Wam Na Klo Na Ŋunɔ
14
O Tafun Nyiɛkpɔɔ na wam ŋga kie yire kee yo Jeremiah pan, mbe u ki yo leele pre pan.2 Judah na Jerusalem leele nyɛni,
a pe plɛ na fooro lii,
na nyɛni na shɔfun chaa.
3 Ki jaŋgafɛɛnlɛ pe sumifɛɛnlɛ tun,
nyumu pan,
a pe sɛ pe kɔlɔe nu,
mu sɛ nyumu cha mu la,
mu ndru mu sɛ katoo,
na yirɛ wɛɛ ni.
Ki tia pe kaanhaa kɔ,
a sra wɔ pe na,
a nyifɛɛrɛ tia pra yiɛ ndra.
4 Tra kre yua mu yɔɔlɛ kro,
ŋgi na hin?
Nyiɛ n na paan tra kre nu.
Ki tia falifɛɛnlɛ dankna kɔ,
a pra yiɛ ndra.
5 Hali kafaala kuraa
pe biile fiɛnfiɛn je,
ŋgi na hin?
Nyaa n wa mbe pe ta mbe ka.
6 Nyaalam bubunlɔɔ wa mu yire,
nyambie wɛɛ ndrɛ na,
na mana waa na,
nyaa nyinyi ndiom wru.
Ŋga pe nyaa cha mu la kahaa,
kre ndra na,
ki tia yiɛ na woo pe na,
a pe n na nyaa chiriri.
7 Ni leele pre nyɛni na ni yeeri mbo,
O sisam tia o pimi li.
Kena jande, mu mɛɛ kre le,
mu kee ka pe mu o ŋga,
Ŋgi ndra na hin?
O fɛ mu laa mu na,
ki tia o sisam pe kpɔɔ,
mu mu taan.
8 Ŋu chiin na Israel leele kaan.
Na kanyana kpɔɔ pe da,
ŋu wi pe shɔfun.
Mni a mu pe na fuŋu wi,
tra ŋga nu hin?
Mu pe o pan na kolo kunfun,
ŋmba u lee,
na nyiŋge se, mbe wra shie wi.
9 Mni a mu muyɛ pe na lewo,
ŋmba kala fo wi ŋga hin?
Mu muyɛ pe na ŋunɔwifun,
ŋmba kɛ ki gblɛ wi.
O Tafun Nyiɛkpɔɔ,
o chin na muu wa o lalaa,
a mu mɛɛ ki taa o na,
kena maa o wa.
10 Kee ŋga o Tafun Nyiɛkpɔɔ wre yo,
mu tro u leele pre haa yi kre,
Pe lam kee yi na,
pie fɛ mbe laa,
mbe pia mbra ni na.
Ki tia mi pe Tafun Nyiɛkpɔɔ,
wre pe je,
sisam kee nyjɛ pe piin kre,
yire chiin mbe na sɔɔnri,
a mbe pe ndie tini yi ndra na.
11 O Tafun Nyiɛkpɔɔ wre na yo ni pan mbo, “Jeremiah, maa shia chichie tali mbe pre leele mblɛ ŋga. 12 Pie ble fun mbe nyɛni mbe ni yeeri, a mba loo pe pan. Pie yurɛ sroo sra wɔ, mbe shɔlɔ sra wɔ mbe ni ŋga, mba kna kuraa mbe pe le. La, mbe pe kla ŋunɔ, na klo, na yira sisaa ni.”
13 A ndaa kna mna yo na, “O Tafun Nyiɛkpɔɔ Jaŋgafun, mu keenyanyofɛɛnlɛ pre na kro na yuu pe pan na ‘Yaa ŋunɔ nya e nu, a klo wa e gbo, la, wejinyiŋge nu pie tni.’”
14 A o Tafun Nyiɛkpɔɔ wre na kna mna yo ni pan mbo, “Pre keenyanyofɛɛnlɛ pre, ni mɛɛ ni praa kala fnɛ. Ni n pe wa tun, a ni n pe wa wɔ, a ni n paara pe wa pan. Kafinɛ kee biribiri pe nyaa na yuu e pan. 15 Kena kee ŋga ni ta mbe yo pre keenyanyofɛɛnlɛ mblɛ pe yo na ni mɛɛ ni pe kee nyaa na yuu e pan kre pan yi kre, mi ma ni pe tun na pe sɛ yo e pan na, ‘Brɔfiɛn wa le e nu, ndee klo wa to tra kre nu.’ Pre keenyanyofɛɛnlɛ pre chɔɔ we ku brɔfiɛn yiɛshiin, na klo kɛɛ. 16 A leele mblɛ pan pe yire kee yire nyaa na yuu kre, brɔfiɛn yiɛshiin, na klo kɛɛ pie ku mbe sni Jerusalem lete na, a pia leele ta mbe pe pe gboolo wru mbe sɛ le, pre na pe bibilɛ, na pe bichiɛlɛ kro. Mbe pe sisam yire fɔlɔ tɔ pe na.”
17 O Tafun Nyiɛkpɔɔ wre na yo ni pan na ni paara leele pre pan mbe pe nyina imi na fooro ni yii mu da. A ndaa yo pe pan na,
Yotunyi ni fuu lafo na blee,
hali mba jaa nyɛnɛɛ ti,
ŋgi na hin? Mi titi leele pre,
kanyana kpɔɔ titi to pe na.
18 Na ni yili mu sɛ seele nu,
mblɛ pe to ŋunɔ kre,
gboolo biribiri ni nyaa wa.
A na ni le kakpɔɛ yire na,
pe mblɛ klo gbo mu wo,
pre gboolo ni nyaa.
A pe keenyanyofɛɛnlɛ,
na pe srawɔfɛɛnlɛ kro,
pre wa na pe tnumu tuni,
a pe n chin ŋga ki pini.
19 A ndaa o Tafun Nyiɛkpɔɔ
wre wie na,
Kena mu Judah leele je,
a ma da pe na na ra?
A mu Jerusalem leele pre fun ra?
Mni a mu tia klɛ to o na,
a yia jaa tra hin?
O jawa na oo na wejinyiŋge ta,
a o n kee chichie ka nya.
O le na mu na o tra,
la, fiɛrɛ kee bribri o nyaa.
20 O Tafun Nyiɛkpɔɔ,
o o sisaa nyjɛ o pe yire nya.
A o pimi ŋga o tolɛɛlɛ pre na li
kre nya,
wre titi chin na,
o sisam pe mu na titi.
21 Jande, mu mɛɛ kre saara na,
maa o je,
a maa ti mbe nyifɛɛrɛ mu kakpɔɔ,
ŋga na mu ŋujɔɔn,
chichie titi nyi kre gbo.
Jande, nyu nunu ŋga,
mna pe na o ni kre sɔɔnri,
mbe ma ki kla.
22 Nyiɛkpɔɔ, waŋgrɛ nyjɛ
sɛɛnlɛ wɛɛ yire,
yia jaa ti mbe nyiɛ pan.
A nyiɛ wa jaa yiri nyjeeri,
mbe wo ki yɛ.
Kia jaa pe ma,
fɔna ki yiri ŋu,
o Tafun Nyiɛkpɔɔ wre pan.
Kena ŋu na o kaan, ŋgi na hin?
Ŋu mu tia yire kee
nyjɛ krɛrɛ na piin.