Jeremiah Na Nyiɛkpɔɔ Wie Kala
12
O Tafun Nyiɛkpɔɔ,ni kee ŋga ni
mbe pan mu yiɛ kpan,
ŋga mu yuu ni pan kro fraka.
Nde ni chaa mbe mu wie kala,
mu wru mu kpralie haa.
Kena yira ŋgi ki tia
sisampefɛɛnlɛ pre,
a pe kee kro na nyɔɔ
na pe kaan ŋga hin?
Yira ŋgi ki tia
mblɛ pe n mu shɔnli kre,
a pe nyu pe tnimu nu ŋga hin?
2 Ŋu mu pe luu, mu tia
pe didinyi kan na tiŋge yi,
mu na lee, na sɛni.
Ki tia mu mɛɛ na la pe nyu na,
a nde mu kee n wa
pe lolonyi nu.
3 O Tafun Nyiɛkpɔɔ,
mu chin imi na ni nyi.
Mu ni jawala pe mu le,
mu wru mu kee na.
Nyiɛkpɔɔ, pe tini mu sɛ,
na pe shie mbɔɔ gbo haa.
Pe yii mu tɛɛ mu sɛ su na,
pe gbo ble we to.
4 Nyjila ŋgi nu tra kre,
na ki nyaa we yua
mbe sɛ su hin?
Ŋgi na hin?
Leele mblɛ pee wa ki na kre,
pe kro, sisampefɛɛnlɛ lɛ.
A hanyiɛlɛ na yurɛ mblɛ,
pee wa ki na kro ku mu kɔ.
A nde leele pree wa
na nyu yuu na,
Nyiɛkpɔɔ wre n na sisam kee,
nyjɛ o pini yire nyaa.
Nyiɛkpɔɔ Na Ki Nyu Wɔ
5 A o Tafun Nyiɛkpɔɔ wre na kna mbo,
Jeremiah,
na ŋu na leele fɛ jele na,
a mu fna mu pra,
kena mu jaa fɛ na soolo ni ra?
Na mu nyaari lawee gbeŋglen nu,
mu gbro mu to,
a na maa le
Jordan lɔɔ klɔ kpɔɔ kre nu,
mni mu pe hin?
6 Mu lo biile na ŋu titi sele leele,
mu wɔ mu ŋga.
Pe gble le mu leele yeeri,
a pe yiri mu mu taan.
Pe paaraa tna,
nde maa dankna pe na.
7 O Tafun Nyiɛkpɔɔ wre yo mbo,
Mbe yili ni leele pre nu.
Mbe mi titi leele pre je.
Ni wolo mblɛ ni kori kre,
mbe pe wɔ,
mbe le pe loŋgoolo kɛɛ.
8 Mi titi leele mblɛ ni wɔ pre,
jlo ni na, na jiraa wa klɔ nu.
Pe jlo ni na,
a ki tia pe kee ni bin.
9 Mi titi leele mblɛ ni wɔ,
pre pan ni na,
na kpanyuu ŋmba ŋmbilɛ pe pan,
mu u fɛ mu kun,
na wii na u ni wi.
Kena ti mbe nyaalam yurɛ sisɛɛ
pre yili,
mbe paan mi titi leele pre yii,
mbe ka.
10 Tra ka ŋulo we pan,
mbe ni tre seele yire kla,
mbe ni seele taanla,
pie ti mbe ni tra taan,
kre sni waara gbeŋglen.
11 Pie tra kre kla mbe ki sni waara,
yaka wa jaa pe ki na ni yiɛ na,
ŋgi na hin?
Ndro kee ka ma na ki ni.
12 Ŋunɔwifɛɛnlɛ tataara we paan,
tro tablɔ nyambie tra kre nu,
mbe sɛ su ki nyu na.
Mi ni pe tun na brɔfiɛn yiɛshiin ni,
a e wa wa shɔ pe kɛɛ.
13 Ni leele pre we shɔlɔ luu,
la, pe seele yire we kaari
wuuro bri.
Pie fna mbe tnumu tun waara,
pia yaka ta.
Nyifɛɛrɛ we pe gbo,
na pe n yaka ta mu kun,
ŋga mi, pe Tafun Nyiɛkpɔɔ
wre krɔ ki kun,
na pe ni mu tro, kre ndra na.
14 Kee ŋga o Tafun Nyiɛkpɔɔ wre yuu yi kre mbo, “Israel leele tnifɛɛnlɛ sisampefɛɛnlɛ mblɛ pe krɔyira ŋga ni pe ŋga kre shɔ pe pan jaŋga na kre, na pe waa ndru mu sɛ pre titi tra nu kre, mbe pe kɔ mbe wa, mbe Judah leele shɔ pe kɛɛ. 15 La, na mbaa pe kɔ pe waŋgrɛ yire nu kre, mbe kɔɔ pe fooro le, mbe ndru mbe pan na pe ni pe waŋgrɛ yire nu na. 16 Pre pra ni leele pre nyina kolo a praa dani na sɛɛn Baal mɛɛ ni, kena na pe waa ni sumiɛ kolo twan ni leele pre pan chiriri, mbe ni mɛɛ tɛɛ mbra dani mbra yuu na, ‘Ŋga o Tafun Nyiɛkpɔɔ wree wa ŋga wala.’ Kena mbe pre leele pre wru mbe pe ni leele na. 17 A la, na waŋgrɛ yire ka leele nsra ndie tɛɛ ni pan kre, mbe kre waŋgra kre kɔ mbe wa, mbe ki kla.” Pan mi, e Tafun Nyiɛkpɔɔ wre yo.