Jeremiah 34

Jeremiah Na Zedekiah Jaari

Nyjila ŋga nu Babylon ŋunu Nebuchadnezzar, na u ŋunɔwifɛɛnlɛ, na u ŋulo, na leele mblɛ praa wa u jɔɔn kre jaara pre naa wii na Jerusalem, na ki chiɛ nyjɛ yira ki fɛ mu yire ni kre, o Tafun Nyiɛkpɔɔ na paara mna yo Jeremiah pan mbo, 2 “Kee ŋga o Tafun Israel Nyiɛkpɔɔ wre yuu yi kre, mbo sɛ Judah ŋunu Zedekiah pan mu sɛ yo u pan na, mi e Tafun Nyiɛkpɔɔ wre paan mbe e kakpɔɔ kre wru mbe le Babylon ŋunu Nebuchadnezzar wre kɛɛ, mbe u ki sro mbe wo. 3 Ma jaa fɛɛ shɔ, la, pie mu yii mbe sɛ le u kɛɛ. Mu u nya na nyini ni, mbe ŋu na wre nyiɛlɛ jijirɛ nyjɛ fni, mbe u paara na mu ni, mbe pe sɛ na mu ni Babylon tra nu.

4 La, ŋu Judah ŋunu Zedekiah, ni nyu ŋga ni yuu mu pan loo. Pia mu gbo ŋunɔ, 5 mu ku wejinyiŋge nu. Imi na pra kanhun gbɛɛri mu lɛɛlɛ ŋulo mblɛ pra yiɛklu mu na pre kumu nyjila, mna tuwe ndiom tɛɛn sro mna pe le yɛnyiŋge kre, pan chɔɔ pie kanhun gbɛɛri mu kumu ble, mbe mu nyɛni. Pan mi mu Tafun Nyiɛkpɔɔ wre yo.”

6 A Nyiɛkpɔɔ keenyanyofun Jeremiah wre na sɛ yire kee nyjɛ krɛrɛ yo Judah ŋunu Zedekiah pan Jerusalem na. 7 Kre nyjila kre na Babylon ŋunu ŋunɔwifɛɛnlɛ pree wa na wii na Jerusalem, na Judah, na yi chiɛ nyjɛ praa yeeri Lachish na Azekah yire ni. Yire chiɛ nyjɛ chiin yira kro Judah tra nu, a pra mboe sin mu yi fɛ mu kun.

Tinlɛ Waa Kee

8 Nyjila ŋga nu ŋunu Zedekiah na nyu nunu pe na Jerusalem leele ni na we ti pe pe tinlɛ wa kre, Nyiɛkpɔɔ na paara Jeremiah pan, 9 mna nyina na ndro kro fna mbe Hebrew ndro ŋmba u yii tnu kre wa. Na chlɔ wi o, na blɔ wi o, ki fna mbe mu u wa mbe u sɛ. Ndro n fna mbe u ŋmbrɔ Hebrew ndro yii tnu na. 10 Ki tia loplombo na leele mblɛ pra li kre kee ŋga na kre na pe tinlɛ kro wa, a pra sɛ, wa nsra ndro yii tnu na. 11 La, kre kee ŋga kɔkro, pra pe jawala chinɛ, mna ndru mu sɛ tinlɛ mblɛ pra wa, a pra sɛ kre yii tinlɛ na.

12 A o Tafun Nyiɛkpɔɔ na ndru mu paara Jeremiah pan mbo, 13 “Kee ŋga mi e Tafun Israel Nyiɛkpɔɔ wre yuu yi kre, ŋga ndaa e tolɛɛlɛ wɔ mna yili Egypt tra nu kre, mi na pre na nyu nunu pe. 14 A ndaa yo pe pan na, yɛlɛ kɔɔnashin nyu na kpan, ŋu ŋmba mu Hebrew ndro lɔ tnu kre, na u mu sumi yɛlɛ kɔɔnanu mu kɔ kre, ki fna mbe mu u wa mbe u sɛ. A e tolɛɛlɛ pre na je, pe nsra ni nyu kayooro loo. 15 Bleshiin ŋga nu e na e jawala chinɛ, mna kee ŋga ki fraka pe ni yiɛ. E kro na e wolo Hebrew leele mblɛ e na yii tinlɛ pre wa, mna sɛ yire Suminyuŋgo ŋga na ni mɛɛ taa kre nu, mna da mu ni ŋga. 16 La, e ndru mu e jawala chinɛ mu tia ni mɛɛ kla e nu, a e ndru mu sɛ e wolo pre yii tinlɛ na, bilɛ na chiɛlɛ mblɛ e na yii tinlɛ fa mna ndru mu pe wa, a pra sɛ pre kro, e ndru mu sɛ pe yii jaŋga na.

17 Kena kee ŋga mi e Tafun Nyiɛkpɔɔ wre yuu yi kre, ndaa yo e pan na e e wolo mblɛ e yii tinlɛ pre wa, a e na je, e nsra li ni nyu kee na, ki tia mbe kɛ laa e na mbe e sɛ to brɔfiɛn yiɛshiin nyu na, mbe yira sisaa, na klo e gbo. A mbe ti mbe waŋgra kro leele na e le na kpɔli yira yi. 18 Leele mblɛ mi na pre na nyu nunu kre pe, a pe n li ni kee yire na kre kro, mbe pe ndie tini. Mbe pe pe na nuu ŋmba ni pra tɛɛ mu nyu nunu sra wɔ, a pra u yɔ shiin, mna nyaari mu tro u lalaa kre yi. 19 Pre Judah, na Jerusalem loplombo, na pe kala lihaa loplombo, na pe srawɔfɛɛnlɛ pre, na tra kre leele mblɛ pra nyaari mna tro nuu pɔ ŋmba pra yɔ shiin wre lalaa kre kro, 20 mbe pe wru mbe le pe loŋgoolo mblɛ pe pe chaa mbe gbo pre kɛɛ. Pie pe gbo, mbe pe kaara wa hanyiɛlɛ, na nyaalam yurɛ pan.

21 Mbe Judah ŋunu Zedekiah, na u loplombo kro wru mbe le pe loŋgoolo mblɛ pe pe chaa mbe gbo pre kɛɛ. Babylon ŋunu ŋmba u e ti bleshiin kre, u ŋunɔwifɛɛnlɛ pre kɛɛ mbe e wru mbe le. 22 Mi e Tafun Nyiɛkpɔɔ wre mbe paara pe pan, mbe ndru mbe pan na pe ni e kakpɔɔ ŋga na. Pie paan wi na e ni mbe ki shɔ, mbe ki sro mbe wo. A mbe ti mbe Judah chiɛ yire kro sni waara, a ndro wa jaa tni yi ka na na.”