Nyiɛkpɔɔ We Judah Ndie Tini
17
O Tafun Nyiɛkpɔɔ na yo Judah leele pre pan mbo,“Pe tɔɔnrɔ tɛɛ mu e sisam yire,
kro kaanri mu wo e lolonyi na,
mu yi nyunɔ mu wo,
e sragbuɛnlɛɛ yire lawee,
nyjɛ yi yiri chom chom,
na nyamblɛ yi yire na.
2 Nyjila kro nu pre na pe biile,
naa pe sragbuɛnlɛɛ yire,
na sɛɛn chlɔ Asherah kɛɛn,
nyjɛ praa kani yire,
na tinyi wrɛ vuu,
nyjɛ yiraa wa nyambie ndrɛ na,
yire sɔɔnri na yɛ pini.
3 Sisam kee nyjɛ e piin,
yire ndra na,
mbe ti mbe e loŋgoolo e yirɛ,
nyjɛ na e kaan yire foolo,
nyambie nyjɛ na e shie,
na sɛɛnlɛ sumi yire na.
4 Yire titi kepele kie ti,
mbe tra ŋga ndaa e ŋga,
na krɔyira yi kre yili e kɛɛ.
Mbe ti loŋgoolo e yii tinlɛ,
mbe sɛ na e ni tra,
ŋga e n chin nu,
ŋgi na hin? E tia ni krɔ kun,
a ki n wa na nyjii haa ni.”
5 Kee ŋga o Tafun Nyiɛkpɔɔ wre yuu yi na,
Ndro ŋmba u kaan lewo na,
na ŋmba u uyɛ wru,
mu taa lewo,
na nyjuro faŋga na,
na ŋmba u laa
Nyiɛkpɔɔ wre na kre,
suŋgɔ we u yii.
6 Pan ufun we pe na nyaa,
ŋga kii wa tablɔ tra nu yi,
na ndro kro nyɔɔ,
wre wa nyu.
Pan u nyi na tablɔ tra,
ŋga nu weŋge nyi yi,
a yaka wa jaa nyu ki nu.
7 La, lewo ŋmba u uyɛ wru mu taa,
o Tafun Nyiɛkpɔɔ wre na,
mu na kaan u na,
wre wo yi dwamu.
8 Ufun wre we pe na tiŋge,
ŋga pe luu lɔɔ mbɛɛ na yi,
a ki didinyi sɛ kan nyumu nu.
Na ndramwrɛm pan,
ki kee ka ma,
ki wrɛ wa yua ki na fio.
Na wam yire, ki n chin,
a sɛnyi na la ki na fio.
9 Lewo loloŋgo pe yira,
ŋga ki ndro fana,
mu wɛ yira kro na,
a ki chinɛɛ sheli.
Lewo ŋmbi we jaa
ŋga kii wa ki nu chin hin?
10 Mi Nyiɛkpɔɔ ni lewo loloŋgo le,
mbe u jawala lam le,
mbe chin ŋga kii wa ki nu.
A mi ni lewo kepele le,
na u kaan fɔtɔɔrɔ imi na ki fna.
11 Ndro ŋmba u tro,
kolo fɔɔn na mu uyɛ ta kre,
pan u nyi na hanyini,
ŋmba u chrɛwɛ,
nyjɛ yi n pe u wee kru.
Na waa da u yirifum nyjila,
yaka wa pe u kɛɛ.
A kre nyjila kre we kaari jijuo.
Jeremiah Nyiɛkpɔɔ Tali
12 O Tafun Nyiɛkpɔɔ, muu wa,
mu tni mu yɛnyiŋge ŋujɔɔn na,
mu Suminyuŋgo wa,
mu yire yira kro nɔɔhle nyjila,
a kre lawee kre nu,
oo jaa mu sumi.
13 O Tafun Nyiɛkpɔɔ,
ŋmba na Israel leele kaan,
leele mblɛ pe mu je kre kro,
nyifɛɛrɛ we pe gbo.
Mblɛ pie laa mu kro pre,
we fun na leele mblɛ mɛɛ,
pe nyunɔ tablɔ nu yi.
Ŋgi na hin? Ki yire,
ŋga pe pe Tafun Nyiɛkpɔɔ je,
ŋmba pan ŋmaa nyumu yilii,
na paan wre ndra na.
14 O Tafun Nyiɛkpɔɔ,
na mu ni tra, kre mbe saanla,
a na mu ni shɔ,
kre mbe ŋmaa shɔmu ta,
ŋgi na hin?
Ŋu chiin ni kaan mɛɛ.
15 Pe kro mu na yuu ni pan mbo,
kee ŋga Nyiɛkpɔɔ yo we pe kre,
sena ki nyi hin?
U ki pe mbe o nya fuŋgaami.
16 Mu yire ŋga mu ni wɔ,
mu leele lefun kre,
ni n fɛ mu pe wa tun,
a ni n da mu sisaa kee jawa,
na ki pe da tun.
Ni kee nyjɛ ni yuu kro,
mu yi chin.
17 Maa ti mbe fiɛrɛ ni yii,
na kala ni da,
ŋu wi ni fɛnkaarifun.
18 Ti mbe nyifɛɛrɛ,
mblɛ pe ni chaa kala ni,
pre gbo,
la, mbe mu ni wɔ,
mbe yili yɛkuuro kee nu.
Ti mbe fiɛrɛ kpɔɔ wo pe na,
la, mi wɔ mu yili ki nu.
Ti mbe pe kla ble da,
mbe mu pe kla mbe ki pe yaa.
E Wuuble Kre Pe Cheche
19 Kee ŋga o Tafun Nyiɛkpɔɔ wre yuu yi kre mbo, “Jeremiah, sɛ yire leele pre jlonwee nyu ŋga na Judah ŋunu wre lee na yilii kre na, kre na Jerusalem jlonwee hɛnyi yire kro na, 20 mu yo pe pan na, ‘Judah ŋulo, na ki leele, na Jerusalem leele mblɛ e tro yire jlonwee nyjɛ nu kre, e loo.’ 21 Kee ŋga o Tafun Nyiɛkpɔɔ wre yuu yi kre, mbo, ‘E dɔɔ ta na wa wa tuuro tio Wuuble, ndee mbe tuuro tio mbe tro Jerusalem jlonwee yire ka nu Wuuble. 22 Ndro waashia tuuro tio mbe yili u katoo, ndee mbe tnumu ka nyini tun, Wuuble. Ki fna mbe e Wuuble kre pe cheche, imi na ndaa ki yo e tolɛɛlɛ pan kre. 23 E tolɛɛlɛ pre n sra ndie tɛɛ kee ŋga ndaa yo pe pan kre na. Pe ndie na kan, a pe nsra yire a ndaa pe pɔɔri.
24 La, na yire dɔɔta mu li ni kee na, a e n tuuro tio mu tro jlonwee nyu yire na Wuuble, mu ble kre pe cheche, a e n tnumu ka na ki nyini tun kre, 25 mbe ti mbe ŋulo yiri e nu, mbe paan tni e tolɛɛ Ŋunu David ŋujɔɔn kre na, mbe nyaari mbe tro kakpɔɔ kre jlonwee yire nu, pre na pe loplombo ni. Pre na pe loplombo pre we soolo, na sookɛɛ nduu, mbe Judah na Jerusalem leele taa pe kro, mbe leele nɛɛ kakpɔɔ kre na nyjila kro nu. 26 Na ki pe ma, leele we na yilii Judah chiɛ yire, na Jerusalem kabɛɛlɛ yire na, na Benjamin tra nu, na nyambie lawee nyjɛ yii wa na shie yila tohaa kre nu, na tablɔ tra ŋga kii wa na shie tapan haa kre nu, mbe pan na pe yurɛ sroo sra wolo, na sra wɔ yirɛ, na shɔlɔ sra, na tuwe ndiom tɛɛn ni, na mboo ŋgaa sra yirɛ ni o Tafun Nyiɛkpɔɔ Suminyuŋgo wa. 27 La, na e n shiaa li ni nyu kee na, mu Wuuble kre pe cheche, mu dɔɔta na yaa tuuro tio mbe yili, ndee mbe le Jerusalem jlonwee yire nu Wuuble kre, na e waa je, mbe ti mbe kanhun ŋga ndro wa jaa fii nyi mbe to Jerusalem jlonwee yire na, mbe yi shɔ mbe sɛ mboo ŋga pe sin mu ki fɛ mu kun kre shɔ.’”