Jeremiah Greree Fiŋge
13
Ki ble ka, o Tafun Nyiɛkpɔɔ wre na yo ni pan mbo, “Jeremiah, sɛ greree fiŋge cha mu lɔ, mu ki tɛɛ mu grere, la, maa shia ti mbe nyumu da ki na.” 2 Ki tia ndaa sɛ ka lɔ, mna ki tɛɛ mu grere, imi na o Tafun Nyiɛkpɔɔ wre na yo ni pan kre.3 A o Tafun Nyiɛkpɔɔ wre na ndru mu yo ni pan shiinwo, mbo, 4 “Sɛ Euphrates lɔɔ kre mbɛɛ na mu sɛ greree kre ndra dnɛ wee ka nu wa.” 5 A ndaa sɛ ki saan mna sɛ ki ndra Euphrates lɔɔ kre mbɛɛ na, imi na o Tafun Nyiɛkpɔɔ na yo ni pan kre.
6 Ble tataara yɛ kɔkro kre, a o Tafun Nyiɛkpɔɔ wre na ndru mna yo ni pan mbo, “sɛ Euphrates lɔɔ kre mbɛɛ na mu sɛ mu greree ŋga ndaa tia mna sɛ ndra dnɛ wee nu kre wɔ.” 7 A ndaa sɛ Euphrates lɔɔ kre mbɛɛ na wa, mna sɛ greree kre tuu mu ki wɔ mna ndaa ki ndra kre. Ŋga ndaa ki wɔ kre na kla, kia jaa yaka pe na.
8 A o Tafun Nyiɛkpɔɔ wre na yo ni pan mbo, 9 “Kee ŋga ni yuu yi kre, imi na greree ŋga kla ŋga, pan chɔɔ mbe ti mbe Judah na Jerusalem yɛkpɔɔmu sisaa kre kla. 10 Pre sisampefɛɛnlɛ ndikambla mblɛ pe je, na pia ndie tɛɛ ni kee na, mu sɛɛnlɛ kɔŋgɔ ni, na shie na yi sumi. Pan pie pe na kre greree ŋga yi, a mba jaa pe tɛɛ mbe yaka pe mbe ki nyu. 11 Imi na blɔ greree poo u sɛlɛ mbe ki yire kimkim kre, pan ni chaa mbe Israel, na Judah leele pre pɔ mbe mbra niyɛ na kimkim, mbe pe pe ni wolo, mbe leele naa ni kaan mɛɛ na buuro. La, pe je, a pe n ndie tɛɛ.”
Simi Le Yira Kre
12 “Jeremiah, mi mu Tafun Israel Nyiɛkpɔɔ wre yo na, mu yo pe pan na, kee ŋga ni yuu yi kre, ‘E simi le e simi le yirɛ nyjɛ yii wa e pan kro nu mbe yi nyi.’ Na mu ki yo pe pan, pie yo na, ‘O ki chin na pan ki fna mbe o simi le o simi le yirɛ nu mbe yi nyi.’ 13 Na pe waa yo ma, mbe mu yo pe pan na, ‘Kee ŋga o Tafun Nyiɛkpɔɔ wre yuu yi kre, ni paan mbe ti ndro ŋmba uu wa tra ŋga nu kro kaari gbɔgbɔɔ, hali Ŋunu David nanae mblɛ pie paan jɔɔn li kre, na pe srawɔfɛɛnlɛ pre, na pe keenyanyofɛɛnlɛ, na mblɛ pee wa mu tni Jerusalem na kro, pie kaari gbɔgbɔɔlɔ na. 14 Mbe pe gbun peyɛ na mbe juari na chɔ yi. Pe lɛɛlɛ, na pe biile kro, mba kna mbe pe wa le, a wre wa kru ni na, a fooro wa ti mbe ni pe klaa ti. Pan mi e Tafun Nyiɛkpɔɔ wre yo.’”
Pie Judah Leele Yii Mbe Sɛ
15 Israel leele,
e ndie tɛɛ e loo chichie,
yaashia eyɛ kpɔɔ,
mbe yaa kee kre loo.
O Tafun Nyiɛkpɔɔ wre u paara kre.
16 E e Tafun Nyiɛkpɔɔ,
wre ŋga u yɛnyiŋge,
na kre ma, we ti lawee wɔ e na.
Na e nyaari,
mbe e na gbroi,
nyambie yire na.
Nyisee e jawa na ee na nya,
la, wɔmu kprikpri ŋga ka,
e n da mu nya tun ee nya.
17 La, na e je a e n ndie tɛɛ,
eyɛ kpɔɔmu kre ndra na,
kie ti mbe ni ndra mbe nyɛni.
Mbe nyɛni chichie,
mbe yotunyi ni yɔɔ.
Ŋgi ndra na hin?
Pie pan mbe mi e Tafun
Nyiɛkpɔɔ wre leele pre yii.
18 Jeremiah,
yo ŋunu na u lo pan na,
pe yiri pe ŋujuɛn yire na.
Pe ŋujuulee chichiele yire
laala mu to.
19 Pe chiɛ nyjɛ yii wa,
na shie tapan haa,
tablɔ tra nu yire fɛ mbe kun,
ndro wa jaa yili,
ndee mbe paan le chiɛ yire na.
Pie Judah leele kro yii mbe sɛ.
20 Jerusalem leele, e yiɛ yire,
e e loŋgoolo mblɛ pe yiri,
nyjeeri haa wa na paan pre le.
Sena leele mblɛ pe le e kɛɛ,
a e na eyɛ lii na pe ni
pre nyi hin?
21 Na mi e Tafun Nyiɛkpɔɔ,
wre waa tia leele mblɛ,
e na yo na e nɔɔlɔ lɛ pre,
waa na jaŋga lii e na,
mni ee yo hin?
Kie e yaa na chlɔ lɛɛ ta,
na chaa mbe se.
22 A ee kna mbra eyɛ wie na,
“Yira ŋgi ki pan na yire kee,
nyjɛ krɛrɛ ni o na ŋga hin?”
Kee ŋga ki pan na ki ni yi,
e sisam tataara nyjɛ e pe yire.
Kre ki tia pe e yonyi tini,
mu wla e na,
mu e pe imi na pe chaa kre.
23 Lewo ŋmba u yiri Ethiopia na,
we jaa u wejikaara chinɛ ra?
Ndee e da mu kajinyurɔ,
ŋmba u n kaanri nya tuun?
Lewo ŋmba u peere kre,
ma jaa u fraka mbe ki nyu.
24 Mbe e gbun mbe nyina,
na yirɛ fue
nyjɛ tablɔ lawee fuflɛ,
wru mu nyina yi.
25 E kɔlɔ yi kre,
pan mi e Tafun Nyiɛkpɔɔ,
wre yo e pan.
Ŋgi ndra na hin?
E mi Nyiɛkpɔɔ wre fɛɛ,
mu e dankna kro wru,
mu taa sɛɛnlɛ na.
26 Mbe e yonyi tini,
mbe laala e na,
mbe leele e fɛɛrɛ nya.
27 Ni afuŋgo kee
nyjɛ e pini yire nya,
sɛɛnlɛ nyjɛ na e shie
nyambie lawee,
na lawee lawee nu yire kro,
ni yi nya.
Jerusalem leele, e atɛ.
Nyjila ŋgi nu ee yili,
yire nɛɛrɛ kee yire nu wo?