Nyiɛkpɔɔ We Israel Leele Shɔ
30
Kee ŋga o Tafun Nyiɛkpɔɔ na yo Jeremiah pan na yi kre mbo, 2 “Mi e Tafun Israel Nyiɛkpɔɔ wre yo na, kee nyjɛ ni yo mu pan yire kro nyunɔ mu le hlɛ nu. 3 Nyjila kaa wa na paan, mbe ni ni leele Israel, na Judah leele pre wɔ pe tnibim nu, mbe ndru mbe pe tɛɛ tra ŋga ndaa pe tolɛɛlɛ ŋga fa kre nu. Pan mi Nyiɛkpɔɔ yo.”4 O Tafun Nyiɛkpɔɔ wre na yo Israel, na Judah leele pre pan mbo,
5 Tɔɔra, na nyɛnɛɛ kee bribri
ni ndru,
fiɛrɛ nyɛnɛɛ ni ndru,
wejinyiŋge kee ma.
6 E wie e loo,
e da mu nya a blɔ siire ta
mu se tuun?
A mni ki le a bilɛ faŋgafɛɛnlɛ,
pre kro kɛnyi taa lɛɛ na,
na siire lɛɛ ki chlɔ yaa,
a pe yiɛ fniŋge fwaa ŋga hin?
7 Kre ble kre we pe
kanyana ble kpɔɔ,
ŋga ka ki n da mu pan tun.
Kre ble kre we pe kanyana ble,
mbe Jacob nanae pre ŋga.
La, mbe pe shɔ mbe yili kre,
kanyana kpɔɔ kre nu.
8 O Tafun Jaŋgafun Nyiɛkpɔɔ wre yo mbo,
Kre ble kre mbe pe shɔ jaŋga,
ŋga ki pe lii kre nu,
mbe sɛɛrɛ nyjɛ pe le pe na,
yire pile mbe wo.
A waŋgra ka leele wa pe ta,
mbe pe tinlɛ na.
9 Na ki pan ma,
pie mi pe Tafun Nyiɛkpɔɔ
wre na ŋunu David nana,
ŋmba mbe wɔ,
mbe u pe pe ŋunu wre sumi.
10 Kena yire Jacob nanae pre,
yaa fiɛ,
Israel leele,
yaa ti mbe e yiɛ je,
mi e Tafun Nyiɛkpɔɔ,
wre ni ki yo.
Mbe yire,
na e nanae kro shɔ,
mbe yili haalee tra,
ŋga nu pe e yii mu sɛ kre.
Yire Jacob nanae pre,
we wejinyiŋge ta,
ndro wa jaa e pe yaka ndee,
mbe e piɛri, mbe fiɛrɛ e yii na.
11 Mba laa e kro, mbe e shɔ.
Waŋgrɛ nyjɛ nu ni e gbun,
mu nyina yire kro,
mbe yi kla, la, mba e kla kro.
Mbe e ndie tini, la, mbe dɔɔta.
Mba ti mbe e eyɛ wru,
mbe li mbe e ndie tini chiɛri.
12 Kee ŋga o Tafun Nyiɛkpɔɔ wre yuu yi kre mbo,
Klɛ nyjɛ yi to to e na
yire wa jaa tra,
ndro wa jaa yaka pe e na,
mbe e saanla.
13 Ndro n wa mbe tali mbe e ŋga,
a kre tuwe n wa,
mbe jaa ti mbe e klɛ yire kɔ,
a yaka wa jaa e tra.
14 E nɔɔlɔ kro e kee fɛɛ,
a pe kee ka ma na e ni na.
Ni e gbun mu chan,
na e loŋgo u e ta,
mu na e ndie tinii,
na ndra shelifun wa u e ta.
Ŋgi na hin? E sisam nɛɛ mu tro,
a ki tia e pimi li kpɔɔ.
15 Finfin e nyɛni,
e yira kre n wa na tuwe ni.
Ŋgi na hin?
E sisam kpɔɔ pimi li,
kre ki tia ni e pe ma.
16 La, e loŋgoolo mblɛ,
pe e dɔɔya kre,
mbe pe dɔɔya na.
E loŋgoolo pre,
pie pe yii mbe sɛ,
waŋgra fɔŋgɔ nu na.
Mblɛ pe e foolo pre,
pie pe foolo na.
17 Mbe ndru mbe e ŋga faŋga na,
mbe e klɛ yire tra, ŋgi na hin?
Ndro kro e wɔ mu ŋga,
a pe kee ka ma,
na yire Jerusalem leele ni na.
Pan mi e Tafun Nyiɛkpɔɔ,
wre yo.
18 Kee ŋga o Tafun Nyiɛkpɔɔ yuu yi kre mbo,
Mbe ndru mbe pan,
na ni leele pre ni,
pe tra kre nu na,
a mbe pe fooro le,
a pie pe kakpɔɔ Jerusalem
kre sin, ki titɛɛ wa na,
a pie ŋunu katoo kre sin,
ki lawee lɛɛ kre nu.
19 Leele mblɛ pie tni wa,
pre we mboo ŋgaa mɛɛ kɔ,
mbe yɛshɔɔrɔ gble le wa,
a mbe ti mbe pe nɛɛ mbe ya,
a ka wa kun pe nɛɛmu na.
Pie buuro ta,
a ndro wa pe le fiɛn na.
20 Pie peyɛ ta na jle kre yi,
mbe waŋgra kre yire gbiŋmbi na,
a ŋmba we pe fiŋge kpan,
mbe u ndie tini.
21 Pe wa chɔɔ we yiri,
mbe pe pe ŋunu.
Mbe kɛ wa mbe U yeeri,
mbe U flo mbe da ni na.
Ŋgi na hin?
Na ni n kɛ wa mu ndro yeeri,
wa ja mbe pan ni pan.
Pan mi e Tafun Nyiɛkpɔɔ,
wre yo.
22 Kena na ki pan ma,
ee pe ni leele,
mbe ni pe e Nyiɛkpɔɔ na.
23 E le, o Tafun Nyiɛkpɔɔ wre,
krɔkuɔn kre,
kie pe na nyiɛ fuflɛ,
ki gbuun kpɔɔ titi.
Kie pan mbe sisampefɛɛnlɛ,
pre fɔ mbe chan.
24 U krɔkuɔn ŋga kii fiɛrɛ ni,
kre wa nyjii,
fɔna u kee ŋga kii wa,
u gbun na kre, pe tun.
Ble kaa wa na paan,
ee kre kee ŋga nɔɔ loo chiriri.