4 A Jeremiah na kna mbo, “Ni loo, mbe kee ŋga e wie kre tali o Tafun Nyiɛkpɔɔ wre pan mbe e ŋga. Kee ŋga Nyiɛkpɔɔ we yo kro, mbe ki yo e pan, mba yaka ndra e na.”

5 A pra kna mu yo Jeremiah pan mbo, “Na ki pan na o Tafun Nyiɛkpɔɔ wre tro mu na mu kee ka yo o pan, a o nsra li ki na kre, kena wre titi Nyiɛkpɔɔ wre wi o nyu wɔfun. 6 Na kee ŋga we yo kre tna o pan o, ndee ki n tna o pan o, oo taa wre o Tafun Nyiɛkpɔɔ ŋmba pan o mu tuni wre wo na. Imi kie pe mbe kee kro nyu mbe o ŋga.”

7 Kie pe ble kɛ kɔkro kre, o Tafun Nyiɛkpɔɔ wre na paara Jeremiah pan. 8 A Jeremiah na Johanan na ŋunɔwifɛɛnlɛ loplombo pre, na leele mblɛ praa wa mu ya u na pre kro, mu yire pe biile na, mu sɛ su pe loplombo na kro yeeri. 9 Bawa wra yo pe pan mbo, “O Tafun Israel Nyiɛkpɔɔ ŋmba pan e ni tun wre, kee ŋga u yo yi kre mbo, 10 na e tni Judah tra ŋga nu mna kre, mbe ti mbe e tnihaa ta, mba e kla. Mbe ti mbe e yire, mba ti mbe e to, ŋgi na hin? Kanyana ŋga ni tia ki e nya kre kna mu ni pe fooro ni. 11 Babylon ŋunu ŋmba e fiɛ kre, yaa u fiɛ. Pan mi e Tafun Nyiɛkpɔɔ wre yo. Ŋgi na hin? Nii wa e kro, mbe kɛ tɔ e na, mbe e shɔ mbe yili u kɛɛ. 12 Mbe e fooro le, imi kie pe mbe u e fooro le, mbe ti e kro e waŋgra nu.

13 La, na yire mblɛ e kro kre waa e jawala pe na yaa tni Judah tra nu, maa mi e Tafun Nyiɛkpɔɔ wre nyu kee je, 14 mbaa yo na, oo sɛ tni Egypt tra nu, imi kie pe mbe waa ŋunɔ gbra kun, ndee mbe waa bnɔɛ tiŋge loo, ndee mbe klo wa o gbo. 15 Na e waa kre jawala kre le, kena kee ŋga mi e Tafun Israel Nyiɛkpɔɔ Jaŋgafun wre yuu yi na, na yire Judah leele chiɛri mblɛ e kro kre je, na chaa mbe sɛ tni Egypt tra nu, a e n tni Judah tra nu kre, 16 ŋunɔ ŋga e fiɛ kre we da e na wa, a klo ŋga e fiɛ kre we taa e na mbe sɛ wa, a bawa ee ku. 17 Kpra ni yuu e pan kre, mblɛ yiɛ ki nyina a praa chaa mbe sɛ tni Egypt tra nu kre we ku brɔfiɛn yiɛshiin nyu na wa. A klo, na yira sisaa we e gbo, ndro nunu chom wa shɔ kanyana kpɔɔ ŋga ni mbe pan e na kre nu.

18 Kee ŋga o Tafun Israel Nyiɛkpɔɔ Jaŋgafun wre yuu yi kre mbo, imi na ni tia Jerusalem leele ni krɔkuɔn sisaa kre nya kre, na e waa je mu sɛ Egypt tra nu, pan ee ni krɔkuɔn sisaa nya na. E kee we pe kpɔli ni pe pan, mbe praa e le na suŋgɔ ki e yii. Pia e le mbe nya, mbra e pini mbra tɛɛ, a yaa tra ŋga nya na fio.

19 Kee ŋga o Tafun Nyiɛkpɔɔ wre yuu e mblɛ e kro pre pan yi kre mbo, ni e jaari aŋga, e le na yaa sɛ Egypt tra kre nu. 20 Na e n dɔɔ ta ee le sisaa kpɔɔ nu. Yire chɔɔ e yo ni pan na ni o Tafun Nyiɛkpɔɔ wre tali e pan, na kee ŋga we yo kpan, ee li ki na. 21 Kee ŋga u yo ni pan kre, ni ki yo e pan, a e je, e n na chaa mbe taa ki na. 22 Ki tia fuŋgaami ŋga, e jawa e chin na lawee ŋga nu yire titi chaa mbe sɛ tni kre, ŋunɔ, na klo na yira sisaa kie e gbo wa.”