3 Ki ble ka Ŋunu Zedekiah na Shelemiah biblɔ Jehucal wre na Maaseiah biblɔ srawɔfun Zephaniah pre tun Nyiɛkpɔɔ keenyanyofun Jeremiah pan mbo, “Jande, Nyiɛkpɔɔ tali mu o ŋga.”

4 Kre nyjila kre na Jeremiah we jaa yiri mbe kila leele pre nu, ŋgi na hin? Na pe n ta mu u yii mu le nyuŋgo tun. 5 Babylon ŋunɔwifɛɛnlɛ na pan mu Jerusalem fɛ mu kun, la, ŋga pra loo na Egypt ŋunu Pharaoh na u ŋunɔwifɛɛnlɛ peyɛ kna na paan kre, a pra fɛ mu laa Jerusalem na.

6 A o Tafun Israel Nyiɛkpɔɔ na paara Jeremiah pan mbo, 7 “Kee ŋga mi e Tafun Israel Nyiɛkpɔɔ wre yuu yi kre, sɛ yo Judah ŋunu ŋmba u mu tun na mu paan ni wie kala wre pan na, Pharaoh ŋunɔwifɛɛnlɛ mblɛ pe yili na paan mbe wii ya mu na kre, pie ndru mbe sɛ pe tra nu Egypt na. 8 Mbe Babylon leele pre ndru mbe pan mbe kakpɔɔ ŋga tɔ na. Pie wi mbe ki shɔ e kɛɛ, mbe ki sro putuu.”

9 O Tafun Nyiɛkpɔɔ wre yo mbo, “Yaa eyɛ fana mbra jawa na Babylon leele pre we laa e na, pia e ti. 10 Hali na e Babylon leele mblɛ pe wii na e ni kre ja, a ki sɛ kro pe leele mblɛ pra pra mu tni pe yonyi nyinyi nu kre kuraa kre, pie ndru mbe yili mbe paan e kakpɔɔ ŋga sro mbe wo.”

11 Ŋga kra pan na Babylon ŋunɔwifɛɛnlɛ na Pharaoh ŋunɔwifɛɛnlɛ nya mna fɛ mu laa Jerusalem na kre, 12 a Jeremiah na u jawala pe na we yili Jerusalem na mbe sɛ Benjamin leele tra nu, imi kie pe mbe u sele leele wa pe krɔyirɛ yire kɛ mbe u ti. 13 Ŋga wraa yilii Jerusalem na mna da Benjamin jlonwee nyu na kre, shiefɛɛnlɛ lopom ŋmba praa yeeri Irijah, a wra pe Shelemiah biblɔ, a u tolɛɛ mɛɛ naa Hananiah wre na u yii mna yo u pan mbo, “Feni mu feni mbe sɛ chaa Babylon wifɛɛnlɛ pre nuu?”

14 A Jeremiah na kna mbo, “Kpra ma, feni ma ni feni mbe sɛ chaa Babylon leele nu.” Irijah nsra u kee kre loo, a wra je mna u yii mna sɛ na u ni Judah loplombo yiɛ. 15 Judah loplombo pre krɔ na kun na Jeremiah ni, a pra tia pra u gbun fwa mna ndru mna sɛ u le nyunɔfun Jonathan wre nyuŋgo. Na kre nyjila kre, na pe Jonathan nyuŋgo kre pe leele lehaa.

16 A pra sɛ Jeremiah le nyuŋgo kre wee tapan ka nu. Wra sni wa mu mu. 17 Ki ble ka Zedekiah na leele tun a pra sɛ Jeremiah wɔ mna pan u pan ŋunu katoo wa, a wra u ju mu wie mbo, “O Tafun Nyiɛkpɔɔ wre n kala ka yo mu pan ra?”

A Jeremiah na kna mbo, “Nyiɛkpɔɔ paara ni pan na pie mu yii mbe le Babylon ŋunu wre kɛɛ.”

18 Bawa Jeremiah na ŋunu Zedekiah wie mbo, “Sisaa kpɔɔ ŋgi ni pe mu ŋu na mu loplombo, ndee mu chia ŋga leele taan, a e sɛ ni le nyuŋgo ŋga hin? 19 Sena mu keenyanyofɛɛnlɛ mblɛ pe nyaa na yuu mu pan na Babylon ŋunu wa paan mbe mu tɔ mbe wi na tra ŋga leele ni pre nyi hin? 20 La, ni tafun, fuŋgaami ni mu tali mbe mu ni kee ŋga loo ni pan. Ni mu tali, maa ti pe ndruu sɛ ni le nyuŋgo wa na, na kre ma mbe ku wa.”

21 A ŋunu Zedekiah na tia pra sɛ Jeremiah ni kagbala kpɔɔ ŋga nu lawee shiefɛɛnlɛ pre nyi kre nu, mna tia pra paanu shio paanu fɔfɛɛnlɛ pre pan lete na wa na u kaan mbe sɛ su na paanu we kɔ chia kre na. Kra tia Jeremiah na sɛ tni lawee shiefɛɛnlɛ kagbala vankam kre nu.