Judah Leele Nyiɛkpɔɔ Nyu Nunu Pee Kla
11
Kee ŋga o Tafun Nyiɛkpɔɔ wre na yo mi Jeremiah pan yi kre mbo, 2 “Ni nyu nunu kre kee nyjɛ yii wa ki nu loo, mu yi yo Judah leele, na leele mblɛ pee wa Jerusalem na pre pan. 3 Yo pe pan na kee ŋga o Tafun Nyiɛkpɔɔ Israel Nyiɛkpɔɔ wre yuu yi kre mbo, ‘Ndro ŋmba wa li ni Nyu Nunu kee yire na kre, suŋgɔ we u yii, 4 nyu nunu ŋga ndaa pe na e tolɛɛlɛ ni, nyjila ŋga ni ndaa pe wɔ mna yili Egypt tra nu. Tra ŋga kra pe na kanhun ki nyini fnunu nu kre nu ndaa pe wɔ mu yili.’ Ndaa yo pe pan na pe ndie tɛɛ ni pan, mbe taa kee ŋga mbe yo pe pan kro na. Na pe pe ma, kena pie pe ni leele, mbe ni pe pe Nyiɛkpɔɔ. 5 Na pe pe ma, kena mbe li ni nyu ŋga ndaa yo pe tolɛɛlɛ pan na mbe pe ŋga tra taan kre na. Kre tra kre e ta mu tni aŋga kre.”A ndaa yo na, “O Tafun Nyiɛkpɔɔ, mu kee kre pe kpra.”
6 A O Tafun Nyiɛkpɔɔ wre na yo ni pan mbo, “Yire kee nyjɛ kpali Judah chiɛ yire kro na, na Jerusalem lete na mu tro. Kena ndie tɛɛ ni nyu nunu kee yire na, mu taa yi na. 7 Mu yire nyjila ŋga nu ndaa e tolɛɛlɛ wɔ mna yili Egypt tra nu mu pan mu su aŋga na, pan ni pe jaari nyjila kro nu na yuu pe pan na, pe ndie tɛɛ ni pan. 8 La, pra je, pe nsra ndie tɛɛ ni pan, mna kro na ndikana kee, na sisam nyjɛ pe chaa kro pini. Ndaa yo pe pan na pe li ni nyu nunu na, a pra je, kra tia suŋgɔ na pe yii.”
9 O Tafun Nyiɛkpɔɔ wre na yo ni pan mbo, “Judah na Jerusalem leele nyu nunu ta ni na. 10 Pe ndru mu sɛ taa sisam kee nyjɛ pe tolɛɛlɛ naa piin yire kro. Pra je ni nyu kee na mna sɛ taa sɛɛnlɛ kro na yi sumi. Israel na Judah leele kro punu ni nyu nunu ŋga ndaa pe na pe tolɛɛlɛ ni kre na. 11 Ki tia kee ŋga O Tafun Nyiɛkpɔɔ wre yuu yi kre, Mbe ti mbe kanyana kpɔɔ pe da, a pia fɛntrohaa ta. Pie nyɛni mbe ni yeeri, a mba shɔ pe pan. 12 Na kanyana kre waa pe da, Judah na Jerusalem chiɛ yire leele we sɛ nyɛni mbe wo sɛɛnlɛ nyjɛ na pe shie na tuwe ndiom tɛɛn sroi yire na, a yia shɔ pe pan. 13 Judah leele, imi na e chiɛ nɛɛ, pan sɛɛnlɛ nyjɛ e sumi yire nɛɛ. A imi na Jerusalem lete nɛɛ kre, pan sragbuɛnlɛɛ nyjɛ e sin mu na tuwe ndiom tɛɛn sroi yi na, mu na nyifɛɛrɛ sɛɛn Baal kre kaan kre nɛɛ.
14 Jeremiah, maashia ni tali, ndee mbe yire pe wa jeele na mbe kee ka yo ni pan. Ŋgi na hin? Na kanyana waa pe da, a pe nyɛni mu ni yeeri, mba loo pe pan.”
15 O Tafun Nyiɛkpɔɔ wre na wie mbo,
“Yira ŋgi leele mblɛ ni kori,
pre pini ni Suminyuŋgo
wa hin?
Pe sisam ŋga mu chin
ŋga kro pe.
Yurɛ mblɛ ni pe sra woni,
na ni kaan kre,
wa jaa pe shɔ,
mbe yili pe kanyana nu.
Kena pia ti mbe pe yiɛ shɔ.”
16 O Tafun Nyiɛkpɔɔ wre na yo na,
pan e na nyi na Olive tiŋge,
ŋga na sɛnyi chichiele nyi yi.
La, kia mu mbe ni ti,
mbe leŋunɔ plɛ gble le,
mbe paan tiŋge kre klɛ knumu
mbe wo,
mbe yi koli mbe sɛ le kanhun.
17 Jle gbamm kre, mi e Tafun Nyiɛkpɔɔ Jaŋgafun wre ndaa e luu na tiŋge yi, a mi ni yo na ee kla. Ŋgi na hin? Israel leele na Judah leele le sisam nu, mu sɛ tuwe ndiom tɛɛn sro sɛɛn Baal kre na, mu ni krɔ nyi.
Pe Chaa Mbe Jeremiah Gbo
18 O Tafun Nyiɛkpɔɔ wre na ni nyina kolo ŋga na ni loŋgoolo naa chaa mbe tro na ni ni. 19 Ndaa niyɛ nyjii mna pe ŋga na mbaplɔ pɔlɔ ŋmba pe yii na shie gbohaa wi. Ni n na chin na pe ni jawa na kolo sisaa ka ni. Praa yuu na,
E ti mbe o tiŋge kre kun mbe chan,
mbe ki sɛnyi yire kla.
E ti mbe o u wɔ,
mbe yili lefɛɛnlɛ tra ŋga nu,
mbe ndro wa u mɛɛ sɔɔnri na fio.
20 La, o Tafun Nyiɛkpɔɔ Jaŋgafun,
ŋu mu fraka mu kpra kuun nu,
mu lewo jawala,
na u lɛɛ kee kro chin.
Kena jande fɔlɔ tɔ pe na,
mbe ni ki nya, ŋgi na hin?
Ŋu kɛɛ ni ni kee kro wru mu le.
21 Kena kee ŋga o Tafun Nyiɛkpɔɔ naa yuu mu wru Anathoth leele mblɛ pe mu chaa mbe gbo pre haa yi kre, praa yuu na, “Maa shia o Tafun Nyiɛkpɔɔ mɛɛ tɛɛ mbe kee ka nya mbe yo na, na kre ma oo mu gbo. 22 A kee ŋga o Tafun Nyiɛkpɔɔ Jaŋgafun wre yuu yi na, ‘Mbe pe ndie tini. Pe yirifumblɔ we to ŋunɔ, mbe klo pe bibilɛ, na pe bichiɛlɛ gbo. 23 Mbe Anathoth leele pre kro kla, na ki nyjila kre waa da, mba nunu chom ti pe nu.’”