4 “Kee ŋga Israel Tafun Nyiɛkpɔɔ Jaŋgafun wre yuu Jerusalem leele mblɛ pe yii mu sɛ Babylon tra nu kre pan yi kre, 5 e kalonyi sin e tni yi nu, e kagblɛ pe e yi yirɛ ta e kun e li. 6 E leŋge e bibilɛ na bichiɛlɛ se se, e chiɛlɛ cha e e bibilɛ pre ŋga, mbe e bilɛ cha mbe e bichiɛlɛ pre ŋga mbe pe leŋge. E se nɛɛrɛ Babylon tra nu, yaashia se fiɛn. 7 E nyiɛtali mbe wejinyiŋge pan tra ŋga nu ni tia pe e yii mu sɛ kre nu, mbe ki leele kɛ nyu. Ŋgi na hin? Na ki pan ma, yire kɛ we nyu na. 8 Kee ŋga o Tafun Israel Nyiɛkpɔɔ Jaŋgafun wre yuu yi kre, yaa ti mbe keenyanyofɛɛnlɛ, na chlɛfɛɛnlɛ mblɛ pee wa e nu e fana. A yaa ndie tɛɛ ŋunɛ nyjɛ e pe leni gbeŋmbaa pra ŋunu yire na. 9 Mi e Tafun Nyiɛkpɔɔ wre yo na, ni mɛɛ pe tɛɛ na kala fnɛ e pan, mi ma ni pe tun.

10 Kee ŋga o Tafun Nyiɛkpɔɔ wre yuu yi kre, na Babylon waa jaŋga li yɛlɛ fuloe taarɛ na kɛ mu kɔ kre, mbe pan e pan mbe e nyina ni dumiɛn nyu kee ŋga ndaa yo kre, a mbe ndru mbe pan na e ni mna. 11 Mi ni chin jawala ŋga ni wru na e ni. Jawala ŋga kie ti mbe e nyu, kla ma ni chaa mbe e kla. Jawala ni wru na e ni mbe ki ti e dankna ta, mbra kaan baŋga na. Pan mi Nyiɛkpɔɔ yo. 12 Na ki pan ma, ee ndru mbe pan ni pan mbe ni tali mbe ni ya e na, a mbe loo e pan. 13 Na e ni haa cha ee ni nya, ŋgi na hin? E lɛɛ wɔ mu na ni haa chaa. 14 Mi e Tafun Nyiɛkpɔɔ wre yo na, na e ni haa cha kre, ee ni nya, a mbe e wɔ mbe yili e tnibim nu, mbe e yoori mbe yili waŋgrɛ, na lawee nyjɛ nu ni e gbun mu nyina yire nu, mbe ndru mbe pan na e ni tra ŋga nu ndaa e wɔ mu sɛ kre nu. Pan mi e Tafun Nyiɛkpɔɔ wre yo. 15 Ee na yuu na, o Tafun Nyiɛkpɔɔ wre o ŋga keenyanyofɛɛnlɛ Babylon tra nu. 16 La, kee ŋga o Tafun Nyiɛkpɔɔ wre yuu mu wru Ŋunu David nana ŋmba u jɔɔn li kre, na leele mblɛ pe kro Jerusalem, na e wolo mblɛ pe nsra yii mu sɛ pre haa yi kre. 17 O Tafun Nyiɛkpɔɔ Jaŋgafun wre u ki yo mbo, mbe ti mbe ŋunɔ, na klo, na yira sisaa le e nu, mbe ni e pe na fig tiŋge ŋga sɛnyi yi kla, a yia jaa li yi. 18 Mbe pe kɔŋgɔ ni na brɔfiɛn yiɛ shiin, na klo, na yira sisaa ni, a mbe ti mbe pe kee pe kpɔli ni waŋgrɛ yire kro pan tra ŋga yiɛ na, a waŋgra ŋga nu mbe pe ni mbe sɛ kre, pe kee we pe bin mbe praa pe suni, mbe pe mɛɛ kuraa pe afuŋgo yira pe pan. Pia pe le mbe nya, a pie na pe pini mbra tɛɛ. 19 Ŋgi ndra na hin? Pe n ndie tɛɛ ni kee na, na mi ndaa ni sumifɛɛnlɛ mblɛ lɛ ni keenyanyofɛɛnlɛ tun na ni kee ni pe pan gbee tataara. A yire mblɛ pe yii mu sɛ Babylon tra nu pre je, a e n ndie tɛɛ ni kee yire na. Pan mi e Tafun Nyiɛkpɔɔ wre yo.

20 Kena yire mblɛ ni tia pe yii mu sɛ Babylon tra nu kre, e kee ŋga e Tafun Nyiɛkpɔɔ wre yuu loo. 21 Kee ŋga o Tafun Israel Jaŋgafun Nyiɛkpɔɔ wre yuu mu tro Kolaiah biblɔ Ahab wre, na Maaseiah biblɔ Zedekiah mblɛ pe kafinɛ kee nyaa na yuu ni mɛɛ nu pre haa yi kre, mbe pe wru mbe le Babylon ŋunu Nebuchadnezzar wre kɛɛ, mbe u pe gbo e yiɛ na. 22 Na ki pan ma kre, Judah leele mblɛ pe yii mu sɛ Babylon tra nu kre, na wa chaa mbe ndro sun, kee ŋga we yo yi na, o Tafun Nyiɛkpɔɔ u ufun pe imi na wra tia Babylon ŋunu na Zedekiah, na Ahab pe kre. Wre wra tia pra pe le kanhun, a pra shɔ mu ku. 23 Ŋgi ndra na hin? Pra sisam kee titi pe Israel tra nu, na sni na pe tnifɛɛnlɛ chiɛlɛ ni, mu ni mɛɛ tɛɛ na kala fnɛ. Kee nyjɛ ni n yo pe pan yire pe yuu. Kee nyjɛ pe piin yire kro, ni yi nya. Ni yiɛ ŋga na yi kro piin. Mi e Tafun Nyiɛkpɔɔ wre ni ki yo.”

24 O Tafun Nyiɛkpɔɔ Jaŋgafun wre na yo ni pan na ni yo Shemaiah ŋmba u yiri Nehelam na wre pan na, 25 kee ŋga Israel Nyiɛkpɔɔ Jaŋgafun wre yuu yi kre, ŋu mu ŋu titi mɛɛ tɛɛ mu hlɛ nyunɔ mu sɛ Jerusalem leele, na srawɔfun Maaseiah biblɔ Zephaniah wre, na srawɔfɛɛnlɛ hamblɛ pre kro ŋga, mu na yuu Zephaniah pan na,

26 “O Tafun Nyiɛkpɔɔ wre mu wɔ srawɔfun mu tɛɛ Jehoiada titɛɛ, mbe mna o Tafun Nyiɛkpɔɔ Suminyuŋgo kre le. Kena mu tnumu yi na tɔɔlɔfun ŋmba we uyɛ pe na Nyiɛkpɔɔ keenyanyofun wi kpan, u yii mu sɛɛrɛ le u lagboo, na u jeelee na. 27 A yira ŋgi ki tia mu n Jeremiah ŋmba u yiri Anathoth na, mu na uyɛ piin na Nyiɛkpɔɔ keenyanyofun wi e nu wre yii mu u yiɛ kee yo u pan hin? 28 Wre wra hlɛ nyunɔ mu pan mu o ŋga Babylon tra nu na, oo mu tra ŋga nu, kena o nyinyi sin sin mbe tni, mbe kagblɛ pe mbe sro ta mbra lii.”

29 A srawɔfun Zephaniah na hlɛ kre tɔɔnri mna mi Nyiɛkpɔɔ keenyanyofun Jeremiah nyina. 30 A o Tafun Nyiɛkpɔɔ na paara mi Jeremiah ni mbo, 31 “Sɛ yo leele mblɛ pe yii mu sɛ Babylon tra nu pre pan na, kee ŋga o Tafun Nyiɛkpɔɔ yuu mu wru Nehelam ndro Shemaiah wre haa yi kre mbo, ŋga Shemaiah kee nya mu yo e pan, a mi ma ni u tun, a u tia e kafinɛ kee shɔ mu li kre ndra na, 32 mbe wre na u nanae ndie tini imi na ki fna, ndro wa kro u nɔɔ leele nu. A chichie ŋga mbe ni leele pe kre, wa ka nya. Ŋgi ndra na hin? U paara leele pre pan, a pe yiri mu ni taan.”