Jeremiah Na Choo Chɔ Kre
19
Ki ble ka o Tafun Nyiɛkpɔɔ na yo ni pan mbo, “Sɛ chɔ faanrifun wre pan, mu sɛ chɔ lɔ u pan. Na mu shie, mbe mu chia loplombo, na srawɔfɛɛnlɛ loplombo plɛ yeeri mbe ya mu yɛ na, 2 mbe e sɛ Ben-Hinnom landɛɛ ŋga ki mbra jlonwee ŋga pe yeeri Chɔ Faanrifɛɛnlɛ Jlonwee kre na. Na e da wa mbe mu kee nyjɛ mbe yo mu pan yire yo pe pan. 3 Yo Judah ŋulo, na Jerusalem leele pan na pe ndie tɛɛ mbe kee ŋga o Tafun Israel Nyiɛkpɔɔ Jaŋgafun wre yuu loo. Ni paan na kanyana ka sembremu ni tra ŋga nu, ŋmba we ki loo kpan we na seeri. 4 Ŋgi na hin? Pe ni je mu tra kre kaari sɛɛnlɛ ndoo, mu na sra woni wa na sɛɛnlɛ nyjɛ pe tolɛɛlɛ, ndee Judah ŋulo pre nsra chin yire kaan, mu leele mblɛ pe n sisaa ka pe nyimi tɛɛ mu tra kre tɔ. 5 Kee ŋga ni n jawa tun, ndee mu da mu yo tun, a ki n da mu pan ni jawala nu tun pe piin. Pe sragbuɛnlɛɛ sin na pe bibilɛ sroi kanhun nu na sɛɛn Baal kaan. 6 Ta le, nyjila kaa wa na paan, mbe leele wa na kre lawee ŋga yeeri Topheth, ndee Ben-Hinnom landɛɛ na. La, pie na ki yeeri landɛɛ ŋga nu pe leele kuu.7 Kre lawee ŋga nu mbe ti mbe Judah na Jerusalem leele kee nyjɛ pe jawa yire kro fun pe ndra. Mbe ti mbe pe to pe loŋgoolo kɛɛ ŋunɔ, mbe pe pe gbo, mbe hanyiɛlɛ, na nyaalam yurɛ pe kaara ka. 8 Mbe ti kakpɔɔ ŋga ja, a kie leele mblɛ pie tro mbe ki nya kre fo, mbra pe pini mbra tɛɛ, kanyana ŋga ki pe nya kre ndra na. 9 Mbe ti mbe pe loŋgoolo pe fɛ mbe kun, mbra pe chaa mbe gbo, mbe klo ti praa peyɛ kuu, na pe biile ni mbra kaa.
10 Jeremiah, na maa kre kee ŋga yo mu kɔ to, mbe mu chɔ kre gbun mbe ja leele mblɛ ŋu na pre sɛ kre yiɛ na. 11 Kena mu kna mbe yo pe pan na, kee ŋga o Tafun Nyiɛkpɔɔ Jaŋgafun wre yuu yi na, ‘Mbe waŋgra ŋga, na ki kakpɔɔ ŋga ja, imi na ni chɔ ŋga gbun mu ja, a kia jaa gbeele na ŋga. Pie pe gboolo le Topheth kre nu mbe ki nyi mbe pia lawee ta mbe ndro le na. 12 Pan mbe kre lawee ŋga, na ki leele pre pe. Mbe kakpɔɔ kre pe na Topheth kre yi. Pan mi e Tafun Nyiɛkpɔɔ wre yo. 13 Pie kalonyi nyjɛ yii wa Jerusalem na, na Judah ŋulo kalonyi yire kro tɔ na nɛɛrɛ ni na Topheth lawee ŋga yi, ŋgi na hin? Pie tuwe ndiom tɛɛn sro nyinyi ndrɛ na mbe wɔɛlɛɛ nyjɛ yii wa nyjeeri yire ŋga, mbra simi woni pe sɛɛnlɛ yire na.’”
14 A Jeremiah na yili Topheth na wa, lawee ŋga nu o Tafun Nyiɛkpɔɔ wre na u tun na u kala ni kre, mna ndru mu pan mu yire sumindoo lawee vankam kre nu, mna yo leele pre pan mbo, 15 “O Tafun Jaŋgafun Nyiɛkpɔɔ wre, Israel Nyiɛkpɔɔ wre yo na, e loo, ni paan na kanyana ŋga kee ndaa yo kre ni, kakpɔɔ ŋga na ki kabɛɛlɛ nyjɛ na. Ŋgi na hin? Pe ndie kan, a pe n li ni kee yire na.”