Tiŋge Klɛ Chichie
23
O Tafun Nyiɛkpɔɔ wre yo mbo, “Yire loplombo mblɛ e ni leele pre le na mbaala lefɛɛnlɛ lɛ, mu pe gbun mu nyina, na pe klai kre, e atɛ.” 2 Kee ŋga o Tafun, Israel Nyiɛkpɔɔ wre yuu pre mblɛ pe u leele pre le pre pan yi kre, mbo, “Ŋga e ni leele pre gbun mu ni, a e n pe le chiriri kre ndra na, mbe e ndie tini kre sisam kee nyjɛ e pini yire na.3 Mi titi we ni leele mblɛ pe kro pre nyu ble, mbe pe wɔ mbe yili waŋgrɛ nyjɛ nu ni pe gbun mu nyina yire nu, mbe ndru mbe pan na pe ni pe waŋgra nu. Bawa pie pan mbe se, mbe leele pre nɛɛ mbe ya. 4 Mbe lefɛɛnlɛ cha pe na mbe praa pe le, mbe pia na fiɛ na, a wa wa fun pe nu na. Pan mi e Tafun Nyiɛkpɔɔ wre yo.”
5 Nyjila kaa wa na paan,
mbe ni ŋunu ŋmba we fraka wɔ,
mbe yili ŋunu David nɔɔ leele nu.
Wre ŋunu wre we kachindɛ tɛɛ,
mbe ŋunumu li, mbe fraka,
mbe kpra li tra kre nu.
6 Wre ŋunu wre nyjila,
kre Judah tra we kiyɛ ta,
mbe Israel leele tni
wejinyiŋge nu.
Mɛɛ ŋga ni pie na
wre ŋunu wre yeeri yi,
o Tafun Nyiɛkpɔɔ,
o frakafun.
7 Nyjila kaa wa na paan, leele wa mi Nyiɛkpɔɔ mɛɛ tɛɛ mbe da mbe yo na mi ndaa Israel leele wɔ mna yili Egypt tra nu fa na kre. 8 La, pie ni mɛɛ tɛɛ mbe da mbra yuu na, mi ndaa Israel leele pre wɔ mna yili nyjeeri haa trɛ yire, na waŋgrɛ nyjɛ nu ndaa pe gbun mu nyina yire nu. A pie paan tni pre titi waŋgra nu na.
Kafinɛ Nyiɛkpɔɔ Keenyanyofɛɛnlɛ
9 O Tafun Nyiɛkpɔɔ kee kre ndra na, na ni keenyanyofɛɛnlɛ pre kee jawa,
mbe ni loloŋgo chaa peeri,
mbe ni kajle na seeri,
mbe ni pe na lewo
ŋmba u gbɔ mu to,
a simi wɛ u na wi.
10 Nyiɛkpɔɔ keenyanyofɛɛnlɛ,
mblɛ pe n kpra ni,
pre pe tra kre nyi,
na jaŋga waara lii leele pre na,
a ki tia Nyiɛkpɔɔ tra kre sun,
a ki yurɛ kahɛɛ yire kro yua.
11 Pe keenyanyofɛɛnlɛ,
na pe srawɔfɛɛnlɛ kro,
pe n ni chin.
Hali ni Suminyuŋgo wa kuraa,
ni pe sisam nyjɛ pe piin,
yire nyaa wa.
Pan mi pe Tafun Nyiɛkpɔɔ wre yo.
12 Ki tia mbe ti pe kooloe,
nyjɛ na pe tro yire pe plɔplɔ.
Mbe pe ni mbe wa wɔmu nu,
mbe praa tuuri mbra gbila wa.
Mbe ti mbe kala kpɔɔ pe da,
ŋgi na hin? Pe ndie tini
nyjila ki da.
Pan mi,
pe Tafun Nyiɛkpɔɔ wre yo.
13 Ni kefɔɔn titi ka nya,
Samaria kakpɔɔ kre
keenyanyofɛɛnlɛ pre nu.
Sɛɛn Baal kre mɛɛ ni,
pe tɛɛ na kee nyaa na yuu,
mu ni leele pre wa mu fun.
14 A Jerusalem
keenyanyofɛɛnlɛ nu,
ni kefɔɔn ŋga ki peere titi nya.
Pre pe leŋgeere klai,
na kala fnɛ,
na sisampefɛɛnlɛ pre
leni gbeŋmbaa.
A ki tia ndro wa jaa laa,
u sisaa pee kro.
Pan pe nyi na,
Sodom leele lɛ ni pan,
a pan pe kepele yire nyi to,
na Gomorrah leele lɛ.
15 Ki tia pe kee ŋga mi pe Tafun Nyiɛkpɔɔ Jaŋgafun wre yuu yi na,
Mbe ti mbe pe sro susrom li,
mbe nyumu ŋga nu
pe tuwe sisaa le, gbɔ,
ŋgi na hin?
Jerusalem keenyanyofɛɛnlɛ pre,
kee nyjɛ pe pini kre ndra na,
mi Nyiɛkpɔɔ chiŋgɛfun
tra kre nu.
16 Kee ŋga o Tafun Nyiɛkpɔɔ wre yuu yi kre mbo,
yaashia kee
nyjɛ pre keenyanyofɛɛnlɛ,
pre nyaa na yuu yire loo.
Kee nyjɛ pe yuu yire krɛrɛ,
yaa jaa kaan yi na.
Pre titi jawala kee
pe nyaa na yuu,
mi Nyiɛkpɔɔ ma
ni paara pe pan.
17 Pe kro na yuu mblɛ pe ni je,
mu taa pe lolonyi shelee kee na,
na o Tafun Nyiɛkpɔɔ wre yo na,
wejinyiŋgee wa,
a ndro wa ja mbe e pe yaka.
18 Pre keenyanyofɛɛnlɛ mblɛ,
pe ŋmbi u da mu yire,
o Tafun Nyiɛkpɔɔ wre yiɛ,
mu ŋga u pini nya,
ndee mu u kee kre loo,
ndie ni tun hin?
19 E le, o Tafun Nyiɛkpɔɔ wre,
krɔ we pe na legboo fuflɛ yi,
mbe sisampefɛɛnlɛ pre,
wru mbe sɛ.
20 O Tafun Nyiɛkpɔɔ wre,
krɔ wa nyjii, fɔna u kee
ŋga kii wa u loloŋgo na,
kre pe mu kɔ.
Mbakɔ ee kee nyjɛ,
nɔɔloo chiriri.
21 Mi ma ni pre
keenyanyofɛɛnlɛ mblɛ tun,
a nde tafɛŋgɛ ni pe shie,
na yire kee yire yuu e pan.
Ni n paara pe pan,
a nde pe je,
na ni kee nyaa na yuu.
22 La, na pra ni lam kee chin,
pie na ni kee ta,
mbra yo ni leele pre pan,
mbra jaa pe kna mbe laa,
pe sisam kooloe,
nyjɛ na pe tro yire na,
mbe pe laa pe kepele
fuɛn yire na.
23 Mi Nyiɛkpɔɔ,
nii wa lawee kro nu,
ni haa n le na lewo ni.
Pan mi e Tafun Nyiɛkpɔɔ wre yo.
24 Kena ndro we jaa ndra ni na,
mbe mi Nyiɛkpɔɔ wa u nya ra?
Lawee ka n wa a ni n wa wa,
nii wa nyjeeri, a nii wa tra.
Pan mi Nyiɛkpɔɔ Jaŋgafun wre yo.
25 Kee nyjɛ keenyanyofɛɛnlɛ pre ni mɛɛ tɛɛ na fnɛ yire, ni yi loo. Wa we yo na, “Ni ŋunɛ ŋunu,” mbe ŋmba yo na, “Ni ŋunɛ ŋunu.” 26 Mni a pre kafinɛ keenyanyofɛɛnlɛ mblɛ nyini kro mu na ni leele mblɛ waa na fɔɔn na pre titi jawala kee ni ma hin? Nyjila ŋgi nu yire kee yire nyu we to wo? 27 Pe jawa na pe ŋunɛ nyjɛ kee pe yuu yire we ti mbe ni leele pre ni kee fɛɛ. Pan pe tolɛɛlɛ pre na sɛ sɛɛn Baal sumi mna ni mɛɛ kre fɛɛ. 28 Kena e ti mbe keenyanyofun ŋmba u ŋunɛ ŋunu wre, na u ŋunɛ kee yuu, mbe ŋmba u ni kee yuu kre na ki yuu na kpra ni. Na pe shɔlɔ kun mu kɔ, tnu ŋgi kii wa kpakpaa nu na hin? Kee ŋga mi e Tafun Nyiɛkpɔɔ wre yo yi. 29 Mi Nyiɛkpɔɔ, pan ni kee nyi na kanhun yi, pan ki pe na hama ŋga ni pe dnɛ frɔ na juari mbruru kre yi.
30 Kena mi e Tafun Nyiɛkpɔɔ wre yo na, keenyanyofɛɛnlɛ mblɛ pe kee ndru peyɛ pan, mbra ki kpali mbra tro na mi Nyiɛkpɔɔ kee yi kre, pie kala ta ni pan. 31 Pan chɔɔ keenyanyofɛɛnlɛ mblɛ pe pre titi jawala kee woni na yuu, mbra yuu na ni kee pe yuu kre, pie kala ta ni pan. 32 Kpra na, keenyanyofɛɛnlɛ mblɛ pe kafinɛ ŋunɛ ŋunu pre, ni n na pe kee chaa. Pe yire ŋunɛ yire yuu mu na ni leele pre waa na fɔɔn, na peyɛ kpɔɔri pe kafinɛ kee yire ni. Ni n pe wa wɔ, a ni n pe wa tun. A pe n na yaa ni leele pre na kolo ka na. Pan mi pe Tafun Nyiɛkpɔɔ wre yo.
Kafinɛ Kee Na Kafinɛ Keenyanyofɛɛnlɛ
33 Jeremiah, na ki pan na ni leele pre wa, ndee keenyanyofun wa, ndee srawɔfun wa pan mu wie na, “Yira ŋgi kee mu ta mu loo Nyiɛkpɔɔ pan aŋga hin?” Yo ufun wre pan na, “Nyiɛkpɔɔ yo na yire e pe tuuro mu eyɛ ŋga, kena we kɛ laa e na, mbe e kla.” 34 Na keenyanyofun, ndee srawɔfun, ndee ni leele pre wa waa pan mu yo na mi Nyiɛkpɔɔ kee ka yo kre, mbe wrefun wre, na u katoo leele kro ndie tini.
35 Kee nyjɛ yi fna mbe e na e nɔɔlɔ, na e sele wolo wie yi na, “Kee ŋgi o Tafun Nyiɛkpɔɔ wre ta mu o nyu wɔ aŋga hin? Ndee kefɔŋgɔ ŋgi u ta mu yo o pan aŋga hin?” 36 Wa waa shia yo na mi Nyiɛkpɔɔ kee ka yo, ŋgi na hin? Yire titi e kaalɛɛ taa na fnɛ, mu Nyiɛkpɔɔ ŋmba uu wa nyjila kro nu wre kee kre ndra kna mu soo. 37 Kee nyjɛ e kro na keenyanyofɛɛnlɛ pre wie yi na, “Kee ŋgi Nyiɛkpɔɔ ta mu o nyu wɔ aŋga hin? Ndee kee ŋgi u ta mu yo o pan hin?”