2 Ŋga Nebuzaradan na yo we ni wa kre, wra ni yeeri mna sɛ mbɛɛ na, mna yo ni pan mbo, “Mu chin na e Tafun Nyiɛkpɔɔ wre na kre kanyana kpɔɔ ŋga kee yo mu tɛɛ na kie pan kre kakpɔɔ ŋga naa? 3 Fuŋga u tia ki pe, u tia ki pe imi na wra yo na we ti ki pe kre. Ŋga e sisam pe mu e Tafun Nyiɛkpɔɔ wre taan, a e n li u kee yire na kre ki tia ki pan ma. 4 Aŋga ni paan mbe jlɔnyi nyjɛ pe le mu kɛnyi na yire wɔ mbe wa, na mu chaa mbe mu taa ni kro mbe o sɛ Babylon tra nu, mbe ni sɛ na mu le wa. La, na mu n na chaa mbe sɛ naa, waŋgra kre ki sni kre, mu jaa sɛ tni mna mu chaa.”

5 Jeremiah nsra ta mu jele kɔ, a Nebuzaradan na yo u pan mbo, “Sɛ tni Ahikam biblɔ Gedaliah ŋmba tolɛɛ wi Shaphan wre pan. Wre Babylon ŋunu wɔ wra Judah chiɛ yire le. Sɛ mbe ŋu na wre sɛ tni leele pre nu. Na mu n na bawa chaa naa, mu jaa sɛ tni mna mu chaa.” A ŋunɔwifɛɛnlɛ lopom wre na u ŋga sro, na yirɛ tataara, mna u wa kolo a wra sɛ. 6 A Jeremiah na sɛ tni Ahikam biblɔ Gedaliah wre pan Mizpah na, a wre na leele mblɛ pra kro wa pre na chaa mu tni tra kre nu.

7 Ŋga Judah ŋunɔwifɛɛnlɛ loplombo pre plɛ, na pe ŋunɔwifɛɛnlɛ pre mblɛ pra fɛ mu sɛ ndra nyaa pre na loo na Babylon ŋunu Ahikam biblɔ Gedaliah wɔ, mna tia wraa tra kre, na shiafɛɛnlɛ titie mblɛ pra kro tra kre nu, a pe nsra pe yii mu sɛ Babylon tra nu ka pre le kre, 8 a pra peyɛ nya mna pan Gedaliah pan Mizpah na. Leele mblɛ pra sɛ wa pre na lɛ, Nethaniah biblɔ Ishmael, na Kareah bibilɛ Johanan na Jonathan, na Tanhumeth biblɔ Seraiah, na Ephai ŋmba wra yiri Netophah na wre bibilɛ, na Jezaniah ŋmba wra yiri Maacah na wre, na pe bilɛ plɛ ni. 9 A Gedaliah na da mna pe le gbun mbo, “Yaa fiɛ na ee Babylon ŋunu wre sumi, e tni tra kre nu, e eyɛ nyjii e Babylon ŋunu wre ŋga, kre e kee kro we nyu mbe e ŋga. 10 Mi titi we tni Mizpah na, Babylon ndro ŋmba we pan mna na kee ka ni kpan, mbe yire e jeelee na mbe ki pe. La, na e simi gbɔ wee, na olive simi, na tinyi liwee kuun e na yi teeri, e tni chiɛ nyjɛ na e nyi yire na.”

11 Ŋga Judah leele mblɛ praa wa Moab, na Ammon, na Edom, na waŋgrɛ hɛnyi yire na kre na loo na Babylon ŋunu pe plɛ ti Judah na, mu Gedaliah wɔ mu tɛɛ pe nyu na wra pe le kre, 12 a pe kro na yili chiɛ nyjɛ na pra nyina mu sɛ yire na, mna ndru mu pan Judah tra kre nu, mna sɛ Gedaliah pan Mizpah na, mna pan mu simi nyjɛ yiraa wa tra kre nu yire kun tataara, mu ya tinyi sɛnyi nyjɛ yiraa wa wa na.

13 Kre kɔkro a Kareah biblɔ Johanan wre na ŋunɔwifɛɛnlɛ yɛkulo mblɛ pra fɛ mu sɛ ndra nyaa pre plɛ na pan Gedaliah pan Mizpah na. 14 Mna pan mu yo u pan mbo, “Mu n loo na Ammon ŋunu Baalis wre Nethaniah biblɔ Ishmael wre tun mbe u paan mu gbo ra?” La, ŋga pra ki yo kre, Gedaliah nsra pe shɔ mu li.

15 A Kareah biblɔ Johanan wre na sɛ ju mu yo Gedaliah pan mbo, “Ti mbe ni sɛ Nethaniah biblɔ Ishmael wre gbo mbe ndro wa chin. Ŋgi ki tia wra mu chaa mbe gbo, mbe ti mbe Judah leele mblɛ pee wa mu kɛɛ ŋga fɛ mbe nyina, mbe sɛ ku ŋga hin?”

16 La, Gedaliah kee ŋga wra yo Johanan pan na yi kre mbo, “Maa shia kre kee ŋga nyini pe. Kee ŋga e yuu na taari Ishmael na kre wa pe kpra.”