Judah Leele Na Nebuchadnezzar Sumi
27
Ŋga pra Josiah biblɔ Zedekiah tɛɛ Judah ŋunumu na kre, ki nsra mu, a o Tafun Nyiɛkpɔɔ na paara mi Jeremiah pan mbo, 2 “Yurɔ hlɛ tɛɛ mu mɛnyi tin, mu kɛɛn prɔrɔprɔrɔ cha mu yi pɔ mu mbra, mu yi le yulɔ imi na pe nuu piin na fali na u ni kre. 3 Na mu kɔ kre, mbe mu sɛ ni kee ŋga yo Edom, na Moab, na Ammon tra kre ŋulo pan, pre na Tyre, na Sidon kakpɔɛ yire ŋulo, na Judah ŋunu Zedekiah na pe bitumblɔ pre pan na, 4 pre bitumblɔ pre, pe yo pe ŋulo pre pan na, kee ŋga mi pe Tafun Israel Jaŋgafun Nyiɛkpɔɔ wre yuu pe pan yi kre. 5 Ni faŋga, na ni jaŋga kpɔɔ ni ndaa tɛɛ mu tra ŋga, na ki leele, na ki yurɛ kro wa. A ŋmba ni chaa wre kɛɛ mbe tra ŋga wru mbe le. 6 Fuŋga rɛ, mbe e waŋgrɛ yire kro wru mbe le ni sumifun Babylon ŋunu Nebuchadnezzar kɛɛ. Nyaalam yurɛ kro we pe u jaŋga jaara. 7 Waŋgra ŋga mu chin ŋga kro, we u sumi. A pie u biblɔ, na u nana ŋmba we kɔɔ yiri u kɔkro sumi mbe sɛ su na nyjila we da na mbe ti u waŋgra kre to, mbe u waŋgra kre sɛ waŋgrɛ, na ŋulo jaŋgafɛɛnlɛ sumi ka na.8 Na ki pan na waŋgra ka, ndee ŋunu wa yo na wa Babylon ŋunu Nebuchadnezzar sumi, mbe uyɛ le u jaŋga jaara kre, mbe ti mbe klo, ndee yira sisaa, na ŋunɔ le pe nu mbe pe gbo. Pan mi e Tafun Nyiɛkpɔɔ wre yo. 9 Kena yaa ndie tɛɛ e keenyanyofɛɛnlɛ pre, na e chlɛfɛɛnlɛ, na mblɛ pe e ŋunɛ nɔɔ nyina, na e dobodobo wɔfɛɛnlɛ, na mblɛ pe paara na ŋumufuɛn ni pre kee nyjɛ pe yuu e pan na, ‘Yaka wa jaa ti mbe e Babylon ŋunu wre sumi pre kee na.’ 10 Kala pe fnɛ na nyaa na yuu e pan, ŋga kie ti pe e ta mbe yii mbe sɛ na e ni haalee mbe yili e tra ŋga nu. Mbe e ni mbe yili tra ŋga nu, a ee kla. 11 La, na waŋgra ka leele peyɛ nyjii mu Babylon ŋunu wre sumi kre, mbe ti mbe kre waŋgra kre leele pre titi tra ta mbe tni, mbe fali ki nu. Pan mi e Tafun Nyiɛkpɔɔ wre yo.”
12 Kre kala nunu kre chɔɔ ni yo Judah ŋunu Zedekiah pan na. Ni yo u pan na “Muyɛ nyjii mu Babylon ŋunu wre ŋga, mbe ŋu na mu leele kro u sumi, kre ee ŋmaa li. 13 Mni mbe mu ti mbe ŋu na mu leele ndikana pe, mbe ti mbe klo, na yira sisaa, na ŋunɔ pan mbe e gbo hin? O Tafun Nyiɛkpɔɔ wre yo na waŋgra ŋga leele pe n Babylon ŋunu sumi kre, yire kooloe nyjɛ na pie ku. 14 Kena yaashia ndie tɛɛ e keenyanyofɛɛnlɛ mblɛ pe nyaa na yuu e pan na, ‘Yaka wa jaa ti mbe e Babylon ŋunu wre sumi pre kee yire na.’ Kafinɛ kee pe nyaa na yuu e pan. 15 Mi Nyiɛkpɔɔ ma ni pe tun, kafinɛ kee pe nyaa na yuu e pan na ni mɛɛ ni. Na e je, mbe ti pe yire na pre yii, yire na e keenyanyofɛɛnlɛ pre ni mbe sɛ e gbo.”
16 A ndaa srawɔfɛɛnlɛ pre na leele pre kro yeeri mna yo pe pan na, “Kee ŋga o Tafun Nyiɛkpɔɔ wre yo yi na, yaashia ndie tɛɛ e keenyanyofɛɛnlɛ mblɛ pe yuu e pan na, kia mu, pie o Tafun Nyiɛkpɔɔ wre Suminyuŋgo yirɛ nyjɛ pra koli mu sɛ Babylon tra nu kre, pie ndru mbe pan na yi ni. Na pe yo ma, kena kala pe fnɛ e pan. 17 Yaashia ndie tɛɛ pe pan. E Babylon ŋunu sumi, kre ee ŋmaa ta. Na e waa taa pe kee yire kro, kre kakpɔɔ ŋga we ja mbe kaari kramboe bri. 18 Na keenyanyofɛɛnlɛ lɛ yɛŋgɛ, a mi Nyiɛkpɔɔ kee pe nyaa na yuu wala, kena e ti mbe pe mi Nyiɛkpɔɔ Jaŋgafun wre tali, mbe ki ti yirɛ hɛnyi nyjɛ yi kro Suminyuŋgo wa, na Jerusalem ŋunu katoo wa yire, mbe pia ndru mbe paan yi koli mbe sɛ Babylon tra nu na. 19 Ki tia kee ŋga o Tafun Nyiɛkpɔɔ Jaŋgafun wre yuu mu wru swafre pilaasi, na swafre Epo kre, na ki trogo kre, na keshian yirɛ nyjɛ yira kro Jerusalem na, 20 a Babylon ŋunu Nebuchadnezzar nsra yi wru mu sɛ Babylon tra nu, nyjila ŋga ni wra pan mna Judah ŋunu Jehoiachin, na Judah na Jerusalem loplombo titie pre yii mu sɛ kre.