4 Pan o Tafun wre u keenyanyofɛɛnlɛ tataara tun a praa paara e pan, a e je yaa loo. 5 Kee ŋga pra kro na yuu yi na, na ee laa e sisam kooloe na e kefuɛn kro kre, kre ee jaa tni tra ŋga o Tafun wre na yire na e tolɛɛlɛ ŋga kre na, nyjila kro nu. 6 Pra yo e pan na yaa shia sɛɛnlɛ sumi, a yaa shia ti mbe e kɛ yirɛ nyjɛ e gbeele yire ndra na, mbe u krɔ kun na e ni, mbe u e kla.

7 A e na je, e n ni nyu kee loo, mu e kɛ nyu yirɛ nyjɛ e gbeele tɛɛ mu ni krɔ kun, mu tia kala na e nyaa.

8 Ki tia kee ŋga mi e Tafun Jaŋgafun Nyiɛkpɔɔ wre yuu yi na, ndikana ŋga e pe ni na kre ndra na, 9 mbe kɛ wa mbe leele yeeri mbe pe yiri nyjeeri haa wa mbe pan, pre na ni sumifun Babylon ŋunu Nebuchadnezzar ni, mbe pe pan mbe wi na tra ŋga, na ki leele, na waŋgrɛ nyjɛ yi pe fɛ mu kun yire kro ni. Mbe ti pe e kla kro, a mbe ti mbe e kee leele fo, mbe e kee pe kpɔli ni. Mbe pe e kla mbe yaa ja mbe yiri na fio. 10 Mbe ti mbe pe yɛshɔɔrɔ kro nyu to. Pia bijɔ ndee bijɔplɔ mana loo wa na. Pia yirɛ tre dnɛ tiŋge loo, a ndro wa kania mu chia kre na. 11 Waŋgra kre kro we ja, mbe sni waara, ŋgi na hin? Waŋgrɛ yire kro leele we Babylon ŋunu sumi yɛlɛ fuloe taarɛ na kɛ.

12 Na yire yɛlɛ fuloe taarɛ na kɛ yire nyu waa to kre, mbe kna mbe Babylon ŋunu na u waŋgra kre, na ki leele kro ndie tini, pe sisam ndra na, a mbe ti mbe tra kre sni waara nyjila kro nu. Pan mi e Tafun Nyiɛkpɔɔ wre yo. 13 Tra ŋga kee ŋga ni yo mu ki taan kro we pe ma yɛŋgɛ. Kee nyjɛ Jeremiah nya mu yo mu waŋgrɛ nyjɛ kro taan, a pe nyunɔ mu le hlɛ ŋga nu kro we pe. 14 Kee nyjɛ Babylon leele pre pe yire kro, mbe yi fɔlɔ tɔ pe na, mbe ti mbe waŋgrɛ tataara, na ŋulo kpɔɛ pan mbe pe yii mbe pe pe tinlɛ, pe kɛnyu yirɛ nyjɛ pe pe yire ndra na.

15 O Tafun Israel Nyiɛkpɔɔ wre kee ŋga wra yo ni pan yi kre mbo, “Gbɔ yira ŋga yii ni kɛɛ. Ni simi le ki nu a ki nyi, ni krɔ ŋga ki kun sisaa kre na, mbe mu sɛ waŋgrɛ nyjɛ nu mbe mu tun yire leele ŋga ki yi, mbe pe gbɔ. 16 Na pe waa ki gbɔ, pie na fuula, mbe pe na tɔɔlɔ pe tɔɔlɔ poŋgo, ŋgi na hin? Mbe ti mbe brɔfiɛn yiɛshiin le pe nu.”

17 A ndaa gbɔyira kre shɔ o Tafun Nyiɛkpɔɔ wre kɛɛ, mna sɛ na ki ni waŋgrɛ nyjɛ nu wra ni tun yire nu, mna tia pra simi kre gbɔ. 18 Ndaa sɛ Jerusalem na Judah chiɛ yire na, a pe ŋulo na pe loplombo kro na simi kre ka gbɔ, a kra tia waŋgra kre na ja, mna kaari kataa mna leele fo titi, a praa pe le na kpɔli yira ka yi, na pe suni, imi na e pe nyaa aŋga ŋga. 19 Egypt ŋunu Pharaoh, na u loplombo, na u sumifɛɛnlɛ, na u leele kro, 20 na fumblɔ mblɛ praa wa mu tni pe nu kro, pre na Uz ŋulo, na Philistine ŋulo mblɛ pra yiri Ashkelon na, na Gaza, na Ekron na, na leele mblɛ pra kro Ashdod chiɛ yire na, 21 na Edom, na Moab, na Ammon trɛ ŋulo kro na simi kre ka gbɔ. 22 Tyre, na Sidon chiɛ yire ŋulo kro, na ŋulo mblɛ praa wa mu tni epo kro kre kro na gbɔ. 23 Dedan, na Tema, na Buz, na mblɛ praa wa mu tni haalee waŋgrɛ yire nu, mnaa pe ndrɛ knumu sɛɛnlɛ paala kolo na kre kro na gbɔ. 24 Arabia ŋulo kro, na fumblɔ mblɛ praa wa mu tni pe nu, tablɔ tra kre nu pre ŋulo, 25 na Zimri kakpɔɔ kre ŋulo, na Elam, na Media tra kre ŋulo, 26 na ŋulo mblɛ pe yiri nyjeeri haa wa pre kro, pe mblɛ praa wa nyjɔ, na mblɛ praa wa haale kro na gbɔ. Hali ŋulo mblɛ pee wa tra yiɛ na kro na gbɔ. Ŋga pe kro na gbɔ a pe nyu na to kre, a Babylon ŋunu wre na chin mu gbɔ.

27 A o Tafun Israel Nyiɛkpɔɔ wre na yo ni pan mbo, “Yo pe pan na pe gbɔ mbe to mbra tuuru, mbra tuuri mbra yiri, mbe sɛ su na pia jaa yiri mbe yire sholo na, ŋgi na hin? Ni paan brɔfiɛn yiɛshiin ni mbe le pe nu. 28 La, na pe waa je na pia gbɔyira kre shɔ mu kɛɛ, mbe gbɔ kre, yo pe pan na o Tafun Nyiɛkpɔɔ Jaŋgafun wre u yo na, ki fna mbe e ki gbɔ. 29 E le, ni paan na kanyana kpɔɔ ni kakpɔɔ Jerusalem ŋga na ni mɛɛ taa kre na, kena e jawa na ee shɔ ki nu ree? Ŋgi na hin? Ni kɛ wa mu brɔfiɛn yiɛshiin ka yeeri kra paan leele mblɛ pee wa tra yiɛ na kro pan. Pan mi e Tafun Nyiɛkpɔɔ Jaŋgafun wre yo.”

30 Jeremiah, yire kee nyjɛ mbe mu ŋga nyjɛ kpali leele pre pan, mu yo pe pan na, kee ŋga e Tafun Nyiɛkpɔɔ wre yo yi kre mbo,

32 Kee ŋga o Tafun Nyiɛkpɔɔ Jaŋgafun wre yuu yi kre mbo,