4 A Johanan, na ŋunɔwifɛɛnlɛ loplombo pre, na leele pre kro na kee ŋga o Tafun Nyiɛkpɔɔ yo kre je, na pia tni Judah tra nu wa. 5 A Johanan, na ŋunɔwifɛɛnlɛ loplombo pre, na yiɛklu leele mblɛ pre na pre na yiri Mizpah na, na Judah leele mblɛ pra kro mna yiri waŋgrɛ nyjɛ nu pra nyina mu sɛ yire nu pre pan, a pra sɛ Egypt tra nu. 6 Ŋga praa shie kre, pra sɛ na bilɛ, na chiɛlɛ, na biile, na ŋunu bichiɛlɛ mblɛ Babylon ŋunɔwifɛɛnlɛ lopom ŋmba praa yeeri Nebuzaradan na le Ahikam biblɔ Gedaliah kɛɛ pre ni. A mi Jeremiah, na Baruch na chaa pe nu. 7 Pre leele mblɛ kro na ndikana pe o Tafun Nyiɛkpɔɔ kee ŋga wra yo kre na, mna je mu sɛ tni Egypt tra nu. Pra tni mna sɛ su kakpɔɔ ŋga praa yeeri Tahpanhes kre na.

8 Ŋga praa wa Tahpanhes na wa kre, o Tafun Nyiɛkpɔɔ wre na paara Jeremiah pan mbo, 9 “Sɛ dnɛ badɛnyi yɛ cha, mu sɛ yi le tra lawee ŋga pe wlɔ Egypt ŋunu Pharaoh katoo jlonwee wa kre nu Tahpanhes na wa. Na mu ki piin ti mbe Judah leele pre mu nya. 10 Na mu kɔ mbe mu yo pe pan na, ‘Kee ŋga o Tafun Israel leele Nyiɛkpɔɔ Jaŋgafun wre yuu yi kre, ni paan mbe ni sumifun Babylon ŋunu Nebuchadnezzar tun, mbe ti u paan u ŋujɔɔn kan yire dnɛ nyjɛ ni le tra mna ŋga na, mbe paan u lebiile yoŋgo nyuŋgo nyaa mbe wo yi na. 11 We paan wi na Egypt leele ni, a mblɛ pe fna mbe ku yira kɛɛ pre we ku, mblɛ pe fna mbe pe yii kre pie pe yii mbe sɛ, a mblɛ pe fna mbe ku brɔfiɛn yiɛshiin nyu na pre we ku. 12 We kanhun le sɛɛnlɛ nyinyi na Egypt tra nu mbe yi sro, mbe pe sɛɛnlɛ yire koli mbe sɛ. Imi na mbaala lefun u dodoŋgi poo sɛlɛ kre, pan we Egypt pɔ u sɛlɛ mbe yili na ki ni mbe sɛ, hali yaka wa u knɔ. 13 We le pe sɛɛnlɛ nyinyi nyjɛ nu pe yila sumi nu, mbe sɛ yi pilaasi nyjɛ pe peerii yire gbun mbe juari, mbe sɛɛnlɛ nyinyi nyjɛ yii wa Egypt tra nu yire juari kro.’”