9
Ao, na kra pe na nyumu bribri,kraa wa ni ndra,
a ni nyiɛlɛ na pe na blo yi kre,
kaa lafo na blee,
mbe naa ni leele,
mblɛ pe gbo pre nyɛni.
2 Ao, na kra pe na,
mbe na lawee ta,
tablɔ tra kre nu,
mbra sɛ ndra wa,
mbe ni leele pre wa ni nya,
ŋgi na hin?
Ni leele pre kro,
leŋgeere klafɛɛnlɛ lɛ,
a pe kee n kpra ni.
3 Nyjila kro nu pe peyɛ kna,
mbe kala fnɛ,
kpra lie nu ma,
pe peyɛ kpɔɔri,
pe sisam pee nyu wa jaa to,
a pe n mi Nyiɛkpɔɔ le mu nya.
Pan mi pe Nyiɛkpɔɔ wre yo.
4 Ndro kro fna,
mbe u nunu dɔɔ ta,
mu lo biile kuraa kre,
maa dankna pe na.
Pan ndro kro kala fnɛ,
na o tolɛɛ Jacob wi,
ndro kro u ŋmbrɔ klai.
5 Ndro u nunu fana,
a pra kpra yo peyɛ pan.
Pe n yaka chin, na kafinɛ bɔkɔ,
a pia jaa sisam pee ti.
6 Denyjuufɛɛnlɛ biribiri lalaa,
ŋu Jeremiah nyi mu tni,
pe leele fanaa tia pe ni je.
Pan mi mu Tafun Nyiɛkpɔɔ,
wre yo.
7 Ki tia kee ŋga mi pe Tafun,
Nyiɛkpɔɔ wre yuu yi kre.
Le, mbe nɛɛrɛ laa ni leele pre na,
imi na pe swanyiɛ nyani,
mbe nɛɛrɛ wɔ ki nu kre.
Ni leele pre sisam ndra na,
fɔna ni tro kre kolo ŋga na.
8 Pan pe nyu kee nyi na,
snimi ŋga ni pe ndro kuu yi.
Kafinɛ kee yi yilii pe nyuu.
Nyu kayooro tɛɛn pe yuu,
pe tnifɛɛnlɛ pan.
La, pɛɛlɛɛ pe pe peerii.
9 Kena ki n fna mbe mi,
pe Tafun Nyiɛkpɔɔ,
wre pe ndie tini ra?
Kre waŋgra ŋga nyini,
ki n fna mbe ni fɔlɔ tɔ pe na ra?
10 Nyuɛ, na tra lawee,
nyjɛ nu yurɛ kaa,
a yi kaari tablɔ tra,
kre ndra na,
mbe nyɛni mbe julo.
Leele fɛ mu yire lawee yire ti,
a ndro na tro wa na,
hali ma yurɔ nyɛnɛɛ loo wa na.
Hanyiɛlɛ na nyaalam yurɛ,
kro gbɛ tra kre nu.
11 O Tafun Nyiɛkpɔɔ wre na yo mbo,
Mbe ti mbe Jerusalem,
na Judah chiɛ yire kro kaari,
kponkpon bri,
mbe kaari ŋmbokuŋmboe tni haa,
a ndro wa jaa tni wa.
12 A ndaa kna mu o Tafun Nyiɛkpɔɔ wie na, “Mni ki le a tra ŋga sni waara mu yua, a ndro wa jaa tro ki na ŋga hin? Kena kachiŋu wa n wa mbe jaa kre kee ŋga nɔɔ loo ra? Kena Nyiɛkpɔɔ, mu n ndro wa nyina ki nɔɔ, mbe u leele pre hamblɛ nyina ki yi ra?”
13 A o Tafun Nyiɛkpɔɔ wre na yo mbo, “Ki yire ŋga pe ni mbra nyjɛ ndaa pe ŋga yire je kre ndra na. Pe ndikana pe ni na, mu je na pia li ni mbra yire na. 14 Pe ndikana pe, mu taa kee nyjɛ pe lolonyi chaa na, mu sɛ taa Baal sɛɛnlɛ nyjɛ pe lɛɛlɛ na pe nyina yire na.” 15 Ki tia kee ŋga wre Israel Nyiɛkpɔɔ Jaŋgafun wre yuu yi kre mbo, “Le, mbe ti mbe ni leele mblɛ sro susrom li, mbe nyumu ŋga nu tuwe sisaa nyi gbɔ. 16 Mbe pe gbun mbe nyina waŋgrɛ nyjɛ pre, ndee pe tolɛɛlɛ nsra chin nu. A mbe pe kɔŋgɔ ni brɔfiɛn yiɛshiin ni, mbe sɛ su na mbe pe kla.”
17 O Tafun Nyiɛkpɔɔ Jaŋgafun wre yo na mbo,
Fuŋga rɛ, sɛ chiɛlɛ
mblɛ pe nyɛni mu chin,
mbe jaa kuulo tɔɔnri titi,
pre plɛ cha mu pan.
18 A leele pre na kna mbo,
Pe yeeri mbe pe pan nyaanyaa,
mbe paan kuulo tɔɔnri,
mbe wo o na,
mbe sɛ su na yetunyi,
we na yilii o nyiɛlɛ.
19 Leele nyɛni, na julo Jerusalem na na yuu mbo,
o wo kɔ,
a o yiɛ le nyumu titi,
ki fna mbe o yili o tra ŋga nu.
Ŋgi na hin? Pe o chiɛ yire ja.
20 A ndaa kna mna yo chiɛlɛ pre pan na, e kee ŋga o Tafun Nyiɛkpɔɔ wre yuu loo. E ndiile nyaa e kee ŋga ki yilii u nyuu kre loo,
e e bichiɛlɛ nyina,
imi na pie na nyɛni,
mbra kuulo tɔɔnri.
21 O chiɛ nyjɛ o mboe sin,
mu fɛ mu kun yire,
kumu yire yi vromboe nu,
mu le o kro,
na o biile, na o yirifumblɔ,
mblɛ nu faŋga nyi pre kuu lete na.
22 Ti mbe pe loo na,
o Tafun Nyiɛkpɔɔ wre yo na,
gboolo biribiri pie sni,
mbe tra kre yiɛ tɔ,
mbe pe na kra pe nyina lete na.
Pie nyina tra yiɛ na,
na yua pe kun mu wo see lam,
a pe n yi koli.
23 O Tafun Nyiɛkpɔɔ wre yo na,
kachiŋu waa shia u kachindɛ tɛɛ,
mbe uyɛ kpɔɔ,
ndee mbe faŋgafun u faŋga tɛɛ,
mbe uyɛ kpɔɔ.
Pan chɔɔ swafun waa shia,
u swa tɛɛ mbe uyɛ kpɔɔ.
24 Ndro ŋmba u chaa,
mbe uyɛ kpɔɔ kre,
ufun fna mbe yo na u ni chin,
mbe nɔɔ loo ta,
na mi wi Nyiɛkpɔɔ,
ŋmba ni nyɔɔ lewo na.
Na lewo fraka,
mu na kala lii kpra ni kre,
yire kee yire na,
mi Nyiɛkpɔɔ yiɛ shɔ.
Pan mi Nyiɛkpɔɔ wre yo.
25-26 O Tafun Nyiɛkpɔɔ wre yo na, “Nyjila kaa wa na paan mbe ni Egypt, na Judah, na Edom, na Ammon, na Moab, na haalee tablɔ tra kre leele pre ndie tini, pre pe yilai pe sɛɛnlɛ na, mbe pe ndrɛ knumu. Yire waŋgrɛ yire leele krɛrɛ n jawala ni. A pan yire Israel leele pre chɔɔ nyi na, ŋgi na hin? E n li ni nyu nunu ŋga ndaa pe na e ni kre na.”