Jeremiah Na Kafnu Keenyanyofun Hananiah
28
Yɛlɛ jijirɛwo ŋga nu pra Ŋunu Zedekiah tɛɛ Judah ŋunumu na kre nu chɔɔ kre, ki nyiɛpɔ kunɔ wo kre nu Azzur biblɔ Hananiah ŋmba wra yiri Gibeon na wre na pan mu yo mi Jeremiah pan. Na mi na srawɔfɛɛnlɛ pre, na leele pre kroo wa o Tafun Nyiɛkpɔɔ Suminyuŋgo wa mbo, 2 “Kee ŋga o Tafun Israel Nyiɛkpɔɔ Jaŋgafun wre yuu yi kre mbo, mi Nyiɛkpɔɔ we Babylon ŋunu wre jaŋga kre shɔ u kɛɛ. 3 Mna yɛlɛ shiin nyu na, mbe ndru mbe pan na Suminyuŋgo kre yirɛ nyjɛ Babylon ŋunu Nebuchadnezzar na koli mu sɛ yire kro ni mna. 4 A mbe ndru mbe pan na Judah ŋunu Jehoiakim biblɔ Jehoiachin, na Judah leele mblɛ pra yii mu sɛ Babylon tra nu pre kro ni mna. Ŋgi na hin? Mbe Babylon ŋunu wre jaŋga shɔ u kɛɛ. Pan mi e Tafun Nyiɛkpɔɔ wre yo.”5 A Nyiɛkpɔɔ keenyanyofun Jeremiah na keenyanyofun Hananiah wre nyu wɔ srawɔfɛɛnlɛ pre, na leele mblɛ praa wa mu yire Suminyuŋgo kre yiɛ na wa kre mbo, 6 “Ami, o Tafun Nyiɛkpɔɔ u ti mbe ki pe ma yɛŋgɛ. O Tafun Nyiɛkpɔɔ wre we ti mbe ki pe imi na mu ki nya mu yo, na pie ndru mbe pan Nyiɛkpɔɔ Suminyuŋgo kre yirɛ nyjɛ pra koli, na leele pre ni mu sɛ kre ni mna na. 7 La, e ti mbe ni yo mbe yire mblɛ ee wa mna ŋga kro loo. 8 Nyiɛkpɔɔ keenyanyofɛɛnlɛ jle wolo pre na nya mu yo na ŋunɔ, na kanyana, na yira sisaa we pan waŋgrɛ tataara nu, na ŋulo jaŋgafɛɛnlɛ na. 9 La, kre nyjila kre pe ŋmba we nya mbe yo na wejinyiŋge we pan kre, wre praa le na wre Nyiɛkpɔɔ tun yɛŋgɛ, mbe praa sri na pie ki nya ma.”
10 A Nyiɛkpɔɔ keenyanyofun Hananiah na kaan ŋga kraa wa Nyiɛkpɔɔ keenyanyofun Jeremiah yulɔ na kre laa mna ki kuari, 11 mna kna mu paara leele pre kro pan mbo, “Kee ŋga o Tafun Nyiɛkpɔɔ wre yuu yi kre mbo, mna yɛlɛ shiin, imi na ni kaan ŋga kuari ŋga, pan chɔɔ mbe jaŋga ŋga Babylon ŋunu Nebuchadnezzar lii waŋgrɛ na kre pe.” Ŋga kra pan ma kre, a Jeremiah na yiɛ wɔ mna sɛ u lawee.
12 Kre kee ŋga kɔkro kre, o Tafun Nyiɛkpɔɔ wre na paara na Jeremiah ni mbo, 13 “Sɛ yo Hananiah pan na, kee ŋga mi e Tafun Nyiɛkpɔɔ wre yuu yi kre mbo, u kaan kuari, fuŋga ki da tɔɔnrɔ na. 14 Kee ŋga Israel Tafun Nyiɛkpɔɔ Jaŋgafun wre yuu yi kre mbo, mbe tɔɔnrɔ titi le waŋgrɛ nyjɛ leele kro yulɔ, mbe pe kro sɛ Babylon ŋunu Nebuchadnezzar sumi, hali mbe ti u jaŋga ta nyaalam yurɛ kro na.”
15 A Jeremiah na kna mu yo Hananiah pan mbo, “Hananiah loo, o Tafun Nyiɛkpɔɔ wre ma u mu tun, a mu pan mu leele pre jawala kna, mu tia pe kafinɛ kee shɔ mu li. 16 Ki tia kee ŋga o Tafun Nyiɛkpɔɔ wre yuu yi kre mbo, ni paan mbe mu wɔ mbe yili waŋgra ŋga nu. Mu ku ala yɛlɛ ŋga nu, ŋgi na hin? Mu pan mu paara leele pre pan mu tia pe yiri mu o Tafun Nyiɛkpɔɔ wre taan.”
17 Ki tia kre yɛlɛ kre nyiɛpɔ kɔɔnashinwo kre nu, kre Hananiah, Nyiɛkpɔɔ keenyanyofun wre na ku.