Nyiɛkpɔɔ We Judah Ŋulo Ndie Tini
22
Kee ŋga o Tafun Nyiɛkpɔɔ wre na yo ni pan yi kre mbo, “Sɛ Judah ŋunu wre katoo mu sɛ kre kee ŋga kpali wa. 2 Yo ŋunu wre pan na, Tolɛɛ Judah ŋunu, ŋu ŋmba mu yiri Ŋunu David nɔɔ leele nu, ŋu na mu loplombo, na mu leele kro e loo, 3 o Tafun Nyiɛkpɔɔ yo ni yo e pan na, e na kpra yuu, e na kee ŋga ki fraka pini, e leele mblɛ pe fiŋge mu na pe dnumu pre shɔ e wa. Yaashia fuŋu ŋmba uu wa mu tni e nu wre pe sisaa, ndee mbe bijro, ndee lekuchlɔ pe kee ŋga ki n fna, a yaashia ndro ŋmba u n sisaa ka pe gbo finfin lawee ŋga nu. 4 Na e waa dɔɔta mu li kre kee ŋga ni yuu e pan ŋga na, kena ŋulo mblɛ pie paan tni Ŋunu David ŋujɔɔn ŋga na kre, we nyaari mbe tro ŋunu katoo jlonwee ŋga nu. Mbe nduu pe sookɛɛ, na pe soolo na, mbe pe loplombo, na pe leele taa pe kro. 5 La, na e je ni nyu kee na, mi e Tafun Nyiɛkpɔɔ wre ni yɛ danyi da na, kre ŋunu katoo ŋga we kla. Pan ni yo.”6 Kee ŋga o Tafun Nyiɛkpɔɔ wre yo mu wru Judah ŋunu katoo kre haa yi kre.
Kii wa na pan mu nyi ni pan,
na Gilead, na Lebanon,
nyuɛ chichiele yire yi.
La, mbe mu kla,
mbe mu pe na tablɔ tra yi,
ndee na chiɛ nyjɛ
na leele gbɛ yi.
7 Mbe ti mbe leele klafɛɛnlɛ pan,
mbe mu kla.
Na pe paan,
pe wiyirɛ we pe pe kɛɛ,
pie cedar tinyi chichiele,
nyjɛ yi e nyinyi ndra yire chile,
mbe wo, mbe yi sro.
8 Na ki pan ma kre, waŋgrɛ tataara leele we tro kakpɔɔ ŋga na, na pe da mna mbe praa peyɛ wie mbo, “Yira ŋgi ki tia pe Tafun Nyiɛkpɔɔ wre kre kee ŋga pe kre kakpɔɔ ŋga nyini na ma ŋga hin?” 9 Ki nyu ŋga pie ta mbe wɔ kro yi na, “Ŋga pra pe Tafun Nyiɛkpɔɔ nyu nunu ŋga wra pe na pe ni kre kla, mna sɛ taa sɛɛnlɛ kro na yi sumi kre kra tia.”
10 Yire Judah leele,
yaa shia Ŋunu Josiah
kumu nyɛni.
Na ee nyɛni kre,
kena e u biblɔ Jehoahaz,
ŋmba pe yii mu sɛ haalee,
Babylon tra na wre nyɛni,
ŋgi na hin?
Wre wa ndru u kro na,
ndee mbaa yo tra ŋga nu,
pe u se kre, we ki nya na.
11 Ŋgi na hin? Kee ŋga o Tafun Nyiɛkpɔɔ wre yuu mu wru Josiah biblɔ Jehoahaz ŋmba wra u lɛ krɔ li mna Judah ŋunumu li wre haa yi kre. “Pe u yii mu yili waŋgra ŋga nu, a wa ndru mbe pan u kro na. 12 Lawee ŋga nu pe u yii mu sɛ kre, bawa we ku, wa u tra ŋga nya na fio.”
Ŋunu Jehoiakim Kee
13 Ŋunu ŋmba u nsra tro,
kpra kolo na,
mna u ŋunu katoo sin kre,
u atɛ.
Wre wra tro dnumu kolo na,
mna abansru nyinyi sin,
mu taala.
Mna tia u leele,
na yi tnumu tun finfin,
hali u nsra pe fɔlɔ tɔ yaka ni.
14 Wre wra yo uyɛ pan mbo,
Mbe ŋunu katoo kpɔɔ titi
sin niyɛ pan.
Mbe ki nyinyi yire sin,
mbe yi kpɔɔ kpɔɔ,
mbe taala yiyɛ na,
mbe sɛ nyjeeri.
Wra yi sin mna vromboe
badɛnyi wɔ yi na.
Mna cedar kɛɛn tɛɛ,
mna yi yɔɔlɛ mna tuwe,
nyiɛ tɛɛ mna yi wlɔ.
15 Kena na cedar kɛɛn bɔ mu na,
kie jaa ti mu pe ŋunu ra?
Sro na nyumu na bɔ,
mu lɛ Josiah na,
a nde wra ŋga ki fraka pe,
mna na kpra lii,
a kra tia kee kro na nyu,
mu u ŋga.
16 Wraa shianfɛɛnlɛ,
na pɔlɛfɛɛnlɛ kala lii,
na pe shio na waa,
a kra tia u kee kro naa nyɔɔ,
na u kaan.
Yire kee yire lewo we pe,
mbe ki nyina na u mi,
e Tafun Nyiɛkpɔɔ wre chin.
Pan mi Nyiɛkpɔɔ wre yo.
17 La, mu yiɛ, na mu loloŋgoo
wa dnumu yirɛ na,
a mna leele mblɛ pe n sisaa,
ka pe kuu finfin,
na leele fiŋge,
na pe yirɛ shio pe pan.
18 Kena kee ŋga o Tafun Nyiɛkpɔɔ wre yuu mu wru Judah ŋunu Josiah biblɔ Johoiakim wre haa yi kre.
Ndro wa u kumu nyɛni.
U lo biile kuraa wa u nyɛni,
mbaa yo leele pie nyɛni,
mbe yo, o tolɛɛ wre la wa.
19 Pan pie u le na bubnɔ u ku,
mbe pe u fulo mbe sɛ u wa,
Jerusalem jlonwee kre
mbookrɔ.
Jeremiah Jerusalem Kee Yuu
20 Jerusalem leele,
e sɛ nyɛni Lebanon na,
e ti mbe pe e mana loo,
Bashan tra nu,
mbe e sɛ yire Moab nyuɛ,
yire ndra na,
mbe gble le. Ŋgi na hin?
Pe waŋgrɛ nyjɛ na,
e ndra taa yire kla.
21 Nyjila ŋga nu e na eyɛ ta kre,
ndaa e jaari,
e na yo na yaa ki loo.
Mu yire e yirifum nyjila,
mu pan mu su aŋga na,
e je na yaa ni kee loo.
22 Fuflɛ we e loplombo,
pre kro wru mbe sɛ,
mbe pe waŋgrɛ nyjɛ leele,
na e kaan pre yii,
mbe sɛ na pe ni,
waŋgra fɔŋgɔ nu.
Mbe ki ti nyifɛɛrɛ e gbo,
mbe e yiɛ le nyumu,
e sisaa ndra na.
23 Yire mblɛ e eyɛ ta,
na sni nyinyi chichiele,
nyjɛ pe pe cedar kɛɛn tɛɛ,
mu pe nu kre,
na kala waa e da,
e kee we pe fooro ni.
Pan e kanyana we pe na,
se lɛɛ chlɔ yaa.
24 Ŋga mi Nyiɛkpɔɔ wa ŋga. Hali na Jehoiachin ŋmba lɛ wi Judah ŋunu Jehoiakim wre kaari lebiile kalie kambɛlɛ feelee ŋga ni pe yira tnɔ yi kuraa kre, mbe u foli mbe wa. 25 Mbe mu wru mbe le Babylon ŋunu Nebuchadnezzar, na u leele mblɛ pe mu chaa mbe gbo, a mna pe fiɛ pre kɛɛ. 26 Mbe ŋu na mu lo ŋmba wra mu se kro ni, mbe e sɛ tni haalee waŋgra fɔŋgɔ ŋga e n chin nu, a bawa e kro shiin we ku. 27 Ee na e tra ŋga chaa mbe ndru mbe pan, a yaa ki ta ma na.
28 Ŋunu Jehoiachin pe na chɔ jaa,
ŋga ndro n na chaa,
mbe yaka pe na ki ni yi.
Ki tia pie wre na u biile kro ni,
mbe pe sɛ tni waŋgra,
ŋga pe n chin nu.
29 Judah tra leele,
mi wi e Tafun Nyiɛkpɔɔ,
kena e ndie tɛɛ ni pan.
30 Kee ŋga o Tafun Nyiɛkpɔɔ wre yuu yi kre mbo,
E Jehoiachin bibilɛ pre mɛɛ wɔ,
e yili hlɛ ŋga nu pe lebiile,
mɛɛ nyunɔ mu le kre nu.
Ŋgi na hin?
U nsra kee chiriri ka pe,
ki tia u bibilɛ,
wa Judah ŋunumu ta mbe li.
Pan mi e Tafun Nyiɛkpɔɔ wre yo.