5 Mi e Tafun Nyiɛkpɔɔ wre yuu na, maa shia le katoo ŋga nu pe kumu sro pe nu. Maa shia sɛ nyɛni ndee mbe ndro bre, ŋgi na hin? Ni dwamu, na ni koroo, na ni fooro chiɛn kro kɔ pe nu. Mi e Tafun Nyiɛkpɔɔ wre ni ki yo. 6 Pe swafɛɛnlɛ na pe shianfɛɛnlɛ kro we ku kre tra ŋga nu. Ndro wa pe le, a ndro wa pe nyɛni. Ndro wa uyɛ kun na yaka ni, a ndro wa u ndra klu na kumu u piin. 7 Ŋmba we na kumu piin kre wa ndro nya mbe u paan u ŋga sro, ndee mbe u bre. Hali ŋmba lɛ ndee ŋmba lo we ku kre, wa ndro ta ŋmba we ufun ŋga simi mbe u tɛɛ mbe uyɛ bre.

8 Katoo ŋga nu pie na lii, mbra gboo, mbra yɛshɔɔrɔ kee piin kre, maa shia le wa mbe tni, mbaa yo lii mu li, ndee mbe simi gbɔ wa. 9 Kee ŋga mi e Tafun Israel Nyiɛkpɔɔ wre yuu yi na, mu nyjila ŋga nu, na mu yiɛ ŋga na, mbe ti pre Judah leele pre yɛshɔɔrɔ kpɔɔ gblee yire nyu to. A ndro wa bijaala na pe pilɛ gblee loo wa na.

10 Na maa yire kee nyjɛ yo pe pan, pie mu wie na yira ŋgi ki tia o Tafun Nyiɛkpɔɔ wre na chaa mbe yire kanyana nyjɛ nyini o nya ŋga hin? Punɔɔ ŋgi o punu ma hin? A Sisaa ŋgi nyini o pe mu u taan ma hin? 11 Na pe waa mu wie ma kre, mbe mu yo pe pan na, ŋga pe tolɛɛlɛ na ni je mna sɛ taa sɛɛnlɛ kro, na yi sumi kre ki tia. Pra ni je, a pe nsra taa ni mbra yire na. Pan mi pe Tafun Nyiɛkpɔɔ wre yo. 12 A yire sisam kepele ndru mu kna mu wɛ kee nyjɛ e tolɛɛlɛ na pe yire na. E kro nya imi na e laa ni kro, mu kna mu taa ndikana kee nyjɛ e lolonyi chaa yire na. 13 Ki tia ni paan mbe e ni mbe yili kre tra ŋga nu, mbe sɛ na e ni waŋgra ŋga yire na e tolɛɛlɛ pre n chin nu. Bawa ee sɛ na sɛɛnlɛ sumi lafo na blee, ŋgi na hin? Ni kee ka ma na e ni.

14 La, kee ŋga mi e Tafun Nyiɛkpɔɔ wre yuu yi kre, “Nyjila kaa wa na paan, leele wa mi Nyiɛkpɔɔ ŋmba nii wa wre mɛɛ tɛɛ mbe da, a pia na yuu na mi ndaa Israel leele wɔ mna yili Egypt tra nu. 15 La, nyjila ka we kɔɔ da na, mbe praa dani na mi Nyiɛkpɔɔ mɛɛ ni, mbraa yuu na mi Nyiɛkpɔɔ ŋmba nii wa wre ndaa Israel leele wɔ mna yili nyjeeri haa waŋgrɛ nyjɛ nu ndaa pe gbun mu nyina yire nu, mu ndru mu pan na pe ni tra ŋga ndaa pe tolɛɛlɛ ŋga kre nu.

16 Fuŋgaami ŋga, kee ŋga mi e Tafun Nyiɛkpɔɔ wre yuu yi na, mbe ti mbe pe loŋgoolo tataara sɛ pe yii na mbroe pe woni lɔɔ, pie kila mbe pe haa cha nyuɛ na dnɛ weele nyjɛ mu chin ŋga kro nu. 17 Mi Nyiɛkpɔɔ, ni yiɛ wa kooloe nyjɛ na pe troi kro na, pia jaa ndra ni na, a pe sisam wa jaa fun ni yiɛ na. 18 Mbe pe ndra shelee, na pe sisam kee nyjɛ pe pini yire, mbe yi fɔlɔ tɔ pe na gbee shiin. Ŋgi na hin? Pe ni tra kre tɔ nɛɛrɛ ni na pe sɛɛnlɛ nyjɛ nu ŋmaa n wa yire ni. Pe pan na pe afuŋgo sɛɛnlɛ yire ni mu ni tra kre nyi.”

21 A o Tafun Nyiɛkpɔɔ wre na kna mbo,