Israel We Ndru Mbe Pan Nyiɛkpɔɔ Pan
31
O Tafun Nyiɛkpɔɔ wre na yo mbo, “Kre nyjila kre nu, mbe pe Israel jlom yire kro Nyiɛkpɔɔ na, mbe pe kro pe ni leele. Mi e Tafun Nyiɛkpɔɔ wre ni ki yo.2 Leele mblɛ pie shɔ,
brɔfiɛŋunu kɛɛ kre,
mbe nyu pe na,
tablɔ tra kre nu.
Israel leele pre,
mbe ti mbe pe wuu.”
3 Fa kre, o Tafun Nyiɛkpɔɔ wre na uyɛ wɔ mna o nyina mna yo o pan mbo,
“Ni e kori lɛɛ nunu ni
nyjila kro nu,
kre ki tia ni frɔ ta mu e ŋga,
mu e tini mu mbra niyɛ na.
4 E keshian wa ni na,
kena mbe ti,
mbe e waŋgra kre yire na,
mbe e yiri mbe e yambrawa wru,
mbe yili mbe sɛ yɔ,
mbe yɛshɔɔrɔ kpɔɔ li.
5 Ee ndru mbe tre seele pe,
Samaria nyambie yire na,
mbe yi sɛnyi kun mbe li.
6 Ki blee wa na paan,
mbe lawee shiefɛɛnlɛ,
pre yire Ephraim nyambie yire na,
mbe gble le mbe yo mbo,
e pan mbe o sɛ,
o Tafun Nyiɛkpɔɔ wre pan,
Zion nyua kre na Jerusalem na.”
7 Kee ŋga o Tafun Nyiɛkpɔɔ wre yuu yi kre, mbo,
“E yɛshɔɔrɔ mɛɛ kɔ,
e Israel leele mblɛ lɛ,
Jacob nanae pre ŋga.
E yɛshɔɔrɔ gblee le,
e waŋgra ŋga,
kraa wa fafa kre ŋga.
E mboo ŋgaa mɛɛ kɔ,
mbe pe loo,
e yo o Tafun Nyiɛkpɔɔ,
wre pan na,
u Israel leele hamblɛ,
mblɛ pe kro pre shɔ.
8 Le, mbe pe wɔ,
mbe yili nyjeerihaa tra kre nu,
mbe pe yoori lawee kro nu,
mbe pan na pe ni.
Fuunlo, na finla, na siirefɛɛnlɛ,
na mblɛ siire lɛɛ yaa,
kro we chaa pe nu.
Pe mblɛ pie ndru,
mbe pan pre we nɛɛ titi.
9 Na ni paan na pe ni,
Yɛshɔɔrɔ nyɛnɛɛ ni,
pie na paan mbra nyiɛtali.
Mbe yiɛklu pe pan,
mbe tro na pe ni,
lafooloe nyjɛ yi fuu mbɛɛlɛ na,
mbe tro na pe ni,
kooloe mbrɛrɛ na,
imi kie pe mbe wa wa gbro.
Ŋgi na hin?
Mi wi Israel leele pre lɛ,
a pre lɛ ni bijlo.”
10 Yire waŋgrɛ hɛnyi yire,
e kee ŋga o Tafun Nyiɛkpɔɔ,
wre yuu loo,
E u kee kre kpali haalee,
epo nyu trɛ yire na.
Wre Nyiɛkpɔɔ ŋmba wra,
Israel leele gbun mu nyina kre,
we ndru mbe pe nyu ble titɛɛ,
mbra pe le,
imi na mbaala lefun,
u mbaala le kre.
11 Ŋgi na hin?
O Tafun Nyiɛkpɔɔ wre
we pe shɔ mbe yili
loŋgoolo mblɛ pe sheli,
mu wɛ pe na pre kɛɛ.
12 Pie pan mbe yɛshɔɔrɔ gble le,
nyua Zion kre na,
a pe yɛshɔɔrɔ we kpɔɔ,
yirɛ nɛɛrɛ nyjɛ,
o Tafun Nyiɛkpɔɔ,
wre we pe ŋga yire na,
yua, na simi fɔŋgɔ,
na olive simi,
na mbaala, na nui.
Pan pie pe na kagbla,
ŋga kii wa lɔɔ mbɛɛ na yi,
pia fooro li na.
13 Pe bichabɛɛlɛ we na yoo,
mbe pe yiɛshɔ,
a pan pe nyanyjɛbɛɛlɛ,
na pe blɛlɛɛlɛ kro we pe.
Mbe ti mbe pe nyɛnɛɛ kaari,
pe yɛshɔɔrɔ.
Mbe pe bre,
mbe ti pe yɛshɔɔrɔ kpɔɔ,
a pia fooro li na.
14 Mbe ti mbe srawɔfɛɛnlɛ,
pre li mbe yɔɔ,
mbe ti mbe leele pre yirɛ nyjɛ,
mu chin ŋga kro ta.
Mi, e Tafun Nyiɛkpɔɔ,
wre ni ki yo.
Israel Leele Fooroo Wa Nyiɛkpɔɔ Na
15 Kee ŋga o Tafun Nyiɛkpɔɔ wre yuu yi kre mbo,
Mana ka yilii Ramah na,
wrekroo nyɛnɛɛ badaaŋga yi,
Rachel u biile nyɛni,
hali ndro wa jaa u bre,
ŋgi na hin?
Wa u biile pre nya na.
16 Kee ŋga o Tafun Nyiɛkpɔɔ wre yuu u pan yi kre mbo,
Maa nyɛni, muyɛ yii,
mu mu yetunyi tlu,
ŋgi na hin? Ŋga mu pe,
mu mu biile pre ŋga kre,
mu ki fɔtɔɔrɔ ta.
Pie yili pe loŋgo wre tra nu,
mbe ndru mbe pan.
17 Kaanhaa wa mu pan mbakɔ.
Mu biile pre we ndru pe kro,
mbe pan pre titi tra nu.
Pan mi e Tafun Nyiɛkpɔɔ wre yo.
18 Ni Israel leele wrekroo kee,
nyjɛ pe yuu yire loo,
pe yuu mi Nyiɛkpɔɔ pan na,
pan mu o pe na katoo yurɔ,
ŋmba nyibie ki sheli wi,
a mna o nyina kolo
ŋga na oo tro,
mbe li mu kee na.
O chaa mbe ndru
mbe pan mu pan,
ŋgi na hin?
Ŋu wi o Tafun Nyiɛkpɔɔ.
19 Ŋga o na fɛ mu laa mu na kre,
o na ndru mu o jawala chinɛ.
O na oyɛ nɔɔ loo,
mna kɛ taa ndra na.
Nyifɛɛrɛ na o gbo,
a o na pe lofee,
ŋgi na hin?
O na sisaa pe mu yire o bimi.
20 Israel leele pe biile,
mblɛ kee ki sheli ni na,
a ni pe kori.
Kii wa na ni kee yuu pe na,
nde ni pe sɔɔnri,
a pe kee wa ni gbun na,
a mbe pe fooro le.
Pan mi, pe Tafun,
Nyiɛkpɔɔ wre yo.
21 E kɛɛn kan e yi tɛɛ,
e kooloe yire tnɔ,
e kokpɔɔ ŋga na e na tro,
mu sɛ kre haa cha.
Israel leele e kre kolo kre yii,
e ndru e pan,
e ndru e pan e chiɛ yire na.
22 Ŋgi nyjila nu ee lami,
mbe sɛ su hin?
Lɛɛ lafɛɛnlɛ.
O Tafun Nyiɛkpɔɔ wre paan,
mbe kefɔŋgɔ ka pe tra yiɛ na.
E chin na blɔ u kɛ toni chlɔ na,
la, kie pan mbe chlɔ kɛ tɔ
blɔ na.
23 Kee ŋga Israel Nyiɛkpɔɔ Jaŋgafun wre yuu yi kre mbo, “Na mbaa pe shɔ mu yili pe tnibim nu mu pan na pe ni Judah tra nu kre, yire chiɛ yire leele we na yuu na, o Tafun Nyiɛkpɔɔ wre we u nyua cheche ŋga na Suminyuŋgo kre nyi Jerusalem na, a wre Nyiɛkpɔɔ wa, mu tni wa kre dwan. 24 Leele we chaa mbe tni Judah, na ki chiɛ yire na kro, pe falifɛɛnlɛ, na yurɛ lefɛɛnlɛ mblɛ pe kila na pe yurɛ ni na tro kro. 25 Mbe ti mbe pe mblɛ pe fna pre wuu, mbe mblɛ klo ta a pe faŋga kɔ pe nu pre yɔɔ.”
26 A ŋmba u sni kre, we ŋunu mbe nyi, mbe yiɛ wa mbe le mbe fɛ mbe kun, mbe yo na ni ŋunu, a ki tna ni pan.
27 “Nyjila kaa wa na paan, mi e Tafun Nyiɛkpɔɔ wre we ti mbe Israel, na Judah tra kre, mbe leele na yurɛ ki nyi. 28 Imi na ndaa le a pra pe kɔ pe chiɛ na, mna pe gbun mu nyina, mna pe plɛ kla kre, pan chɔɔ mbe pe le mbe pe luu na tiŋge yi, mbe pe yire. Pan mi pe Tafun Nyiɛkpɔɔ wre yo. 29 Na kre nyjila kre waa da, ndro wa nyu nyaa mbe yo na,
‘Lɛɛlɛ na loolo tinyi sɛnyi,
nyjɛ yi taan li,
a pe biile ŋgaala taan pe na.’
30 La, ŋmba we tiŋge sɛŋgɛ ŋga ki taan li kre, wrefun ŋgaala yie taan u na. Sisam ŋga ndro we pe kpan, ki tlo we ku.”
31 O Tafun Nyiɛkpɔɔ wre yo mbo,
“Nyjila kaa wa na paan,
mbe ni nyu nunu fɔŋgɔ pe,
na Israel, na Judah leele ni.
32 Kia pe na nyu nunu
ŋga ndaa pe na pe tolɛɛlɛ ni
nyjila ŋga nu,
ndaa yiɛ klu pe pan,
mna pe wɔ mu yili,
Egypt tra nu kre yi.
Ŋgi na hin?
Ndaa pe pe na pe plɔ wi mi,
a nde pra je
mna kre nyu nunu kre kla.
Pan mi pe Tafun Nyiɛkpɔɔ
wre yo.
33 Nyu nunu ŋga mbe pe,
na pe ni yi kre,
mbe ni mbra yire le,
pe jawala nu,
mbe yi nyunɔ pe lolonyi nu.
A mbe pe pe Nyiɛkpɔɔ na,
mbe pre pe ni leele.
34 Ndro wa u tnifun,
ndee u chunu nyina na ki fna,
mbe u mi Nyiɛkpɔɔ chin.
Ŋgi na hin? Pe kro we ni chin,
mbe yire pe bɛɛlɛ na,
mbe sɛ su pe lekpɔɛ kro na.
Ŋgi na hin? Mbe pe sisam ti,
mbe pe kɛ, mba yi sɔɔnri na.
Mi e Tafun Nyiɛkpɔɔ wre,
ni ki yo.”
35 O Tafun Nyiɛkpɔɔ wre u tia,
yila na nyaa nyisee na,
mu tia yeŋge na wɔɛlɛɛ,
na nyaa blee.
Wre u tia epo na mbapilɛ,
waa na tini.
U mɛɛ yi,
o Tafun Nyiɛkpɔɔ Jaŋgafun.
36 Ŋga nii wa
mu pe Nyiɛkpɔɔ ŋga,
kena Israel we pe,
waŋgra nyjila kro nu.
Pan mi e Tafun Nyiɛkpɔɔ,
wre yo.
37 Kee ŋga o Tafun Nyiɛkpɔɔ wre yuu yi kre mbo,
Na ndro we jaa yiri,
mbe nyiɛ yiɛ kra,
mbe jaa chin,
mna tra hɛ su kre,
kena ki ble kre,
mbe Israel nanae pre kro je,
pe kee nyjɛ pe pe yire na.
Pan mi Nyiɛkpɔɔ wre yo.
38 Nyjila kaa wa na paan mbe pe ndru mbe kre Jerusalem kakpɔɔ ŋga sin na, mbe ki sam fɔŋgɔ kre yire Hananel nyuŋgo gedeŋge kre na, mbe sɛ su jlonwee kɔm wo kre na. 39 Kie fraka mbe tro nyambie ŋga pe yeeri Gareb kre na, mbe kna mbe yiɛ le Goah na. 40 Kre landɛɛ ŋga nu pe gboolo na srawɔ tɔɔnrɔ woni kre, mu sɛ su Kidron landɛɛ kre yila finhaa mbe yire wa mbe sɛ su Soolo Jlonwee kre kɔm nu, yi krɛrɛ we pe cheche lawee mbe mi e Tafun Nyiɛkpɔɔ wre ŋga. Yaka n wa mbe jaa kakpɔɔ kre kɔ ki titɛɛ mbe ki kla na fio.