Jerusalem To
39
Ŋga Judah ŋunu Zedekiah na ŋunumu li kre, ki yɛlɛ kɔɔnanyjirɛ wo kre nyiɛpɔ kɛ na, kre Babylon ŋunu Nebuchadnezzar na u ŋunɔwifɛɛnlɛ kro na sɛ Jerusalem tɔ, mna ki fɛ mu kun. 2 A Zedekiah ŋunumu lie kre yɛlɛ kɛmbɔnunu kre nyiɛpɔ jijirɛ wo kre ble ŋga kra taa kɔɔnanyjirɛ kre na, kre pra ja mu kakpɔɔ kre mboo ŋga pe sin mu ki fɛ mu kun kre juari, mna le chia kre lam. 3 Ŋga pra wi mu Jerusalem shɔ kre, a Babylon ŋunu loplombo pre na sɛ tni lawee ŋga praa yeeri Lalaa Jlonwee kre nu. Nergal-Sharezer ŋmba wra yiri Samgar na wre, na Nebo-Sarsekim ŋmba na wi ŋunɔwifɛɛnlɛ pre lopom, na Nergal-Sharezer ŋmba na wi lopom titi wre, na pe loplombo hamblɛ pre kro na sɛ tni wa.4 Ŋga Judah ŋunu Zedekiah na u ŋunɔwifɛɛnlɛ na pe nya kre, a pra fɛ mna yili kakpɔɔ kre na blee. Ŋunu kagbla kolo kre pra yii mna sɛ tro chia kre mboe shiin yire fnimu na, mna fɛ na shie Jordan lɔɔ kre landɛɛ haa wa.
5 La, Babylon ŋunɔwifɛɛnlɛ pre na pe kɔŋgɔ ni, mna Zedekiah da Jericho tra mbrɛrɛ ŋga kra mbra Jordan lɔɔ na kre, mna u yii. Ŋga pra u yii kre, a pra sɛ na u ni mna sɛ u le Babylon ŋunu Nebuchadnezzar kɛɛ Riblah na, Hamath tra nu, a wra u kala li wa mna u gbun na pimi ni. 6 Riblah na wa, Babylon ŋunu wre na tia pra Zedekiah biile pre gbo u yiɛ na, mna Judah loplombo titie pre kro gbo wa na. 7 Ŋga wra kɔ kre, a wra tia pra Zedekiah nyiɛlɛ foli, mna swafre sɛɛrɛ le u na, mna sɛ na u ni Babylon tra nu.
8 Babylon leele pre na kanhun le ŋunu katoo kre, na pe kalonyi yire kro na, mna Jerusalem mboo kre gbun mu juari. 9 Ŋga kra pan ma kre, Babylon ŋunɔwifɛɛnlɛ yɛklo ŋmba praa yeeri Nebuzaradan wre na leele mblɛ pra kro Jerusalem na pre yii, mna ya mblɛ pra klu mu fɛ mu sɛ chaa pe nu pre na, mna sɛ na pe ni Babylon tra nu. 10 Shianfɛɛnlɛ mblɛ pe nsraa wa na yaka ni tra kre nu pre wra ti wa, a wra pe ŋga lawee a praa fali na lii.
11 Babylon ŋunu Nebuchadnezzar wre na klu mu yo u ŋunɔwifɛɛnlɛ yɛklo Nebuzaradan wre pan na, 12 u Jeremiah wru mbra u le, waashia u pe yaka, a yira ŋga we na chaa kro, u u ŋga ki yi. 13 A Nebuzaradan, na Nebushazban, na Nergal-Sharezer mblɛ pra pe Babylon ŋunu loplombo pre plɛ na ya. 14 A pra leele wɔ mu tun a pra sɛ Jeremiah wru lawee shiefɛɛnlɛ kagbala vankam kre nu mna pan. Ŋga pra pan na u ni kre, a pra u wru mna le Ahikam biblɔ Gedaliah ŋmba tolɛɛ na wi Shaphan wre kɛɛ, na u sɛ na u ni Jeremiah katoo. Ki tia wre titi leele nu wra sɛ tni Judah tra nu.
15 Kena nyjila ŋga nu Jeremiah naa wa wre shiefun wre kagbala vankam kre nu wa kre, o Tafun Nyiɛkpɔɔ na paara u pan mbo, 16 “Sɛ yo Cush ndro Ebed-Melech wre pan na, kee ŋga o Tafun Israel Nyiɛkpɔɔ Jaŋgafun wre yuu yi kre, ni paan mbe ti mbe kee ŋga ndaa yo mu wru kakpɔɔ kre haa kre pe. Ndaa yo na kanyana mbe ti ki pe nya, peyɛ ma pie ta wa. A na kre nyjila kre waa da, ee ki nya nyini ni. 17 La, ŋu Ebed-Melech, kre ble kre mbe mu shɔ, mba mu le leele mblɛ mu fiɛ pre kɛɛ. Pan mi mu Tafun Nyiɛkpɔɔ wre yo. 18 Mbe mu shɔ, pia mu ta mbe gbo brɔfiɛn yiɛshiin ni. Mu mu ndra ta, ŋgi na hin? Mu dankna ni na. Pan mi mu Tafun Nyiɛkpɔɔ wre yo.”