3 Ni yo na, na e ni yeeri, mbe shɔ e pan, mbe e nyina kee badɛnyi, nyjɛ yire titi n chin.

4 Kee ŋga o Tafun Israel Nyiɛkpɔɔ wre yuu mu wru kalonyi nyjɛ yii wa Jerusalem na, na Judah ŋunu katoo yire haa yi kre, pie yi ŋunɔ mbe chan, mbe yi kponkpon yire tɛɛ mbra wii, 5 mbra Babylon leele pre waari na yi ni. La, kalonyi nyjɛ yie kro kre we nyi gboolo, mi Nyiɛkpɔɔ mbe krɔ sisaa tɛɛ mbe pe gbo. Kre kakpɔɔ ŋga leele sisam ndra na, mbe yiɛ wɔ pe na.

6 La mbe ndru mbe pe tra, mbe pe ŋga faŋga. Mbe ni leele pre tra mbe ndru mbe ti mbe pe wejinyiŋge ta, mbe yaka wa jaa pe tɔɔra. 7 Mbe Judah na Israel leele pre shɔ pe loŋgoolo kɛɛ, mbe ndru mbe pe dwan imi na ndaa pe dwan fa kre. 8 Pe sisam nyjɛ pe ni pe, na yirii ŋga pe yiri mu ni taan kre, mbe yi ti mbe pe kɛ, mbe nɛɛrɛ ka wa kro pe na na. 9 Jerusalem leele we ni mɛɛ kpɔɔ, mbe ti mbe ni yiɛ shɔ, mbe ni mɛɛ yeeri mbe ni ŋga yɛnyiŋge mbe waŋgra ŋga leele kro loo chichie ŋga ni pe mu pe ŋga. Na waŋgrɛ yire leele waa wejinyiŋge, na dwamu ŋga ni kakpɔɔ kre ŋga kre nya kre, fiɛrɛ we pe yii mbe praa seeri.”

10 Kee ŋga o Tafun Nyiɛkpɔɔ wre yuu yi na, “E yuu mbo, leele fɛ mu chia ŋga ti, a leele, ndee yurɛ kuraa n wa ki na. La, Judah chiɛ, na Jerusalem lete nyjɛ e yo leele fɛ mu ti, a yurɔ kuraa n wa yi na kre, leele na yurɛ we ndruu bɔ yi na na, mbe leele pe gbra kun. 11 Pie yɛshɔɔrɔ kpɔɔ tiŋge loo wa, mbe bijɔ, na bijɔplɔ mana loo wa, mbe leele mblɛ pe paan na pe sra wɔ yirɛ ni o Tafun Nyiɛkpɔɔ Suminyuŋgo wa kre gbra kun mbraa yuu na,

Mi e Nyiɛkpɔɔ wre we ndru mbe e dwan tra kre nu, imi e na nyi fa kre. Pan mi e Tafun Nyiɛkpɔɔ wre yo.”

12 O Tafun Jaŋgafun Nyiɛkpɔɔ wre yo mbo, “Kre lawee ŋga pe fɛ mu ti a ndro ndee yurɔ kuraa n wa ki chiɛ yire ka na ŋga, nyjila kaa wa na paan mbe ni ti yurɛ lefɛɛnlɛ pre ka haa ta pe yurɛ pre pan, mbe pe yurɛ pre lawee ta mbe sni mbe wuu. 13 Chiɛ nyjɛ yii wa nyambie lawee yire nu, na shie yila finhaa wa, Benjamin leele tra nu, na shie tablɔ tra ŋga kii wa na shie tapan haa wa kre nu, na Jerusalem kabɛɛlɛ yire, na Judah chiɛ yire kro, yi yurɛ lefɛɛnlɛ pre wa jaa pe yurɛ tɔɔnri.” Pan o Tafun Nyiɛkpɔɔ wre yo.

14 O Tafun Nyiɛkpɔɔ wre yo mbo, “Ki blee wa na paan mbe ni kee ŋga nyu ndaa yo na mbe pe mbe Israel, na Judah leele pre ŋga kre pe.”

17 Kee ŋga o Tafun Nyiɛkpɔɔ wre yuu yi na, kia jaa pan na Ŋunu David katoo we ndro la, ŋmba we tni Israel ŋujɔɔn kre na. 18 A kia jaa pan na srawɔfɛɛnlɛ mblɛ pe pe Levi wolo pre wa ndro ta, ŋmba we na yire ni yiɛ mbra yurɛ sroo sra, na shɔlɔ sra, na sra hɛnyi yire woni mbra ni kaan nyjila kro nu.

19 O Tafun Nyiɛkpɔɔ wre na paara Jeremiah pan mbo, 20 “Mi ni tia nyiŋge na sii, a blee na woo, nyjila ŋga ki fna nu, mu yire nyjila ŋga ndaa yira kro wa nu, a kia jaa chinɛ. 21 Kena ee jaa nyu nunu ŋga kii wa mi na ni sumifun David na Levi srawɔfɛɛnlɛ mblɛ pe yirei ni yiɛ na tnumu tuni kre lalaa klaa? David wa ndro la u nanae nu ŋmba we tni u ŋujɔɔn kre na fio. 22 Mbe ti mbe ni sumifun Ŋunu David nanae pre, na Levi srawɔfɛɛnlɛ mblɛ pe yirei ni yiɛ na tnumu tuni pre nɛɛ mbe ndro wa jaa pe tɔɔnri.”

23 O Tafun Nyiɛkpɔɔ wre na yo Jeremiah pan mbo, 24 “Mu n loo na leele yuu na mi Nyiɛkpɔɔ wre Israel na Judah jlom shiin nyjɛ ni wɔ yire leele je ra? A ki tia pra ni leele pre le fiɛn, a pe n pe le mu nya waŋgra na.

25 La, mu yire yira kro wa nyjila kre, mi mu Tafun Nyiɛkpɔɔ tia nyiŋge na sii, a ble na woo, a ni ni mbra le, a yia jaa chinɛ. 26 Pan chɔɔ mba kɔ ni nyu nunu na mbe Abraham, na Isaac, na Jacob nanae pre je, ndee mbe nyu ŋga ndaa yo pe pan na nyjila kro nu pie Ŋunu David nanae pre wa ta mbe u jɔɔn li kre kla. Ki tia mbe nyu Israel leele pre na, mbe pe ndru mbe pe tnimu lɛɛ kre ta na.”