Praa Jeremiah Chaa Mbe Gbo
26
Ŋga pra Judah ŋunu Josiah biblɔ Jehoiakim tɛɛ jɔɔn na, ki n nsra mu, a o Tafun Nyiɛkpɔɔ na kre kee ŋga yo mi Jeremiah pan mbo, 2 “Sɛ yire o Tafun Nyiɛkpɔɔ wre Suminyuŋgo lawee vankam kre nu mu paara leele mblɛ pe yiri Judah chiɛ yire na mu pan sumihaa pre kro pan. Kee nyjɛ mbe yo mu pan yire kro yo pe pan, maa shia kee nunu chom kuraa ti. 3 Aada pie ki loo, mbe pe jawala chinɛ. Na ki pan ma, mbe ni jawala chinɛ mbe mba ti kanyana ŋga ni jawa, na pe sisam ndra na, kie na pe nya kre, wa pe nya na.4 Yo pe pan na, Kee ŋga e Tafun Nyiɛkpɔɔ wre yuu yi kre, mbo, na e n ndie tɛɛ ni pan, mu li ni mbra nyjɛ ni e ŋga yire na, 5 a e n ndie tɛɛ kee nyjɛ ni keenyanyofɛɛnlɛ mblɛ lɛ ni sumifɛɛnlɛ pre yuu e pan gbee tataara yire na, mu je a e n loo ni pan kre, 6 mbe kre Suminyuŋgo ŋga kla, imi na ndaa Shiloh pe kre. A waŋgrɛ kro we chin na mi ni kre kakpɔɔ ŋga sun.”
7 Srawɔfɛɛnlɛ pre, na keenyanyofɛɛnlɛ, na leele pre kro na kee nyjɛ Jeremiah na yo pe pan o Tafun Nyiɛkpɔɔ Suminyuŋgo wa yire kro loo. 8 La, ŋga Jeremiah na paara leele pre pan mu kɔ to, a srawɔfɛɛnlɛ pre, na keenyanyofɛɛnlɛ pre, na leele pre kro na jawala ta mna u yii mbo, “Ki fna o mu gbo.” 9 Mbo, mni a mu o Tafun Nyiɛkpɔɔ wre mɛɛ tɛɛ na yuu o pan na kre Suminyuŋgo ŋga we kla, na Shiloh yi, mbe ndro wa kro ki na ŋga hin? Titɛɛ kre nu, a leele pre na sɛ fɛ mu Jeremiah kun o Tafun Nyiɛkpɔɔ Suminyuŋgo wa.
10 Ŋga Judah loplombo pre na yire kee yire loo kre, a pra yili ŋunu katoo wa mna sɛ tni o Tafun Nyiɛkpɔɔ Suminyuŋgo jlonwee ŋga pe yeeri Jlonwee Fɔŋgɔ kre nyu na. 11 A srawɔfɛɛnlɛ pre, na Nyiɛkpɔɔ keenyanyofɛɛnlɛ pre na leele pre, na pe loplombo kro bɔ mandiɛ mbo, “Ki fna mbe o wre blɔ ŋmba gbo, ŋgi na hin? U paara mu o kakpɔɔ ŋga taan, a e kro ki loo.”
12 A Jeremiah na kna mna yo keenyanyofɛɛnlɛ pre, na srawɔfɛɛnlɛ pre, loplombo pre na leele mblɛ praa wa wa pre pan mbo, “O Tafun Nyiɛkpɔɔ wre u ni tun na ni paan yire kee nyjɛ yo mbe Suminyuŋgo ŋga, na kakpɔɔ ŋga taan. 13 Kena e e tnimu ŋga nu e nyi kre chinɛ, e li o Tafun Nyiɛkpɔɔ wre nyu kee na. Na e pe ma kre, o Tafun Nyiɛkpɔɔ wre we u jawala chinɛ, mbe wa ti mbe kanyana nyjɛ kee u yo yire pan e na. 14 Nii wa e kɛɛ, kee ŋga e jawa na ki nyu mu fraka e pan kpan, e ni pe ki yi. 15 La, e jawa e chin na, na e waa ni gbo, yire na leele mblɛ ee wa mu tni kakpɔɔ ŋga na kro we pimi li na e ni gbo finfin. La, ki pe kpra na o Tafun Nyiɛkpɔɔ wre u ni tun na ni pan mbe yire kee nyjɛ yo mbe e loo.”
16 Bawa loplombo pre na leele mblɛ praa wa wa kre na yo srawɔfɛɛnlɛ pre, na Nyiɛkpɔɔ keenyanyofɛɛnlɛ pre pan mbo, “Yaa shia blɔ ŋmba gbo, ŋgi na hin? O Tafun Nyiɛkpɔɔ wre mɛɛ nu u yire na paara kre.”
17 A loplombo pre plɛ na yiri mna yo leele mblɛ pra fni wa pre kro pan mbo, 18 “Judah ŋunu Hezekiah nyjila kre, Nyiɛkpɔɔ keenyanyofun Micah ŋmba wra yiri Moresheth na wre na kee nya mna yo Judah leele kro pan na, kee ŋga o Tafun Nyiɛkpɔɔ Jaŋgafun wre yuu yi kre, mbo,
Pie Jerusalem bru na see yi,
kie juari mbe kaari,
kramboe bri.
Mbe nyambie ŋga,
na pe Suminyuŋgo,
kre sin kre wuuro fin.
19 Kre nyjila kre Ŋunu Hezekiah, ndee ndro wa nsra Micah gbun mu gbo. Hezekiah naa o Tafun Nyiɛkpɔɔ wre fiɛ, mna u tali a wra u fooro le, kra tia Nyiɛkpɔɔ na u jawala chinɛ kanyana ŋga ni wraa chaa mbe pan o na kre na. Kena e le, na o Jeremiah gbo aŋga, kala kpɔɔ oo cha mbe oyɛ ŋga kre.”
20 Blɔ wa naa wa fa, praa u yeeri Uriah, a wra pe Shemaiah ŋmba wra yiri Kiriath-Jearim na wre biblɔ. Wre wra yiri mna o Tafun Nyiɛkpɔɔ wre mɛɛ tɛɛ mna paara mna o kakpɔɔ ŋga, na o waŋgra ŋga kro taan na chɔɔ, imi na Jeremiah pe aŋga ŋga. 21 Ŋga Ŋunu Jehoiakim na u loplombo kro, na u wifɛɛnlɛ na ki loo kre, a ŋunu wre naa chaa mbe u gbo. Ŋga Uriah na ki loo kre, fiɛrɛ na u yii a wra fɛ mna sɛ Egypt tra nu. 22 A Ŋunu Jehoiakim na je mna Acbor biblɔ Elnathan wre na leele plɛ wɔ mu tun Egypt tra nu wa. 23 A pra sɛ Uriah yii Egypt tra nu wa mna pan mu u le Ŋunu Jehoiakim kɛɛ, a wra tia pra brɔfiɛn yiɛshiin tɛɛ mna u gbo, mna sɛ u gboo viŋge mu wa lawee ŋga nu praa lewaala leni kre.
24 La, lekpɔɔ wa naa wa loplombo pre nu a praa u yeeri Ahikam, Shaphan biblɔ na wi, a wra yiri mu yire Jeremiah kro na, a kra tia pe nsra u le leele pre kɛɛ a pra u gbo.