3 A Jeremiah na kna mna yo pe pan mbo, “E sɛ yo Zedekiah pan na, 4 O Tafun Israel Nyiɛkpɔɔ wre yo na, ŋunɔwiyirɛ nyjɛ yii wa mu pan, a mu yi tɛɛ na Babylon ŋunu, na u leele mblɛ pe pan mu mu mboo fɛ mu kun kre sri mbe wi na pe ni kre, mbe yi shɔ e kɛɛ, mbe yi ble kakpɔɔ kre na. 5 Mi titi mbe ni faŋga, na ni jaŋga tɛɛ mbe wi na e ni na krɔ sisaa ni. 6 Mbe ti mbe yira sisaa pan mbe chia ŋga leele, na ki yurɛ mblɛ pee wa ki na kro gbo. 7 Kre kɔkro, mi Nyiɛkpɔɔ we Judah ŋunu Zedekiah, na u loplombo, na leele mblɛ pie kro a klo, ndee ŋunɔ, ndee yira sisaa kre wa pe gbo pre wru mbe le Babylon ŋunu Nebuchadnezzar, na pe loŋgoolo mblɛ pe pe chaa mbe gbo pre kɛɛ. We pe gbo brɔfiɛn yiɛshiin ni, hali wa ndro fooro le, mbe nyu wa na.”

8 Kena yo leele pre pan na, “Kee ŋga o Tafun Nyiɛkpɔɔ wre yuu yi kre, mbo, mbe e nyina kolo ŋga na ee tro mbe ŋmaa ta, na kolo ŋga na ee tro mbe kumu ta. 9 Ndro ŋmba we tni kakpɔɔ ŋga na kre we ku brɔfiɛn yiɛshiin nyu na, ndee klo, ndee yira sisaa kɛɛ. La, ŋmba we sɛ uyɛ wru mbe le Babylon leele mblɛ pe e fɛ mu kun pre kɛɛ kre, ufun we uyɛ ndra ta, mbe ŋmaa li. 10 Ni ni jawala pe na mba chia ŋga ti, ki fna mbe ni ki kla, mbe ki wru mbe le Babylon ŋunu wre kɛɛ, mbe u kanhun tɛɛ mbe e kla.”

11 Ti mbe Judah lebiile pre loo kee ŋga pe Tafun Nyiɛkpɔɔ wre yuu,