4 A Jeremiah na Neriah biblɔ Baruch wre yeeri, mna kee nyjɛ o Tafun Nyiɛkpɔɔ wre na yo u pan yire krɛrɛ yo, a Baruch naa yi nyunɔi hlɛ kre na. 5 A Jeremiah na yo Baruch pan mbo, “Pe n ni ŋga kolo mbe ni jaa sɛ o Tafun Nyiɛkpɔɔ wre Suminyuŋgo wa. 6 Kena ŋga ble leele pre we ble fun kre, ŋu mu sɛ o Tafun Nyiɛkpɔɔ kee nyjɛ mu nyunɔ yurɔ hlɛ ŋga na ŋga tɔɔnri mbe pe loo. Yi tɔɔnri mbe Judah leele mblɛ pe yiri pe chiɛ na mu pan pre kro loo. 7 Aada na pe yi loo, pie talaa ka ta mbe wa o Tafun Nyiɛkpɔɔ wre yiɛ, mbe laa pe sisam kee yire kro, ŋgi na hin? O Tafun Nyiɛkpɔɔ wre krɔ ŋga kee u yo na kie kun na pe ni kre we kpɔɔ titi.”

8 A Neriah biblɔ Baruch wre na kee nyjɛ keenyanyofun Jeremiah na yo u pan yire kro pe. Wra sɛ o Tafun Nyiɛkpɔɔ wre Suminyuŋgo wa, mna sɛ kee yire tɔɔnri yurɔ hlɛ kre nu, a pra loo. 9 Judah ŋunu Josiah biblɔ Jehoiakim wre ŋunumu nyjila kre yɛlɛ kunɔwo kre nyiɛpɔ kɔɔnanyjirɛwo kre nu. A pra ki kpali Jerusalem leele pre pan, na mblɛ pra yiri Judah chiɛ yire na mu pan wa kre kro pan, na pe ble fun. 10 A Baruch na yire pe nyunɔfun Shaphan biblɔ Gemariah wre nyuŋgo ŋga kraa wa lawee vankam nyjeeri wo kre lam, mna mbra Suminyuŋgo kre Jlonwee Fɔŋgɔ kre na, mna Jeremiah kee nyjɛ wra yo, a wra yi nyunɔ hlɛ na kre tɔɔnri, a leele mblɛ praa wa o Tafun Nyiɛkpɔɔ Suminyuŋgo wa pre kro na loo.

11 Ŋga Shaphan nana wa praa u yeeri Micaiah, a wra pe Gemariah biblɔ wre na o Tafun Nyiɛkpɔɔ kee nyjɛ pra tɔɔnri yire loo kre, 12 a wra yiri mna sɛ le ŋunu katoo nyunɔfun wre nyuŋgo wa, na ŋunu loplombo pre kro wa mu tni wa. Na Elishama ŋmba na wi nyunɔfun wre, na Shemaiah biblɔ Delaiah, na Acbor biblɔ Elnathan, na Shaphan biblɔ Gemariah, na Hananiah biblɔ Zedekiah, na loplombo hamblɛ pre kro wa wa. 13 Micaiah na pe bɔ mandiɛ, kee nyjɛ Baruch na tɔɔnri mu leele pre nyina kre. 14 Loplombo pre na Jehudi, ŋmba lɛ na wi Nethaniah, a u tolɛɛlɛ na lɛ Shelemiah na Cushi wre tun na u sɛ yo Baruch pan na, u pan na hlɛ ŋga wra tɔɔnri mna leele pre nyina kre ni. A Baruch na sɛ na hlɛ kre ni pe pan wa. 15 A pra yo u pan na jande tni mu hlɛ kre tɔɔnri mbe o loo. A Baruch na hlɛ kre lam kee tɔɔnri a pra loo.

16 Ŋga pra hlɛ kre lam kee loo mu kɔ kre, fiɛrɛ na pe yii, a pra kna na peyɛ le poŋgo, mna kna mu yo Baruch pan mbo, “Ki fna mbe o sɛ yire kee nyjɛ yo ŋunu pan.” 17 A pra kna mna Baruch wie mbo, “Mni mna pe mna yire kee nyjɛ nyunɔ hin? Jeremiah wra yi yo mu pan a mna yi nyunɔ ree?”

18 A Baruch na kna mbo, “Ɛnhɛɛn, wre wra yire kee nyjɛ krɛrɛ yo ni pan, a ndaa yi nyunɔ.”

19 A ŋunu katoo loplombo pre na kna mna yo Baruch pan mbo, “Ŋu na Jeremiah e sɛ lawee ka cha e ndra, mbe ndro wa e haa chin.”

20 Ŋga pra kɔ kre, a pra sɛ hlɛ kre tɛɛ Elishama, pe nyunɔfun wre nyuŋgo wa, mna sɛ ŋunu wre kagbala, mna sɛ u bɔ mandiɛ. 21 A ŋunu wre na Jehudi tun a wra sɛ hlɛ kre wru pe nyunɔfun Elishama nyuŋgo wa, mna pan mu ki tɔɔnri mu ŋunu wre nyina. Na u loplombo pre kro wa mu yire u jaara. 22 Kre nyjila kre na nyiɛpɔ kɔɔnanyjirɛwo kre nu yi, weere nyjila. A na ŋunu wre wa mu tni kanhun jaara, u kagbala ŋga nu pe kanhun gbeerii na yuai kre nu. 23 Na ki pan na Jehudi hlɛ kre lawee taarɛ, ndee jijirɛ tɔɔnri mu kɔ kre, mbe ŋunu wre yi kun na brɔfiɛn ble ni mbe wa kanhun kre nu. Pan wra ki knumu mna wa kanhun kre nu, ma sɛ su na wra hlɛ kre kro sro. 24 Ŋunu wre na u loplombo mblɛ pra wa wa mna kee yire loo kre, fiɛrɛ nsra pe yii, a kee yire ka nsra pe pe fooro ni. 25 Kraa wa na, Elnathan, na Delaiah, na Gemariah na ŋunu wre tali na waa yurɔ hlɛ kre sro, nde wra je mu ki sro. 26 Ŋga kra pan ma kre, ŋunu wre na paara ŋunu pɔ Jerahmeel, na Azriel biblɔ Seraiah, na Abdeel biblɔ Shelemiah pan na pe sɛ Baruch, na Jeremiah yii. La, na Nyiɛkpɔɔ o ndra, a pe nsra o nya.

27 Ŋga ŋunu wre na yurɔ hlɛ ŋga na Baruch na Jeremiah kee nyjɛ wra nyunɔ yire sro mu kɔ kre, o Tafun Nyiɛkpɔɔ na paara Jeremiah pan mbo, 28 “Jeremiah, yurɔ hlɛ fɔŋgɔ wru mu kee nyjɛ mna nyunɔ a Judah ŋunu Jehoiakim na yi sro yire kro nyunɔ na. 29 Mbe mu sɛ yo Judah ŋunu Jehoiakim wre pan na kee ŋga o Tafun Nyiɛkpɔɔ wre yuu yi kre, ‘Ŋu mna yurɔ hlɛ kre sro, mna yo na mni a mu nyunɔ na Babylon ŋunu we pan mbe o tra ŋga kla, mbe ki leele, na ki yurɛ kro gbo kree? 30 Kee ŋga mu pe kre ndra na, o Tafun Nyiɛkpɔɔ wre yo na, ma ndro ta mu nɔɔ leele nu, ŋmba we kɔɔ tni Ŋunu David ŋujɔɔn kre na na. Mu ku mbe pe mu gboo wa fimi na, mbe yila mu gbun lafo na, mbe mɛŋɛ wo mu na blee. 31 Mbe ŋu na mu biile, na mu loplombo pre kro ndie tini kre sisam ŋga e pe ŋga na. Kanyana nyjɛ kee ndaa yo na yie pan Jerusalem, na Judah leele na kre, we pan yɛŋgɛ e na, ŋgi na hin? E n ni nyu kayooro loo.’”

32 A Jeremiah na hlɛ fɔŋgɔ wru mna Neriah biblɔ nyunɔfun Baruch wre ŋga, mnaa paara a Baruch naa nyunɔi. Baruch na kee nyjɛ wra nyunɔ fa a Judah ŋunu Jehoiakim na yi sro yire kro nyunɔ, hali mna kee fɔnyi nyunɔ na fa wee yire yi mu ya.