Judah Leele We Ku
15
A O Tafun Nyiɛkpɔɔ wre na kna mna yo ni pan mbo, “Hali na e tolɛɛlɛ Moses na Samuel naa wa mu yire ni yiɛ aŋga ble ŋga nu, na tali na e kaan kuraa kre, mba na e fooro le. Kena pe ni, mbe pe flo ni yiɛ mbe sɛ. 2 Na pe waa mu wie na, sena oo sɛ hin? Yo pe pan na, kee ŋga o Tafun Nyiɛkpɔɔ wre yo yi kre, mbo,‘Yira kie e plɛ gbo,
mbe e plɛ ku brɔfiɛn
yiɛshiin nyu na ŋunɔ,
mbe klo e plɛ gbo,
mbe pe e plɛ yii,
mbe sɛ na e ni
waŋgra fɔŋgɔ nu.’
3 Yirɛ jijirɛ ni mi Nyiɛkpɔɔ we e ndie tini. Plɛ we ku ŋunɔ brɔfiɛn yiɛshiin nyu na, mbe nyikaanla pe gboolo ka, mbe hanyiɛlɛ plɛ kaara li, mbe nyaalam yurɛ plɛ ka putuu. Pan mi Nyiɛkpɔɔ yo. 4 Kee nyjɛ Judah ŋunu Hezekiah biblɔ Manasseh wre na pe Jerusalem na yire ndra na, mbe ti mbe pe kaari kpɔli yira tra ŋga leele kro pan.
5 Jerusalem leele,
ŋmbi we e fooro le wo?
Ŋmbi we nyɛni mbe e ŋga hin?
A ŋmbi we yire e jaara,
mbe wie na mni e nyi hin?
6 E mi e Tafun Nyiɛkpɔɔ wre je,
pan ni yo.
E krɔ kna mu wa ni na.
Mbe kɛ wa mbe e yii mbe e kla,
ŋgi na hin?
E fooro n wa ni na na.
7 Mbe e fɔ mbe wo,
e kakpɔɛ yire jlonwee nyu na,
na fuflɛ yua kpakpɛɛ wru.
Fooro kie ni leele pre gbo,
ŋgi na hin?
Pe n pe jawala chinɛ.
8 Mbe ti mbe pe lekuchiɛlɛ nɛɛ,
mbe wɛ epo nyu tanyiɛ na.
Lafo chrichri na
mbe ti pe yirifumblɔ ku,
mbe ki ti pe loolo fooro li
mbe ku.
9 Kre ble kre,
biile kɔɔnashin lo we foli,
mbe to mbra jirei.
Ble we wɔ u yiɛ na lafo chrichri na.
Ndro kro we u le fiɛɛn,
mbe nyifɛɛrɛ u gbo.
Pe mblɛ pie kro pe nu pre,
mbe ni ti,
mbe pe loŋgoolo paan pe gbo.
Pan mi e Tafun Nyiɛkpɔɔ wre yo.”
Jeremiah Taan Nyiɛkpɔɔ Na
10 Ni lo atɛ na wra ni se,
yira ŋgi kra tia mna ni se,
mu pan tra ŋga nu kuraa
kple wo?
Ni n ndro jin swa,
a ni n swa jin ndro pan,
nde ndro ŋmba we ni nya kpan
ni suni.
11 A o Tafun Nyiɛkpɔɔ na kna mbo,
“Mbe yila kala na mbe mu shɔ.
Kanyana nyjila nu, mbe ti,
mbe mu loŋgoolo paan,
na tali na mu ya pe na.
12 Imi lewo wa jaa tɔɔnrɔ,
na swafre, ŋga pe chaa,
yii mbe ki peeri kre,
pan chɔɔ yaa loŋgoolo,
mblɛ pe yiri nyjeeri haa wa,
mbe pan kre ja.
13 E sisam ndra na,
mbe ti mbe pe e yirɛ kro foolo,
e tra kre nu mbe sɛ.
14 Ni krɔ ŋga ki kun,
sisaa kre ndra na,
mbe ti mbe e loŋgoolo e yii,
mbe sɛ waŋgra ŋga
e n chin nu.”
15 A ndaa yo na,
“O Tafun Nyiɛkpɔɔ,
mu ni nɔɔ loo rɔ,
kena ni sɔɔnri mu ya ni na.
Ti mbe ni jaa fɔlɔ tɔ,
mblɛ pe ni pra kre na.
Jande, maa frɔ ta pe na,
mbe pe ni ta mbe gbo.
Sɔɔnri na ŋu ndra na pe yila,
na ni tɛɛlɛ.
16 O Tafun Nyiɛkpɔɔ Jaŋgafun,
ŋga mi Jeremiah
na mu kee kre loo kre,
ndaa li ki na, a kra tna ni pan,
mna tia ni yiɛ na shɔ.
Ŋgi na hin? Mu wo wi mi.
17 Ni n niyɛ wru,
mu taa leele mblɛ pe peyɛ lii,
na yɛshɔɔrɔ kee piin pre na.
Ndaa niyɛ kun mu tni mi nunu,
ŋgi na hin? Mu kɛ naa wa ni na,
a kra tia ni krɔ na kun,
kee nyjɛ praa piin yire na.
18 Ŋgi ki tia ni kanyana nyu,
wa jaa to,
a ni kro na fooro lii ŋga hin?
Maa shia ni fana,
na ndro sɛ nyumu cha,
mu la lafolo nu kowam nu.”
19 A o Tafun Nyiɛkpɔɔ wre na yo mbo,
“Na mu mu jawala chinɛ wala,
mbe ndruu ti mu pe na mu fa yi,
mbraa ni kee yuu na.
Na mu na kewɛɛ yoo ti,
mbraa kee chiriri yuu,
mu na ndru,
mbra pe ni keenyanyofun.
A Judah leele pre wra ndru,
mbe pan mu pan,
ŋu ma mu na sɛ pe pan.
20 Mbe ti mbe mu sheli na mboo,
ŋga pe swafre tɛɛ mu sin yi.
Leele pre we wi na mu ni,
la, pia mu ja.
Ŋgi na hin? Nii wa mu kro,
mbe mu shɔ pe kɛɛ.
Pan mi, mu Tafun
Nyiɛkpɔɔ wre yo.”
21 “Mbe mu shɔ mbe yili,
sisampefɛɛnlɛ ndra shelifɛɛnlɛ,
pre kɛɛ.
Pan mi, mu Tafun
Nyiɛkpɔɔ wre yo.”