu pe pan na wejinyiŋgee wa,
a nde wejinyiŋge n wa.
12 Kena nyifɛɛrɛ pe kuu,
pe afunyi kee nyjɛ pe pini,
ŋga na ŋgaa? Ɔɔhɔn.
Hali nyifɛɛrɛ fiɛn n wa pe yiɛ na.
Na ni waa Judah leele ndie tini,
kena pe wo kɔ,
pan pie ku to na ndro kro wi.
Pan mi,
e Tafun Nyiɛkpɔɔ wre yo.
13 Mba ti mbe pe sro nyu,
pe tinyi li wee wa jaa sɛ,
yi wrɛ we nyaara.
A nyjɛ ni pe ŋga yire kuraa kre,
leele fumblɔ we paan,
yi shɔ pe kɛɛ.
14 Pie kna mbra yuu peyɛ pan mbo,
Yira ŋgi o tni mna kuraa,
na pini hin?
E pan mbe o fɛ mbe sɛ kakpɔɛ,
nyjɛ pe mboe sin,
mu fɛ mu kun yire na,
mbe sɛ ku wa mbe kala kɔ.
Ŋgi na hin? O sisam pe o Tafun,
Nyiɛkpɔɔ wre na,
a u o gbun kumu pini ni,
mu o ŋga tuwe sisaa a o gbɔ.
15 O naa kaan na oo wejinyiŋge ta,
mbe shɔ o yira bɛɛlɛ kɛɛ.
A o n yaka chiriri nya.
La, fiɛrɛ kee titi o nyaa.
16 O loŋgoolo pre le,
Dan kakpɔɔ kre na,
ŋga kii wa na shie,
nyjeeri haa kre nu,
a pe soolo pre kɔɔnrɔɔ tia,
fiɛrɛ o yii a o na seeri.
Loŋgoolo pre paan mbe o tra kre,
na yira ŋga kii wa,
ki nu kro kla,
ndro nunu chom kuraa,
wa ŋmaa li.
17 E le, mbe ti wɔɔlɔ sisɛɛ pan,
mbe le e nu mbe e niɔ.
A ndro wa jaa pe pe yaka.
Pan mi,
e Tafun Nyiɛkpɔɔ wre yo.
18 Fooro tia sra wɔ ni na,
a ki tia ndaa chaa,
mbe pra e na.
19 Ni loo a ni leele pre na nyɛni,
haalee tra ka nu,
na yuu mbo,
Kena o Tafun Nyiɛkpɔɔ wre,
n wa Jerusalem na ra?
Kena Jerusalem ŋunu wre,
u n wa chia kre na ree?
A ndaa loo na,
Nyiɛkpɔɔ pe wie na,
mni a e na sɛɛnlɛ wɛɛ yire sumi,
na ni krɔ kuun ŋga hin?
20 Leele pre nyɛni na yuu mbo,
sro kun nyjila tro,
a kowam pan mu tro,
a nde o Tafun Nyiɛkpɔɔ,
wre n o shɔ tun.
21 Pe ni leele pre kla,
a ki tia ni lɛɛ kla,
a fooro kpɔɔ tia ndaa nyɛni.
22 Kena tuwe n wa,
Gilead tra nu ra?
A tuwe pefun wa n wa wa ra?
Kena ŋgi ki tia,
a pe n ja mu ni leele pre,
klɛ yire tra hin?