Fig Sɛnyi Chichiele Na Fuɛn
24
Ŋga Babylon ŋunu Nebuchadnezzar, na Judah ŋunu Jehoiakim biblɔ Jehoiachin, na u loplombo na mblɛ pe pe kɛnyu tnumu chin pre yii mna sɛ haalee Babylon tra nu kre kɔkro, o Tafun Nyiɛkpɔɔ wre na ni nyina kakɛɛ shiin yɛ, na pe fig sɛnyi le yi nu mu tɛɛ Suminyuŋgo kre yɛsimi. 2 Kakɛɛ nunu fig sɛnyi yire na nyu, mna pe na yire yira klu mu nyina. A kakɛɛ shiinwo kre wee yire nsra nyu kuraa mbe ndro jaa yi li.3 A o Tafun Nyiɛkpɔɔ wre na ni wie mbo, “Jeremiah, yira ŋgi mu nya hin?” A ndaa yo, na ni fig sɛnyi nya. Yi chichiele nyjɛ ni nya yire nyu titi, a yi fuɛn nyjɛ ni nya yire n nyu kuraa mbe jaa li.
4 A o Tafun Nyiɛkpɔɔ na yo mbo, 5 “Mi Israel Nyiɛkpɔɔ wre yo na pre Judah leele mblɛ ni tia pra shie na pe ni Babylon na ŋga, pan pe nyi na fig sɛnyi chichiele yire yi. 6 Ni yiɛɛ wa pe na, mbe yaka wa pe ta, a mbe ndru mbe pan na pe ni pe tra ŋga nu, a mbe ti mbe pe nɛɛ. Mba pe kla, la mbe ti mbe pe didinyi kan. Mba pe kɔ mbe wa. 7 Mbe pe ŋga loloŋgo ŋga ni pie ni chin na mi wi pe Tafun Nyiɛkpɔɔ wre. Pie pe ni leele, mbe ni pe pe Nyiɛkpɔɔ, ŋgi na hin? Pie pe loloŋgo kro wru mbe ni ŋga.
8 La, imi na fig sɛnyi nyjɛ yi n nyu mbe ndro jaa yi li nyi kre, pan Judah ŋunu Zedekiah na u loplombo na mblɛ pie kro Jerusalem na, ndee mblɛ pie sɛ tni Egypt na pre kee wa pe ni pan tnu ni. 9 Kanyana ŋga sembremu kie pe da kre, kie weere wo waŋgra ŋga leele kro na mbe praa pe piin mbra tɛɛ. Pe suŋgɔ kre sembremu kee, ndro kro we na yuu. Mna pie pe nya kpan, pia ki kee fɛɛ. 10 Mbe ti mbe pe pe gbo ŋunɔ nu, mbe klo na yira sisaa pe plɛ gbo, mbe sɛ su na pe nɔɔ we kɔ, tra ŋga ndaa pre na pe tolɛɛlɛ ŋga kre na.”