Jeremiah 38

Pe Jeremiah Wa Kɔlɔ Nu

Kena blɔ ŋmba praa yeeri Mattan wre biblɔ Shephatiah, na Pashhur biblɔ Gedaliah, na Shelemiah biblɔ Jehucal, na Malkijah biblɔ Pashhur na loo na Jeremiah yuu leele kro pan na, 2 “O Tafun Nyiɛkpɔɔ yo na, ndro ŋmba we kro mbe tni kakpɔɔ kre na kpan, klo, ndee yira sisaa, ndee brɔfiɛn yiɛshiin nyu na we ku. A la, ŋmba we fɛ mbe sɛ chaa Babylon leele pre nu kre we u ndra ta. 3 Mbo, u ndru na yuu na o Tafun Nyiɛkpɔɔ wre yo na, kre kakpɔɔ ŋga we to Babylon ŋunu wre na u wifɛɛnlɛ kɛɛ, mbe pe ki shɔ o pan.”

4 Pre loplombo pre na yo Judah ŋunu wre pan mbo, “Ki fna mbe o wre blɔ ŋmba gbo. U ŋunɔwifɛɛnlɛ mblɛ pe kro kakpɔɔ kre na, na leele pre hamblɛ pre sɔɔnrɔ kuu na, u nyu kee nyjɛ u yuu yire ni. Wre blɔ ŋmba, u n na leele mblɛ chichie ka chaa, na pe klaa bɔkɔ.”

5 A ŋunu Zedekiah na kna mbo, “Uu wa e kɛɛ, mba jaa e nyu kaanri.”

6 A pra Jeremiah yii mna sɛ u le kɔlɔ waa ka nu, ŋunu wre biblɔ ŋmba praa yeeri Malkijah wre kagbala kpɔɔ, mna lawee shiefɛɛnlɛ pre na nyi kre. Mɛnyi ni pra u yii mna u tre kɔlɔ kre nu, na nyumu n wa ki nu, frɛrɛ bribri kraa wa ki nu, a Jeremiah na tii frɛrɛ kre nu.

7-8 La, Cush blɔ wa praa u yeeri Ebed-Melech, a wra pe ŋunu katoo loplombo pre wa. Wre wra loo na pe Jeremiah yii mu sɛ le kre kɔlɔ kre nu. Nyjila ŋga ni ŋunu wre na sɛ tni Benjamin jlonwee nyu na wa kre. 9 A Ebed-Melech na sɛ paara u pan mbo, “Tolɛɛ, kee ŋga leele mblɛ pe Nyiɛkpɔɔ keenyanyofun Jeremiah na ŋga pe sisam kpɔɔ titi. Pe sɛ u wa kɔlɔ nu, mbe klo u gbo, ŋgi na hin? paanu kuraa n wa chia ŋga na, mbe ndro ta mbe lɔ mbe u ŋga.”

10 A ŋunu wre na yo Ebed-Melech pan mbo, “Leele fulo na kɛ cha mu ya mu yɛ na, mbe e sɛ u wɔ mbe yili kre kɔlɔ kre nu, mbe wa ku.”

11 A Ebed-Melech na leele fulo na kɛ cha, a pra sɛ ŋunu nyuŋgo ŋga nu praa yirɛ teeri kre nu, mna yokunumɛɛ yɛ cha mna pɔ yiyɛ na mna sɛ yi le Jeremiah kro kɔlɔ kre nu. 12 A Ebed-Melech na yo Jeremiah pan mbo, yire yokunumɛɛ nyjɛ le mu kotinyi, imi kie pe mbe mɛnyi yire wa mu chie, a Jeremiah na yi le u kotinyi. 13 A pra mɛnyi yire tɛɛ mna u tini mna yili kɔlɔ kre nu, mna tia wra tni lawee shiefɛɛnlɛ pre kagbala kpɔɔ wa.

Ŋunu Zedekiah Na Jeremiah Wie Kala Na

14 Ki ble ka Ŋunu Zedekiah na ndro tun a wra sɛ Nyiɛkpɔɔ keenyanyofun Jeremiah wru mna pan u pan o Tafun Nyiɛkpɔɔ Suminyuŋgo jlonwee ŋga ki taa taarɛ kre nu. A ŋunu wre na yo Jeremiah pan mbo, “Kala ka ni chaa mbe mu wie, maashia kee ka ndra ni na.”

15 A Jeremiah na kna mu yo Ŋunu Zedekiah pan mbo, “Na ni kekpra kre yo mu pan, mu ti pe ni gbo. A na ni mu ŋga jawala kuraa kre, ma ki wru.”

16 A ŋunu Zedekiah na ju mu Nyiɛkpɔɔ da mu Jeremiah ŋga mbo, “Ŋga o Tafun Nyiɛkpɔɔ wre wa nyjila kro nu, na o kaan ŋmaa ŋga, mba mu gbo, a mba mu wru mbe le mblɛ pe mu chaa mbe gbo kre kɛɛ.”

17 A Jeremiah na yo Ŋunu Zedekiah pan mbo, “Kee ŋga o Tafun Israel Nyiɛkpɔɔ Jaŋgafun wre yuu yi kre mbo, na mu muyɛ wru mu Babylon ŋunu wre, na u loplombo ŋga kre, pia e gbo, a pia kakpɔɔ ŋga sro, a ŋu na mu sele leele kro we tni mbe ŋmaa ta. 18 La, na mu nsra muyɛ wru mu le wre Babylon ŋunu wre, na u loplombo kɛɛ, kakpɔɔ ŋga we to Babylon leele pre kɛɛ, mbe pe ki sro, a ŋu titi wa shɔ pe kɛɛ.”

19 A Ŋunu Zedekiah na yo Jeremiah pan mbo, “Judah leele mblɛ pe fɛ mu sɛ chaa Babylon wifɛɛnlɛ pre nu kre, pre na ni lɛɛlɛ, ŋgi na hin? Babylon leele pre we kɔɔ ni wru mbe le pe kɛɛ mbe praa ni fiŋge.”

20 A Jeremiah na yo u pan mbo, “Pia mu wru mbe le pe kɛɛ, kee ŋga Nyiɛkpɔɔ yo kre loo mu taa ki na. Kee kro we nyu mbe mu ŋga, mbe mu ŋmaa ta. 21 La, na maa je naa, kee ŋga o Tafun Nyiɛkpɔɔ wɔ mu ni nyina yi kre, 22 chiɛlɛ mblɛ pie kro Judah ŋunu katoo wa kre kro, pie pe wɔ fimi na, mbe pan na pe ni Babylon ŋunu loplombo yiɛ. Na ki pan ma, kee ŋga chiɛlɛ pre we na yuu mu pan yi na, mu nɔɔlɔ mblɛ mu shɔnli kre, pre pe mu wɔ mu ŋga, na mu fana. Fuŋgaami ŋga mu jeelee tii frɛrɛ nu, a mu nɔɔlɔ pre fɛ mu mu ti. 23 Pie mu chiɛlɛ na mu biile kro yii mbe sɛ le Babylon leele kɛɛ, a ŋu titi wa shɔ pe kɛɛ, Babylon ŋunu wre we mu yii, mbe ti pe kakpɔɔ ŋga sro mbe wo.”

24 A Ŋunu Zedekiah na yo Jeremiah pan mbo, “Maa shia kee ŋga yo mbe ndro loo, na kre ma pie mu gbo. 25 Na ni loplombo pre loo na mi na ŋu fni mu paara, pie pan mbe mu wie na, kee ŋgi ŋu na ŋunu yo hin? Maashia yaka ndra o na, na kre ma oo mu gbo. 26 Na pe waa pan mu pan kre, yo pe pan na, tali ndaa ŋunu tali, mbe waashia ti pe sɛ ni le nyuŋgo Jonathan katoo wa, mbe ni ku wa.”

27 Yɛŋgɛ na, loplombo pre kro na sɛ Jeremiah wie, a Jeremiah na kee nyjɛ ŋunu na yo u yo yire kro yo pe pan. Ŋga wra paara ma mu kɔ kre, ndro nsra kee ka ta mu u wie na, ŋgi na hin? Ndro nsraa wa pe nu mna kee nyjɛ wre na ŋunu na yo yire ka loo.

28 Ŋga kra pan ma kre, Jeremiah na kro lawee shiefɛɛnlɛ pre kagbala wa mna sɛ su na pra pan mu wi mu Jerusalem shɔ.