Jeremiah Na Srawɔfun Pashhur Kala
20
Ŋga Immer biblɔ srawɔfun Pashhur ŋmba na wi Suminyuŋgo wa lopom wre na kee nyjɛ Jeremiah naa nyaa na yuu yire loo kre, 2 a wra tia pra Jeremiah yii mna u gbun fwa ni, mna u pɔ mu mbra kaan na mbe wa jaa jɔŋgɔ u titɛɛ. Pra u pɔ mu mbra jlonwee ŋga praa yeeri Benjamin Jlonwee Nyjeeri wo kre na, Suminyuŋgo wa. 3 Ŋga nyiŋge na se, a Pashhur na Jeremiah saan mu wa kre, a Jeremiah na yo u pan mbo, “O Tafun Nyiɛkpɔɔ mɛɛ ŋga u mu ŋga ma Pashhur, mu mɛɛ yi Magor-Missabib, ki nɔɔ nyina na, ŋmba pe fiɛ lawee kro nu. 4 Ŋgi na hin? Kee ŋga o Tafun Nyiɛkpɔɔ wre yo yi na, mbe ti mbe ŋu titi kna mbra muyɛ fiɛ, mbe mu nɔɔlɔ kro na mu fiɛ na. A mu yiɛ ŋga na pie to pe loŋgoolo kɛɛ, mbe pe pe gbo brɔfiɛn yiɛshiin ni. Judah leele we to Babylon ŋunu kɛɛ, mbe u pe yii mbe sɛ Babylon tra nu, ndee mbe pe gbo brɔfiɛn yiɛshiin ni. 5 Mbe kakpɔɔ ŋga yirɛ nyjɛ yii wa ki na kro wru mbe le e loŋgoolo kɛɛ, yire na keshiɛn yirɛ nyjɛ yii wa ki na, na Judah ŋulo kro, pie e foolo mbe sɛ Babylon tra nu. 6 A ŋu Pashhur, na leele mblɛ pee wa mu katoo wa kro we sɛ pe tinlɛ Babylon tra nu. Bawa mu ku mbe pe mu le, ŋu na mu nɔɔlɔ mblɛ pan mu kafinɛ kee nyaa na yuu pre kro.”Jeremiah Taanri Nyiɛkpɔɔ Na
7 Jeremiah na yo mbo, ni Tafun Nyiɛkpɔɔ,
ki pe na mu ni fana,
mu tia ni kaari daŋgo.
Mu jaŋga wɛ ni na,
a ki tia mu ni ja.
Blenyini ŋga, leele ni le fiɛn,
na ni pini na tɛɛ.
8 Na ni paara nyjila kro nu,
mbe fuu pɔɔrɔ ni,
na lawee paan mbe kla.
Ki tia mu kee nyjɛ ni yuu,
yire ndra na,
a leele na ni le fiɛn,
mu na ni tɛɛlɛ nyjila kro nu.
9 La, na ni yo na mba kee ka yo,
mbe wru mu haa,
ndee mbe mu mɛɛ yeeri na kre,
mbe mu kee kre na ni sroi,
ni loloŋgo na ni kajle nu,
na kanhun pe gbɛɛri ni lam,
mu tia sra wɔ ni na.
Mba ki ja ma.
10 Ni loo, a leele kro na juu na yuu,
na fiɛrɛɛ wa lawee kro nu.
Kena e ti mbe o sɛ u blami,
loplombo pre pan.
Ni nɔɔlɔ kro yire na ni sri,
mbe ni mbulɔ mbe to.
Na yuu mbo,
aada oo jaa u fana,
mbe u ta mbe yii,
mbe fɔlɔ tɔ u na.
11 La, ŋu ni Tafun Nyiɛkpɔɔ,
muu wa ni kro,
na ŋunɔwifun faŋgafun titi wi.
Kie ti mbe mblɛ pe ni chaa,
kala ni kre gbro mbe to.
Pia jaa da ni na. Pie pra ni na,
mbe nyifɛɛrɛ pe gbo.
Nyifɛɛrɛ ŋga kie pe gbo kre,
pia jaa ki fɛɛ fio.
12 O Tafun Nyiɛkpɔɔ Jaŋgafun,
ŋu mu lewo frakafun piin na le,
mbe ŋga kii wa u loloŋgo,
na u jawala nu chin.
Jande, fɔlɔ tɔ pe na,
mbe ni ki nya nyini ni,
ŋgi na hin?
Ŋu kɛɛ ni ni kee kro wru mu le.
13 E ti mbe o mɛɛ kɔ,
mbe o Tafun Nyiɛkpɔɔ wre ŋga.
E ti mbe o u pni, ŋga u pe na.
Wre u foorofun ŋmaa shio,
na yilii sisam pefɛɛnlɛ kɛɛ.
14 E ble ŋga na pra ni se kre sun.
Ndro waashia ble ŋga na ni lo
na ni se kre dwan fio.
15 Ndro ŋmbi wra yɛshɔɔrɔ kee yo ni lɛ pan mbo,
Pe biblɔ se mu mu ŋga aŋga hin?
Ufun atɛ.
16 Ufun wre u pe na chiɛ nyjɛ,
o Tafun Nyiɛkpɔɔ wre na kla,
a u nsra yi fooro chin yire ka yi.
Praa kuulo tɔɔnri,
mbe ufun na ndru
bnimi na lafo,
mbra ŋunɔ kee ndru
lafo chɛchɛ na.
17 Ŋgi na hin?
Ki fna wra ni gbo ni lo sefoo nu,
mbe ni lo lɛɛ na kaari ni faŋga.
18 Kena yira ŋgi kra tia,
ndaa yili ni lo lɛɛ,
mu pan na kala nyaa na fooro lii,
mbe kro nyifɛɛrɛ nu,
mbe sɛ ku ŋga hin?