Jeremiah Na Recab Leele
35
Judah ŋunu Josiah biblɔ Jehoiakim wre ŋunumu li nyjila kre nu, o Tafun Nyiɛkpɔɔ na kee ŋga yo Jeremiah pan mbo, 2 “Sɛ Recab jlom leele pre yeeri mbe pe pan nyinyi bɛɛlɛ yire ka nu ni Suminyuŋgo wa, mbe mu pe ŋga simi mbe pe gbɔ.”3 A ndaa sɛ Jaazaniah ŋmba lɛ na wi Jeremiah shiin wo, a u tolɛɛ na wi Habazziniah wre, na u jlom leele kro yeeri. 4 Mna pan na pe ni o Tafun Nyiɛkpɔɔ suminyuŋgo kre nyinyi bɛɛlɛ yire ka nu, kra pe Igdaliah biblɔ Hanan wre bibilɛ lawee, a kra mbra loplombo pre nyuŋgo ŋga kraa wa Shallum biblɔ Maaseiah ŋmba na wi jlonwee shiefun wre wo kre nyjeeri. 5 A ndaa simi le le kotie, na gbɔyirɛ yɛ nu, a yira nyi nyi, a ndaa yi tɛɛ Recab na u katoo jlom leele pre yiɛ, mna kna mu yo pe pan na, “E yi wru e gbɔ.”
6 A pra kna mu yo ni pan mbo, “O na simi gbɔ, ŋgi na hin? O tolɛɛ Jonadab ŋmba lɛ na wi Recab wre na yo o pan na, wre na o nanae, wa waa shia da mbe simi taa nyu na. 7 Wra yo o pan na waa shia nyinyi sin, ndee mbe see yirɛ luu, ndee mbe afoo see pe. Wra yo na waa shia yire yirɛ yire ka pe, la, o na jiin yonyi nyinyi nu. Na oo pe ma kre, oo tni mbe mu tra ŋga nu o nyi na fumblɔ lɛ ŋga nu. 8 Kee ŋga o tolɛɛ wre na yo o pan kro, o lii ki na. Wre na o chiɛlɛ, na o biile kro, wa n da mu simi taa nyu na tun, 9 ndee mu nyuŋgo sin mu tni ki nu, ndee mu fali mu yirɛ luu tun. 10 Nyjila kro nu yonyi nyinyi nu o jiin, mu taa kee ŋga o tolɛɛ Jonadab na yo o pan kre na. 11 La, ŋga Babylon ŋunu Nebuchadnezzar na pan mna wi mu tra ŋga shɔ kre, o na fɛ mna pan Jerusalem na mna, imi kie pe mbe o shɔ Babylon, na Syria leele pre kɛɛ. Kre ki tia o kro Jerusalem na mna kre.”
12 A o Tafun Nyiɛkpɔɔ wre na yo Jeremiah pan mbo, 13 “Sɛ yo Judah, na Jerusalem leele pan na, kena yaa jaa kala le mbe twan, mbe li ni kee yire na ra? Mi Nyiɛkpɔɔ ni e wie. 14 Recab biblɔ Jonadab wre na yo u bibilɛ pan na pia shia da mbe simi gbɔ, a pe li u nyu kee na, hali mu pan mu su aŋga na, pe n da mu simi le nyuu tun, ŋgi na hin? Pe li pe tolɛɛ wre nyu kee na. La, mi Nyiɛkpɔɔ paara e pan gbee tataara, nde e je, e n li ni nyu kee na. 15 Ni ni sumifɛɛnlɛ keenyanyofɛɛnlɛ tun e pan nyjila tataara nu, a pe pan mu yo e pan na e laa e sisam kooloe nyjɛ na e tro kre na, e kepele chiriri twan. A yaa taa sɛɛnlɛ kro mbra yi sumi. Na e pe ma, kre ee jaa tni tra ŋga ni yire na e tolɛɛlɛ ŋga kre nu. La, e n ndie tɛɛ mu loo ni pan. 16 Recab biblɔ Jonadab nanae pre ja mu li kee ŋga pe tolɛɛ wre na yo pe pan kre na. La, yire mblɛ e pe ni leele je, na yaa li ni nyu kee na.
17 Kena kee ŋga Israel Nyiɛkpɔɔ Jaŋgafun wre yuu yi kre, e loo, dɔɔya ŋga nyu ni yo na kie pan yire Judah, na Jerusalem leele na kre kro, we e nya. Ni paara e pan, a e n ndie tɛɛ ni pan. Ni e yeeri, a e je, e n shɔ ni pan.”