Jeremiah 44

Nyiɛkpɔɔ Judah Leele Jaari Egypt Tra Nu

O Tafun Nyiɛkpɔɔ wre na paara Jeremiah pan, mna wru Judah leele mblɛ praa wa Egypt chiɛ nyjɛ praa yeeri Migdol, na Tahpanhes, na Memphis, nyjɛ yiraa wa Egypt tapanhaa yire haa. 2 Kee ŋga o Tafun Israel Nyiɛkpɔɔ Jaŋgafun wre yuu yi kre mbo, “E na nya imi na ndaa Jerusalem, na Judah chiɛ yire kla mu da. Aŋga, yire chiɛ yire kro ja, a leele n wa yi na na. 3 Ŋgi na hin? Pra sisam pe ni na, mna sɛ tuwe ndiom tɛɛn sro sɛɛnlɛ na, mna sɛɛnlɛ nyjɛ kee pre na pe tolɛɛlɛ pre nsra chin yire sumi. A kra tia ni krɔ na yiri. 4 Nyjila tataara nu, ndaa ni sumifɛɛnlɛ mblɛ na lɛ ni keenyanyofɛɛnlɛ pre tuni pe pan, a pra shie na pe jaari na yuu pe pan na, Nyiɛkpɔɔ yo yaa na afunyi kee nyjɛ u je yire pini. 5 La, pe nsra ndie tɛɛ mna u kee yire loo, a pe nsra laa pe sisam kee yire kro, a pe nsra tuwe ndiom tɛɛn nyjɛ praa sroi na sɛɛnlɛ kaan yire ti. 6 Ndaa tia Jerusalem, na Judah chiɛ yire na ni krɔkuɔn kpɔɔ kre nya, a ki tia yi kaari kajɛɛ mu pan mu su aŋga na.

7 Kena kee ŋga o Tafun Israel Nyiɛkpɔɔ Jaŋgafun wre e wie fuŋgaami yi na, mni a yire na e chiɛlɛ, na e biile, na e bifimble Judah tra kre sɛɛ je, na kala kpɔɔ chaa mbe eyɛ ŋga, mbe e nɔɔ kɔɔ soo pei ŋga hin? 8 Mni a e na ni krɔ kuun na e sɛɛnlɛ nyjɛ e gbeele na sumi yire ni, mu ndru na tuwe ndiom tɛɛn sroi na Egypt sɛɛnlɛ kaan ŋga hin? Yire titi ee eyɛ kla. Mbe ti waŋgrɛ yire leele na e le na suŋgɔ leele lɛ yire. 9 E sisam kee nyjɛ e tolɛɛlɛ pre, na pe ŋulo, na Judah tra kre ŋuchiɛlɛ na pe yire fɛɛ ra? A yire na e chiɛlɛ yiri mu na yire sisam kee yire pini Judah tra nu, na Jerusalem lete na. 10 Mu pan mu su aŋga na, hali e n ja mu eyɛ nyjii, a e n na ni kaan buuro, ndee mu na lii ni mbra nyjɛ ndaa yire, na e tolɛɛlɛ pre ŋga yire na.

11 Ki tia kee ŋga o Tafun Jaŋgafun Israel Nyiɛkpɔɔ wre yuu yi kre, mbo, ni paan na kanyana ni e na, mbe Judah tra kre kro kla. 12 Judah leele mblɛ pe kro mu je mu sɛ tni Egypt tra nu kre, pe kro we ku brɔfiɛn yiɛshiin, ndee klo kɛɛ. Mu yire pe fiɛn fiɛn na mu sɛ su pe lekpɔɛ na kro, klo ndee brɔfiɛn nyu na pie ku. Leele we na pe le na kpɔli yira ŋga pe sun yi, mbra pe pini mbra tɛɛ. 13 Pe mblɛ pie tni Egypt tra nu kre, mbe pe ndie tini imi na ndaa Jerusalem leele ndie tini brɔfiɛn yiɛshiin, na klo, na yira sisaa ni kre. 14 Judah leele pre hamblɛ mblɛ pe kro mu tni Egypt tra nu kre, we na chaa mbe ndru mbe pan Judah tra nu na. La, pia ki ta, fɔna pe chiɛri mblɛ pie pe ndra ta pre chiin bɔkɔ.”

15 Nyjila ŋga ndaa kee nyjɛ o Tafun Nyiɛkpɔɔ na yo yire yuu leele pre pan kre, na Israel leele mblɛ praa wa mu tni Egypt tra kre nyjeeri, na tapan haa kre tataara wa mu yire na ndru ni pan. A bilɛ mblɛ pra chin na pe chiɛlɛ tuwe ndiom tɛɛn sroi sɛɛnlɛ na kre, pre na pe chiɛlɛ na tin gri, mna pan mu yo ni pan mbo, 16 “Jeremiah, kee nyjɛ mu yo na o Tafun Nyiɛkpɔɔ yo mu yo o pan kre, waa yi loo. 17 Kee nyjɛ o yo na oo pe yire, yire oo pe. Oo tuwe ndiom tɛɛn sro mbe sɛɛn ŋga pe yeeri Nyjeeri Ŋuchlɔ kre ŋga, mbe simi wo ki na, imi na wre na o tolɛɛlɛ, na o ŋulo, na Judah loplombo pre naa pini Jerusalem lete na kre. Kre nyjila kre na sro bɔ o na, a yaka nsra o shian, a yaka nsraa o tɔɔra. 18 La, mu yire ŋga o yo na waa tuwe ndiom tɛɛn sro mbe sɛɛn ŋga pe yeeri Nyjeeri Ŋuchlɔ kre ŋga, a waa simi wo ki na na kre, yira kro o bɔ, klo na brɔfiɛn yiɛshiin yi o kuu.”

19 A chiɛlɛ pre na kna mbo, “Ŋga o naa mahɛɛn pini, a yira pe na Nyjeeri Ŋuchlɔ sɛɛn kre yi, na tuwe ndion tɛɛn sroi, na simi woni ki na kre, o pilɛ pre na ki nya, a kra tna o pan.”

20 A Jeremiah na yo chiɛlɛ pre na bilɛ mblɛ pra yire na u nyu woni pre kro pan mbo, 21 “E n chin na o Tafun Nyiɛkpɔɔ wre tuwe ndiom tɛɛn nyjɛ yire na e tolɛɛlɛ pre, na e ŋulo, na e loplombo pre, na leele pre naa sroi Judah chiɛ, na Jerusalem lete na yire kee chin, mu na yi sɔɔnri ra? 22 Ŋga kra pan na o Tafun Nyiɛkpɔɔ wre nsra ja mbe frɔ e sisam, na afunyi kee yire e naa pini yire na kre, kra tia suŋgɔ na e tra kre yii, a leele kɔ ki na, a ki sni waara imi na ki nyi aŋga ŋga. 23 Ŋga e tuwe ndiom tɛɛn sro mu sɛɛnlɛ ŋga mu punu o Tafun Nyiɛkpɔɔ wre na, a e n ndie tɛɛ u pan, ndee mu taa u mbra yire, na u nyu kee yire na kre ndra na, kre ki tia e na yire kanyana kpɔɛ nyjɛ nyaa ma kre.”

24 A Jeremiah na ndru mu yo pe pan mbo, “Yire Judah leele mblɛ ee wa mu tni Egypt tra nu kre, e loo kee ŋga o Tafun Nyiɛkpɔɔ wre yo. 25 O Tafun Israel Nyiɛkpɔɔ Jaŋgafun wre yo na, yire na e chiɛlɛ kepele kro nyina na e da mu sɛɛn ŋga pe yeeri Nyjeeri Ŋuchlɔ kre ŋga, na ee na tuwe ndiom tɛɛn sro ki na, mbra simi woni ki na.

E sɛ nyu ŋga e wru kre wɔ e sɛɛn kre ŋga. 26 La, yire Judah leele mblɛ ee wa Egypt na kre, e kee ŋga o Tafun Nyiɛkpɔɔ wre yo loo mbo, ŋga mi Nyiɛkpɔɔ wa ŋga, ni ni mɛɛ kpɔɔ kre da mu e ŋga na, mba ti mbe e wa ni mɛɛ tɛɛ mbe da na. 27 Kolo ni chaa mbe e kla, ki n pe chichie ka ni ni e chaa. Yire Judah leele mblɛɛ ee wa Egypt tra nu kre kro we ku brɔfiɛn yiɛshiin, na klo kɛɛ. 28 E mblɛ ee fɛ mbe shɔ kre brɔfiɛn yiɛshiin kre kɛɛ, mbe ndruu pan Judah tra nu kre, we pe fiɛn plɛ. Na ki pan ma, kre pe mblɛ pie kro Egypt tra nu kre we chin ŋmba kee ki pe kpra. Na mi wo yi kpra o, na pre wo yi kpra o, kre oo chin.

29 Sɛmbɛɛrɛ kee ŋga mi e Tafun Nyiɛkpɔɔ wre we pe mbe e chin na mbe e ndie tini, a piɛri ma ni e piɛri na mbe e kla kre yi na, 30 mbe ti mbe Egypt ŋunu Pharaoh Hophra wre to u loŋgoolo mblɛ pe u chaa mbe gbo pre kɛɛ, imi na ndaa Judah ŋunu Zedekiah le u loŋgo Babylon ŋunu Nebuchadnezzar ŋmba wraa u chaa mbe gbo wre kɛɛ kre.”