3 Kena na Judah ŋunu Zedekiah klu mu tia pe Jeremiah le nyuŋgo. Ŋgi na hin? Mbo wra o Tafun Nyiɛkpɔɔ kee nya mu yo na, Jerusalem we to Babylon ŋunu kɛɛ. 4 Judah ŋunu Zedekiah wa shɔ Babylon ŋunu wre kɛɛ, pie u yii kɛ na mbe sɛ le ŋunu wre kɛɛ, mbe pe kro shiin peyɛ yiɛ nya mbe paara na peyɛ ni. 5 Mbe ti mbe Zedekiah kro Babylon na mbe sɛ su na mbe u ndie tini, hali na wre na u leele we wi na Babylon leele pre ni kuraa kre, pia pe ja.

6 Jeremiah na yo mbo, o Tafun Nyiɛkpɔɔ na paara ni pan mbo, 7 “Mu nalɔ Shallum ŋmba biblɔ wi Hanamel wre we pan mbe yo mu pan na, sɛ ni tra ŋga kii wa Anathoth ŋga kii wa Benjamin tra nu kre lɔ, ŋu ki fna mu ki lɔ, ŋgi na hin? Ni sele ndro titi wi ŋu.”

8 Yɛŋgɛ na, imi na o Tafun Nyiɛkpɔɔ na yo kre, ni nalɔ pɔ Hanamel wre na pan ni pan, na nii wa ŋunu katoo lawee shiefɛɛnlɛ pre lawee, mna pan mu yo ni pan mbo, ni tra ŋga kii wa Anathoth na Benjamin tra nu kre lɔ. Ŋgi na hin? Ŋu mu fna mbe ki lɔ mbe ki kro sele kre nu, mbe pe mu wo.

Ndaa chin na o Tafun Nyiɛkpɔɔ wre wra paara ni pan yɛŋgɛ. 9 Ndaa kre tra kre lɔ ni nalɔ pɔ Hanamel wre pan kie pe swafiŋge kra dnɛ kɛmbɔkɔɔnashin. 10 O na hlɛ pe ki na, a ndaa kɛ le ki jaara, a dansiɛfɛɛnlɛ na pe kɛ le ki jaara na, a pra chin mna swa kre kra mna u ŋga. 11 A ndaa yire hlɛ shiin nyjɛ nu pra tra kre prɛ kee nyunɔ mu le yire wru. Pra nunu nyu tɔ, a pe n sra haŋa kre nyu tɔ. 12 A ndaa yi wru mna le Neriah biblɔ wa praa u yeeri Baruch a wra pe Mahseiah nana wre kɛɛ. Na ni nalɔ pɔ Hanamel wre na dansiɛfɛɛnlɛ mblɛ pra kɛ le hlɛ kre jaara kre, na Judah leele pree wa mu tni lawee shiefɛɛnlɛ pre kagbala vankam kre nu.

13 A ndaa yo Baruch pan pe kro yiɛ na na, 14 O Tafun Jaŋgafun Israel Nyiɛkpɔɔ wre yo na mu hlɛ shiin nyjɛ shɔ, mu yi le chɔ nu, yi le mbe yi jaa mu, mbe yɛlɛ tataara li. 15 Ŋgi na hin? Kee ŋga o Tafun Israel Nyiɛkpɔɔ Jaŋgafun wre yuu yi na, leele we ndru mbe katoe, na trɛ, na tre seele lɔ tra ŋga nu na.

16 Ŋga ndaa hlɛ yire wru mna Neriah biblɔ Baruch wre ŋga mu kɔ kre, a ndaa o Tafun Nyiɛkpɔɔ wre tali mna yo na,

17 “Jaŋgafun Nyiɛkpɔɔ, ŋu mna mu jaŋga kpɔɔ kre tɛɛ mna nyjeeri na tra wa. Ki nyina na yaka n wa, a ma jaa ki pe. 18 Ŋu mu tia leele kagbenyi kagbenyi mu koroo nya, a ŋu mu biile lɛɛlɛ sisam tɛɛ na pe biile ndie tinii. Ŋu wi Nyiɛkpɔɔ ŋmba jaŋga ki kpɔɔ, a mu mɛɛ yi Jaŋgafun Nyiɛkpɔɔ. 19 Kaalɛɛ nyjɛ mu jawa mbe pe, na mu kepele kro nyu, mu sna. Kooloe nyjɛ na leweele tro kro mu yi nyaa, a mu lewo kepele le na u fɔlɔ toni imi na ki fna. 20 Ŋu mna kawako kee pe Egypt tra nu o tolɛɛlɛ pre nyjila, hali muu wa na yi pini mu pan mu su aŋga na. Mu yi pe Israel leele, na leele kro nu, ki tia mu mɛɛ sɛ lawee kro nu. 21 Ŋu mna kawako na sɛmbɛɛrɛ kee pe na mu jaŋga kpɔɔ kre ni, a fiɛrɛ kpɔɔ na wo Egypt leele pre na, a mna Israel leele pre wɔ mu yili wa. 22 Ŋu mna pan na pe ni tra ŋga nu, mna da mu pe tolɛɛlɛ ŋga na mu pe ŋga ki yi, a ki pe tra taan, mu nyu. 23 Ŋga o tolɛɛlɛ na pan mu ki wru mu tni kre, pe nsra ndie tɛɛ mu pan, ndee mna li mu mbra yire na, a pe nsra taa mu nyu kee yire na, a kra tia pra yire kanyana kpɔɛ nyjɛ cha mu peyɛ ŋga.

24 Le imi na Babylon leele pan mu yirɛ fa mu gbun kakpɔɔ kre mboo na, mbe yire yi na mbe wi mbe ki shɔ. Brɔfiɛn yiɛshiin, na klo, na yira sisaa we ti mbe o to Babylon leele pre kɛɛ. Kee ŋga mu yo kre pe ma yɛŋgɛ, imi na mu ki nyaa ŋga. 25 Ŋu Jaŋgafun Nyiɛkpɔɔ, mu chin na mu kakpɔɔ ŋga wru mbe le Babylon leele pre kɛɛ, mni ki pe a mu yo na ni swa fiŋge tɛɛ mbe tra lɔ mbe dansiɛfɛɛnlɛ wɔ ki na hin?”

26 A o Tafun Nyiɛkpɔɔ na yo Jeremiah pan mbo, 27 “Mi wi waŋgra ŋga kro kro tafun Nyiɛkpɔɔ. Yira ŋgi kii wa a mba jaa ki pe hin? 28 Ki tia kee ŋga mi e Tafun Nyiɛkpɔɔ wre yuu yi kre, ni paan mbe kakpɔɔ ŋga wru mbe le Babylon ŋunu na u leele kɛɛ. 29 Pie pan mbe ki tɔ, mbe kanhun le ki na mbe ki sro mbe wo, kre na ki nyinyi nyjɛ ndrɛ na praa pe tuwe ndiom tɛɛn sroi na pe sɛɛn Baal kaan, na simi woni pe sɛɛnlɛ yire na, na ni krɔ kuun kre. 30 Aŋga ma Israel na Judah leele yire na sisaa piin ni na, pe bimi pe yire na ki ni. Kee nyjɛ Israel leele chin kro yi na, pie pe kɛnyu yirɛ nyjɛ pe pini yire tɛɛ mbe ni krɔ kun. Pan mi pe Tafun Nyiɛkpɔɔ wre yo. 31 Mu yire ŋga pe kakpɔɔ ŋga pɔ mu pan mu su aŋga na, ki leele wa mu na ni krɔ kuun imi na ki n fna, kena ki fna mbe ni pe kɔ mbe flo ni yiɛ. 32 Israel, na Judah leele, na pe ŋulo, na pe loplombo, na pe srawɔfɛɛnlɛ pre, na pe keenyanyofɛɛnlɛ kro, ni krɔ kun na pe sisam nyjɛ pe pini yire ni. 33 Ni paara mu pe nyina gbee tataara, hali mu pe ndie tini, a pe je pia loo mbe chinɛ, mu krɔ kna mu wa ni na. 34 Pe pe afunyi sɛɛnlɛ yire tɛɛ ni Suminyuŋgo ŋga na ni mɛɛ taa kre nu, mu ki tɔ na nɛɛrɛ ni. 35 Pe lawee sin sin pe sɛɛn Baal kre pan Ben-Hinnom landɛɛ kre nu, na pe biile sroi na sra woni na pe sɛɛn Molech kaan. Ni n da mu kre kee ŋga yo pe pan, ndee mu ki jawala le tun na ki fna mbe pe kre afuŋgo kee ŋga nyini pe, mbe ti mbe Judah le sisam nu.

36 E yuu na ŋunɔ, na klo, na yira sisaa yie ti mbe Babylon ŋunu kakpɔɔ ŋga ja, la, kee ŋga mi e Tafun Nyiɛkpɔɔ wre yuu yi kre, 37 Mbe ni leele pre yoori trɛ nyjɛ nu ndaa krɔ tɛɛ mna pe gbun mu nyina yire nu, mbe ndru mbe pan na pe ni tra ŋga nu, mbe pe tni wejinyiŋge nu. 38 Pie pe, ni leele, mbe ni pe, pe Nyiɛkpɔɔ na. 39 Mbe ti mbe pe lolonyi kee, na pe kepele kro pe nunu, imi kie pe mbe pe ni fiɛ nyjila kro nu, mbe ki nyu mbe pre na pe biile ŋga. 40 Mi na pre we nyu nunu pe ŋga kia jaa kun. Nyjila kro nu mbe na pe piin chichie, mbe ti mbe praa ni fiɛ, imi kie pe mbe pia laa ni kro. 41 Na ki pan ma, ni yiɛ we shɔ na mbe pe pe chichie, a mbe lɛɛ wɔ mbe pe luwi tra ŋga nu na tiŋge yi.”

42 Kee ŋga o Tafun Nyiɛkpɔɔ wre yuu yi kre mbo, “Imi ni tia pe kala nya kpɔɔ mu da ŋga chɔɔ, pan mbe ti mbe pe peyɛ ta mbe da, imi na ndaa ni danyi da mna ki yo pe tolɛɛlɛ pan kre. 43 E yo na tra ŋga kla, kia yaka nyu na. Leele, na yurɛ kuraa kɔ ki na, ŋgi na hin? Ki to Babylon leele kɛɛ. La, ni yuu e pan na, pie ndru mbe tra lɔ waŋgra ŋga nu. 44 Leele we swafiŋge tɛɛ mbe tra lɔ, mbe pe hlɛ pe yi na, mbe dansiɛfɛɛnlɛ kɛ le ki jaara Benjamin leele tra nu, na Jerusalem seechiɛ, na Judah chiɛ, na nyambie lawee nyjɛ yii wa na shie yila finhaa, na shie tablɔ tra ŋga kii wa na shie tapan wa kre nu yire na. Pre leele pre kro, mbe ndru mbe pan na pe ni pe trɛ yire nu. Pan mi Nyiɛkpɔɔ wre yo.”