Jeremiah Na Sɛ Chɔ Faanrifun Katoo
18
Ki ble ka o Tafun Nyiɛkpɔɔ wre na yo Jeremiah pan mbo, 2 “Sɛ chɔ faanrifun wre katoo mbe ni sɛ kee ka yo mu pan.” 3 A ndaa yiri mna sɛ chɔ faanrifun wre katoo, na uu wa na u chɔ faanri. 4 Na u choo tɛɛ mu chɔ faanri, a ki nsraa nyu, a wra ki kla mna ndru mu ki faanri fɔŋgɔ imi na wraa chaa.5 Bawa o Tafun Nyiɛkpɔɔ wre na yo ni pan mbo, 6 “Jeremiah, kena mi e Tafun Nyiɛkpɔɔ wre wa jaa Israel pe imi na chɔ faanrifun ŋmba u chɔ ŋga pini ŋga ra? Imi na choo ŋga nyi u kɛɛ ŋga, pan chɔɔ yire Israel leele nyi ni kɛɛ. Pan mi e Tafun Nyiɛkpɔɔ wre yo. 7 Na ni yo na mbe waŋgra, ndee ŋunumu ka kɔ mbe wa, mbe ki kla, 8 a ki waa pan na waŋgra kre leele ni jaaraa loo mu laa pe sisam kro kre, mbe ni jawala chinɛ, mbe kanyana ŋga ni ni chaa mbe pan pe na kre ti. 9 A na ni waa ni jawala pe na mbe ti mbe waŋgra, ndee ŋunumu ka yiri mbe yire, 10 a pe waa sisaa pe mu ni taan, a pe n li ni kee na, mbe ni jawala chinɛ chichie ŋga ni chaa mbe pe pe na kre na.
11 Kena Jeremiah, yo Judah, na Jerusalem leele pre pan na, kee ŋga mi pe Tafun Nyiɛkpɔɔ wre yuu yi kre, ‘Mbe ti mbe kanyana sisaa pe da. Kena e laa e sisam kro, e kolo chiriri wru, e e kepele chinɛ.’ 12 La, ni chin na kee ŋga pie yo yi na, ‘O kee ka ma, nyjɛ o jawa yire oo pe. Oo taa o sisam kee nyjɛ o lolonyi nu yire na.’”
13 Kena ŋga mi e Tafun Nyiɛkpɔɔ wre yuu yi na,
E sɛ waŋgrɛ yire leele pre wie,
na pe da mu yire kefuɛn,
nyjɛ yire Israel leele pini,
nyjɛ ka loo tun rɛ?
14 E da mu nya,
a sugbeŋge ŋga ki woni,
Lebanon nyuɛ na,
kre laa tuun?
Ndee e da mu loo,
na ki lafooloe nyumu,
ŋga ki nyjii nyu nunu,
kre yua yi nu tuun?
15 La, mi titi leele pre ni kee fɛɛ,
mu kna na tuwe ndiom tɛɛn sroi,
na sra woni na sɛɛn wɛɛ kaan,
a yi tia pe laa fawolo kooloe,
nyjɛ pra yii yire na,
mu sɛ na troi kooloe,
nyjɛ pe n chin na,
na gbroi sɛɛnlɛ na na tuuri.
16 Ki tia mbe ti,
mbe pe tra kre sni waara,
mbe ki leele mblɛ pie na tro,
mbra ki nyaa kre fo.
Mbe praa pe pini mbra tɛɛ,
mbra ndrɛ nyaara.
17 Mbe ni leele pre gbun,
mbe nyina pe loŋgoolo yiɛ,
na fuflɛ ŋga ki yiri yilafin haa,
na gbuun kre bloŋgo wru.
Na kre kee kre waa pe da,
mbe krɔ kna mbe wa pe na,
mbe pia ni yiɛ nya.
18 A leele pre na kna na yuu peyɛ pan mbo, “E ti mbe o kolo ka cha na Jeremiah ŋmba ni. Na u n wa o, oo srawɔfɛɛnlɛ ta mbe pra o nyina mbra yire, ndee oo kachimblɛ ta, mbe praa o kaan jawala, ndee keenyanyofɛɛnlɛ pree wa mbra o nyina Nyiɛkpɔɔ kee kre. Kena e pan mbe o kala ka kun mbe taa u na, mbe waa u kee nyjɛ u yuu yire loo na.”
19 A mi Jeremiah na kna mu yo na, Nyiɛkpɔɔ loo kaalɛɛ nyjɛ ni loŋgoolo pre yuu ni na.
20 Kena ki fna mbe pe sisaa tɛɛ,
mbe chichie fɔlɔ tɔ?
Ni pe pe chichie, nde pe je,
mu sɛ weele tuulo ni kolo na.
Sɔɔnri na mi ndaa yire pe jeele na,
mna yire mu yiɛ
mna tali mu pe ŋga,
mbe ma pe ndie tini.
21 Kena Nyiɛkpɔɔ ti mbe klo to,
mbe pe biile gbo,
mbe pe plɛ ku,
brɔfiɛn yiɛshiin nyu na.
Ti mbe pe pe bilɛ gbo,
mbe pe chiɛlɛ kaari lekuchiɛlɛ,
mbe biile la.
Mbe pe pe yirifumblɔ
gbo ŋunɔ.
22 Na maa tia pe loŋgoolo pan,
mu pe tɔ kre,
mu ti mbe praa nyɛnɛɛ
ndru kalonyi nu.
Ŋgi na hin?
Pe weele tuulo ni kolo na,
mu ni pɛɛri pɛlɛ,
na ni chaa mbe yii.
23 La, ni Tafun Nyiɛkpɔɔ,
kooloe nyjɛ na pe troi na ni ni,
mbe ni gbo yire krɛrɛ mu yi chin.
Kena maa shia linkuuro,
sisam kee nyjɛ pe pini,
yire ti mbe pe kɛ.
A maashia pe sisam yire pɔ,
mbe flo mu yiɛ.
Krɔ tɛɛ mu pe ndie tini,
imi na ki fna.