41
Kre yɛlɛ kre nyiɛpɔ ŋga kra taa kɔɔnashin wo kre nu, Nethaniah biblɔ Ishmael ŋmba tolɛɛ na wi Elishama, a wra yiri lebiile nu, mna chaa ŋunu loplombo pre nu kre, na pan na bilɛ kɛ plɛ ni Ahikam biblɔ Gedaliah katoo Mizpah na. Ŋga pe kro na chaa mu tni na lii kre, 2 a Ishmael na u leele kɛ mblɛ pra taa u na pre, na yiri mna pe brɔfiɛnlɛ tini mu wɔ, mna Gedaliah ŋmba Babylon ŋunu na tɛɛ, a wraa Judah leele mblɛ pra kro wa pre le wre suulo mu gbo. 3 Ishmael na tia pra pre na Babylon ŋunɔwifɛɛnlɛ mblɛ praa wa wa pre kro ni.4 Ŋga nyiŋge na se kre, na leele n ta mu loo na pe Gedaliah gbo tun, 5 a bilɛ fuloe jijirɛ plɛ na yiri mu pe nyutanyooro klu, mna pe dodonyi wla peyɛ na, mna peyɛ knumu na brɔfiɛn ni. Plɛ na yiri Shechem, na Shiloh, na Samaria na, na shie na shɔlɔ, na tuwe ndiom tɛɛn ni mbe sɛ sra wɔ mbe o Tafun Nyiɛkpɔɔ wre ŋga Suminyuŋgo wa Jerusalem na. 6 Ŋga Ishmael na pe gbra kun kre, a wra yili Mizpah na wa na nyɛnɛɛ ni mna sɛ pe fni, mna yo pe pan mbo, “E pan e sɛ Gedaliah Ahikam biblɔ wre le.” 7 Ŋga pra taa u na mna sɛ le chia kre na kre, a Ishmael na u leele pre, na pe yii na pe kuu na waa kɔlɔ ka nu. 8 Ŋga praa pe kuu kre, a pe kɛ plɛ na yo Ishmael pan mbo, “Maa o gbo, oo wa na shɔlɔ, na olive simi, na srɛ ni mu ndra lawee ka nu.” Ŋga pra yo ma kre, a pra pe ti, pe nsra pre gbo. 9 Kre kɔlɔ ŋga nu Ishmael na gboolo pre, na Gedaliah gboo wa kre, ŋunu Asa wra ki tuu mna tɛɛ na uyɛ siri Israel ŋunu Baasha kɛɛ. A Ishmael na gboolo le ki nu, a kra nyi.
10 Ishmael na leele mblɛ pra kro Mizpah na wa pre kro yii, pre na ŋunu wre bichiɛlɛ ni kro. Leele mblɛ praa wa wa Nebuzaradan Babylon ŋunu ŋunɔ wifɛɛnlɛ lopom wra Gedaliah wɔ mu tɛɛ Judah leele pre nyu na. A Ishmael na pe wru mbe tro na pe ni Ammon leele tra nu mbe sɛ Jordan lɔɔ kre kun na pe ni.
11 Kareah biblɔ Johanan wre, na Judah wifɛɛnlɛ loplombo mblɛ pra klu mu fɛ mu sɛ ndra nyaa kre na linku kee ŋga Nethaniah biblɔ Ishmael na pe kre loo. 12 A pra u kɔŋgɔ ni mna sɛ u da Gibeon tapla kpɔɔ kre mbɛɛ na. 13 Ŋga leele mblɛ Ishmael na yii na shie pre na kna mna Johanan na ŋunɔwifɛɛnlɛ pre nya kre, pe yiɛ na shɔ. 14 A ki tia pra kna mna sɛ Johanan fni. 15 A Ishmael na u leele pre kɔɔnatarɛ na fɛ mna shɔ, mna sɛ Ammon leele tra nu.
Pra Sɛ Leele Pre Ni Egypt Tra Nu
16 Ŋga kra pan ma kre, Johanan na u ŋunɔwifɛɛnlɛ loplombo mblɛ pra ya u na pre na leele mblɛ ni Ishmael na yiri Mizpah na, nyjila ŋga ni wra Gedaliah gbo mu kɔ na shie pre shɔ. Ŋunɔwifɛɛnlɛ, na chiɛlɛ, na biile, na ŋunu katoo loplombo na lɛ. Wra yili na pe ni Gibeon na wa, 17-18 mna yiɛ le na pe ni Egypt tra nu. Ŋga praa shie mu da Geruth-Kimham ŋga kra mbra Bethlehem na kre, a pra tni wa. Praa Babylon leele pre fiɛ, ŋga Ishmael na Gedaliah ŋmba Babylon ŋunu na tɛɛ tra kre nyu na wre gbo kre ndra na.