Jerusalem Na Judah Kprakuɔn
3
E le, O Tafun Nyiɛkpɔɔ,Jaŋgafun wre paan,
mbe yirɛ, na leele mblɛ na Judah,
na Jerusalem leele kaan
kro shɔ pe pan.
We pan mbe pe sroe na pe nyumu,
2 na pe gbuntitiremfɛɛnlɛ,
na pe ŋunɔwifɛɛnlɛ,
na pe kprakunfɛɛnlɛ,
na pe keenyanyofɛɛnlɛ,
na pe chlɛfɛɛnlɛ, na pe loplombo,
3 na pe ŋunɔwifɛɛnlɛ loplombo,
mblɛ pe leele fuloe shiin,
na kɛ kɛ le,
na pe chia loplombo,
na pe paaranyinafɛɛnlɛ,
na pe yirɛ penchinfɛɛnlɛ,
na pe dobodobo wɔfɛɛnlɛ kro.
4 A yirifumblɔ,
pie kaari pe loplombo,
mbe biile fiɛ fiɛn pe pe ŋulo.
5 Leele we na ndrashelee kee,
pini peyɛ na,
lewo we yiri mbe u ŋmbrɔ,
ndee mbe u tnifun taan.
Yirifumblɔ wa pe loplombo le,
mbe nya,
a lewaala pre wa pe loplombo,
ŋga buuro.
6 Nyjila kaa wa na paan,
mbe jlomu ka ki ndro nunu wɔ,
mbe yo u pan mbo,
“Ŋu rɛ, muu wa dodoŋgi ni,
na mu yɛ krafa,
kena pe o lopom kajaa ŋga na.”
7 La, we kna mbe yo mbo,
“Mi ra. Mba jaa ya e na.
Ni n sro ni, a ni n yonyi ni,
na yire lɛ na.
Kena yaa ni pe e lopom.”
8 Jerusalem, na Judah leele,
gbro mu to,
a pe nyu kee, na pe kepele tia,
pe o Tafun Nyiɛkpɔɔ,
yɛnyiŋgefun wre taan.
9 E yiɛ pee nyini e dansiɛrɛ li,
na pan e sisam nyi,
na Sodom leele lɛ.
E atɛ, yire titi e klaa cha,
mu eyɛ ŋga.
10 Yo leele mblɛ pe fraka pre pan na,
kee kro we nyu mbe pe ŋga.
Pie kee nyjɛ pe pe yire,
tnu ta mbe li.
11 La, sisampefɛɛnlɛ atɛ,
sisam kee nyjɛ pe pe plɛ na kre,
fuŋga pie yi fɔtɔɔrɔ ta.
12 Biile fiɛnfiɛn pe ni leele pre fiŋge,
a chiɛlɛ lɛ pe ŋulo.
Ni leele, e yɛkulo pre,
e wa mu fun,
ki tia e n chin kolo ŋga na ee tro.
O Tafun Nyiɛkpɔɔ U U Leele Kpra Kuun
13 O Tafun Nyiɛkpɔɔ uyɛ kna,
mu tni kala lihaa,
mbe u leele kpra kun.
14 “O Tafun Nyiɛkpɔɔ,
we u leele pre loplombo,
na pe yɛkulo pre kala li,
mbe pe kpra kun, ŋgi na hin?
Pre pe ni tre sɛnyi see,
Israel waŋgra kre kla,
mu shianfɛɛnlɛ yirɛ dnumu,
a yi pe kalonyi nyi.
15 E n kolo ni,
na ee ni leele pre tuŋgo ma,
mbra pɔlɛfɛɛnlɛ dnumu.
Mi, e Tafun Nyiɛkpɔɔ Jaŋgafun,
wre ni ki yo.”
Jerusalem Chiɛlɛ Jaaraa
16 O Tafun Nyiɛkpɔɔ wre yo mbo,
“E le imi na Jerusalem chiɛlɛ,
pe yɛ kpɔɔri mu da.
Na pe nyaari,
mbe pe yiɛ wa nyjeeri,
mbra kna mbra bilɛ yeeri nyiɛlɛ ni,
na pe nyaari,
mbe pra sɔɔlɛɛ koni gbrugbru,
mbe kɛgbrɛ nyjɛ pe le,
jeelee lagboo na yire na tini.
17 La, mbe ti mbe klɛ toto pe ndrɛ na,
a mbe ti mbe pe fɛlɛhaa sni,
fimi na.”
18 Kre ble kre mbe yirɛ nyjɛ ni Jerusalem chiɛlɛ peyɛ kpɔɔri yire shɔ pe pan kro, yirɛ nyjɛ pe leni jeelee lagboe na, na nyjɛ pe poo ndrɛ na, na nyjɛ pe leni lagboo, 19 na nyjɛ pe leni ndiile, na kɛ sooloe na, na satae nyjɛ pe woni ndra na, 20 na pe juulee, na pe kɛbanyi nyjɛ pe leni, na kɛbanyi nyjɛ pe leni sɛlɛ, 21 na feelee nyjɛ pe leni pe kambɛɛlɛɛ na, na nyjɛ pe leni maalɛɛ nu, 22 na pe dodonyi titnɔnyi chichiele, na pe dodonyi nyjɛ pe leni na woni yɛ na, na yirɛ nyjɛ pe waa patiɛ na, na pe swɛ le yirɛ, 23 na dodonyi nyjɛ pe leni mbra nyaa yi nu, na pe dodonyi finyi chichiele, na pe namu nyjɛ pe poo ndra na, na sɛsɛ nyjɛ pe poo.
24 Ŋga ki fna pe tlade fa,
mbe pe ndiomu tna kre,
na pe yi fa, ndio pie na ndio.
Ŋga pie greree pɔ kre,
mɛnyi pie na poo sɛlɛ.
Ŋga ki fna pe nyjure,
chichiele ta kre,
pe ndrɛ yie pɔ.
Ŋga ki fna pra yonyi,
chichiele ta mbra paarii kre,
yokunumɛɛ pie na paarii.
A imi na pe nyu nyu kre,
we kna mbe pe nyifɛɛrɛ pe pan.
25 A bilɛ mblɛ pee wa chia kre na pre,
na pe faŋgafɛɛnlɛ kro
we to ŋunɔ.
26 A chia kre poŋgo,
we fooro li mbe nyɛni,
a ki leele we tni bloŋgo nu.
Ŋgi na hin?
Leele kɔ chia kre na.