Nyiɛkpɔɔ Sumɛɛ Na Sɛɛnlɛ Sumɛɛ
Yaashia kooloe nyjɛ
na waŋgrɛ leele tro yire le,
mbe pe twan,
ndee mbe ti sɛmbɛɛrɛ kee,
nyjɛ yi piin nyiɛ yiɛ na,
yire e le fiɛrɛ.
Na waŋgrɛ yire leele yi nya,
fiɛrɛ pe yiri.
3 Paala nyjɛ pre leele pre yii,
kɛshiin yire krɛrɛ,
yi kro pe yirɛ wɛɛ.
Klɔ lam pe shie,
mbe sɛ tiŋge kun,
mbe tɛtɛŋu u tɔɔnrɔ tɛɛ,
mbe ki tɛ.
4 Mbe pe swafiŋge,
na swanyiɛ tɛɛ mbe ki san,
mbe ŋmaa tɛɛ mbe ki kan,
mbe kia gbila mbe to.
5 Pan yi nyi to,
na yira ŋga pe gbeele,
mu tɛɛ see lam,
na yurɛ piɛri kre yi.
Pe sɛɛnlɛ yire wa jaa paara.
Tru pe yi tru na tro,
ŋgi na hin? Yia jaa nyaari.
Kena yaa na yi fiɛ,
yia jaa e pe yaka,
a yia jaa kee chichie ka pe,
mbe e ŋga.
6 O Tafun Nyiɛkpɔɔ,
ŋmbi u da na mu ni hin?
Mu kpɔɔ,
a mu mɛɛ kre,
jaŋgaa wa ki nu.
7 Waŋgrɛ nyjɛ kro ŋunu,
ŋmbi u n fna,
mbe mu ŋga buuro hin?
Ŋu ki fna pe ŋga buuro.
Na mu le,
waŋgrɛ kachimblɛ kro nu,
na pe ŋulo nu kro,
wa n wa mu kpɔɔ mu da,
na mu ni.
8 Pe kro pe jijiele,
a pe n jawala ni.
Sɛɛn wɛɛ nyjɛ pe tɛ tinyi ni,
yire yi pe nyina kala.
9 Pie yiri na swafiŋge ni Spain na,
mbe yiri na swanyiɛ ni,
Uphaz waŋgra nu,
mbe fiireefun yi pe mbe yi san,
mbe pe yonyi mbruku wo,
na nyiɛduu nyjɛ yotumblɔ tin,
tɛɛ mbe yi tɔ.
10 La, o Tafun Nyiɛkpɔɔ,
wre wi Nyiɛkpɔɔ titi.
Wre wi Nyiɛkpɔɔ ŋmba wraa ku,
a wre wi ŋunu,
ŋmba uu wa nyjila kro nu.
Na u krɔ kun tra we seeri,
a waŋgrɛ wa jaa yire,
mbe u krɔkuɔn kre shie.
11 E ti mbe leele pre loo na,
Yire sɛɛnlɛ nyjɛ,
yire ma yira nyjeeri na tra wa,
yie kla mbe fun tra ŋga yiɛ na.
12 O Tafun Nyiɛkpɔɔ wre,
wra u jaŋga tɛɛ mna waŋgra wa.
A u kachindɛ ni,
wra yira kro gbeele,
mna nyjeeri nyaa mu chan.
13 Na u fuu mbe nyumu,
ŋga kii wa nyjeeri kre na tini,
wre u tia tloe na poo nyiɛ yiɛ na,
wre u tia na nyiɛ paan,
mbe kra nyini plipli,
a wre u tia fuflɛ na yilii,
ki lawee na gbuun.
14 Na ki pan ma,
mbe leele jawala fun pe nu,
mbe pe peyɛ cha mbe la,
mbe ki ti nyifɛɛrɛ swanyiɛ fiireefɛɛnlɛ,
mblɛ pe sɛɛnlɛ yire piin kre gbo,
ŋgi na hin?
Pre titi we nya na leele pe fana,
na pe sɛɛnlɛ yire ni,
a ŋmaa n wa yi nu.
15 Yirɛ wɛɛ yi,
a yi kee titɛɛrɛ ni.
Na yi kpra kun nyjila waa da,
kre yie kla mbe fun.
16 La, Israel leele,
mblɛ lɛ Jacob nanae pre,
pe Nyiɛkpɔɔ wre n pe,
na pe sɛɛnlɛ yire yi.
Ŋgi na hin?
Wre u dnunya yira ŋga kro wa.
A wre u Israel leele wɔ,
mu pe wru mu pe u wolo.
Mɛɛ ŋga ni pe u chin yi,
O Tafun Nyiɛkpɔɔ Jaŋgafun.
Klaa Ŋga Ki Paan
17 E e yirɛ koli e yili tra kre nu,
loŋgoolo e tɔ,
mu e fɛ mu kun.
18 Kee ŋga o Tafun Nyiɛkpɔɔ wre yuu yi kre,
Kia mu, mbe ni leele mblɛ ni,
mbe yili tra ŋga nu.
Pie peyɛ cha mbe la,
a pe loŋgo we pe yii,
mbe sɛ waŋgra fɔŋgɔ nu.
19 Jerusalem leele nyɛni na yuu mbo,
Klɛ nyjɛ yi to o na yire n wa,
na tra haa ni,
a ki tia o na kala nyaa.
Na ki nya mu pan ma mu kɔ,
ki fna mbe o oyɛ yii.
20 Pe ni yoŋgo nyuŋgo kre kla,
mu ki mɛnyi nyjɛ yi ki yii,
yire kro knumu.
Pe tia ni biile fɛ mu ni ti,
a ni pe cha mu la,
hali pe wa n wa fuŋgaami,
mbe ni yoŋgo nyuŋgo kre,
yire mbe kan na,
ndee mbe ni ndra lehaa kre,
yire mbe yire na.
21 O loplombo mblɛ lɛ o lefɛɛnlɛ,
pre n jawala ni.
Ŋgi na hin?
Pe n na jawala shio,
o Tafun Nyiɛkpɔɔ wre pan.
A ki tia pia jaa nyu,
a ki tia pe o gbun mu nyina,
na mbaala lɛ.
22 E loo mandiɛ ŋga ki paan?
Gblee badaaŋga ka yiri
nyjeerihaa tra kre nu na paan.
Leele mblɛ pe paan,
na gblee kre ni kre,
pe paan mbe Judah tra chiɛ yire,
kro kaari kajɛɛ, mbe kaari
ŋmbokuŋmboe tnihaa.
Jeremiah Nyiɛtalaa
23 O Tafun Nyiɛkpɔɔ, ni chin na,
lewo ŋmaa n wa u kɛɛ,
a wa jaa chin ŋga kii wa u yiɛ.
24 O Tafun Nyiɛkpɔɔ,
ni fraka imi na ki fna.
La, krɔ ni ma.
Na kre ma mba pe ndro na.
25 Ti mbe mu krɔ kun,
na waŋgrɛ nyjɛ leele pe yo
pia mu sumi, mu mu je pre ni.
Ŋgi na hin?
Pre pe Jacob nanae pre kla,
mu pe dɔɔya poŋgo,
mu u waŋgra kre ja.