Pie Babylon Kla
51
O Tafun Nyiɛkpɔɔ wre na yo mbo,Mbe kanyaa le,
lawee klafun wa nu,
mbe u yiri,
mbe Babylon leele taan.
2 Mbe ti mbe ŋunɔwifɛɛnlɛ
fumblɔ plɛ pan,
mbe le Babylon leele nu,
na fuflɛ ki yua kpakpɛɛ
wru na shie.
Na pe kla ble kre waa to,
pie pe tɔ kokoo kro na.
3 Yaashia Babylon wifɛɛnlɛ
ŋga kolo kuraa,
mbe pe jaa pe bɛnyi kru,
Yaashia pe ŋga kolo,
mbe pe yirɛ nyjɛ ni
pe peyɛ toni na wii yire wru.
A yaashia pe yirifumblɔ pre ti,
a pe wifɛɛnlɛ pre e pe kla pei,
yaashia pe wa ti.
4 Pie to loŋgoolo kɛɛ,
mbe pe pe gbo,
mbe wo Babylon lete na.
5 Kii wa na Israel na Judah
leele sisaa pe, mu mi,
pe Tafun Jaŋgafun Nyiɛkpɔɔ,
ŋmba ni pe cheche wre taan,
nde kre n tia ni pe wa.
6 E fɛ e yili Babylon tra nu,
e fɛ e yili wa e ŋmaa li.
Yaa ti mbe pe yila pe sisam na,
mbe yire kla mbe chaa.
Nyjila kre da mbe mi,
pe Tafun Nyiɛkpɔɔ wre,
mbe ni fɔlɔ tɔ pe na.
Mbe fɔlɔ tɔ pe na
imi na ki fna.
7 Babylon na tia
ni krɔ na kun kpɔɔ,
a kra tia pra pe
na swanyiɛ gbɔyira,
ŋga nu simi sisaa nyi yi,
a waŋgra leele kro
naa gboo ki nu,
mu na tɔɔlɔ.
8 Babylon we to nyaanyaa
mbe kla.
E nyɛni e ki ŋga,
e tuwe cha ki pan,
aada yira ŋga kii wa ki na,
kre we jaa tra.
9 Fumblɔ mblɛ ki na kre yuu na,
o chaa mbra ya Babylon na,
la, ndro wa jaa ya ki na.
Kena e ti mbe o yili ki na,
mbe sɛ o trɛ nu.
Ŋgi na hin?
Pe Babylon ndie tini kpɔɔ,
a ki ŋmbrɔ n wa.
10 Israel leele pre yuu peyɛ pan mbo,
e ki kpali Jerusalem na,
na kee nyjɛ pra pe o na,
kre ndra na,
o Tafun Nyiɛkpɔɔ wre fɔlɔ tɔ,
Babylon leele na.
11 E ti mbe Mede ŋunɔwifɛɛnlɛ,
pe snimi nyu liɔ,
mbe pe ŋunɔ wiyirɛ,
nyjɛ ni pe pe yɛ toni yire bali,
mbe kanyaa le pre na pe ŋulo nu,
mbe pan mbe Babylon kla.
O Tafun Nyiɛkpɔɔ wre,
we yila u Suminyuŋgo kre na,
mbe fɔlɔ tɔ pe na.
12 E e ŋunɔ flaŋgaa yire,
e sɛ Babylon na ki mboe tɔ.
E pan na lenɛɛrɛ ni,
mbe pe yire mbe chia kre
fɛ mbe kun.
E ti mbe pe plɛ ja nyaa
mbra pe sri.
Ni jawala wru mbe Babylon kla,
a yaka wa jaa ni jawala
kre chinɛ.
13 Yire mblɛ ee wa mu tni,
Babylon lɔɛ tataara
yire mbɛɛ na,
mu swa ta tataara kre,
e nyjila da mbe pe e gbo.
14 O Tafun Jaŋgafun Nyiɛkpɔɔ
wre titi da mu uyɛ ŋga,
na we ti mbe ŋunɔwifɛɛnlɛ pan,
mbe Babylon nyi,
pe nɛɛ na kpatɔ lɛ.
Pie wi mbe yili,
mbra yɛshɔɔrɔ gble leni.
15 O Tafun Nyiɛkpɔɔ wre,
wra u jaŋga, na u kachindɛ tɛɛ,
mna tra ŋga wa,
mna nyjeeri nyaa mu chan,
na wre titi jawala ni.
16 Na u fuu, mbe nyumu,
ŋga kii wa nyjeeri kre na tini.
Wre u tia tloe na yilii nyiɛ yiɛ na,
na nyiɛ paan,
mbe kra nyini plipli.
Wre u tia fuflɛ,
na yilii ki lawee na gbuun.
17 Leele mblɛ pe sɛɛnlɛ gbeele pre,
pe n jawala ni,
a pe n kala chin.
Nyifɛɛrɛ swanyiɛ fiireefɛɛnlɛ gbo,
pe sɛɛnlɛ nyjɛ pe pini yire na.
Pe kɛnyu yirɛ nyjɛ pe pini
yire kro, leele pe fana na yi ni,
a ŋumu n wa yi nu.
18 Yirɛ wɛɛ yi,
titɛɛrɛ yirɛ pe pini,
a na yi kla nyjila waa da,
pie yi cha mbe la.
19 La, Israel leele pre Nyiɛkpɔɔ wre,
u n pe na yire yirɛ nyjɛ yi.
Wre Nyiɛkpɔɔ wre u yirɛ kro wa,
a wre u Israel leele le
mu pe wɔ.
U mɛɛ yi o Tafun
Nyiɛkpɔɔ Jaŋgafun.
20 Babylon, ŋu na wi ni van,
ŋu na wi ni wi yira,
ŋga ni ndaa tɛɛ na ŋunɔ wii.
Ŋu ni ndaa tɛɛ
mu waŋgrɛ kro kla,
mna mu tɛɛ mu ŋulo dɔɔya.
21 Ŋu ni ndaa tɛɛ mna soolo,
na pe nduufɛɛnlɛ gbo,
hali mna sookɛɛ,
na yi ŋmaafɛɛnlɛ kro kla.
22 Ŋu ni ndaa tɛɛ mna bilɛ,
na chiɛlɛ gbun mu chan,
mna mu tɛɛ mna blɛlɛɛlɛ,
na yirifumblɔ, na nyanyjɛbɛɛlɛ
na bichabɛɛlɛ kro gbun.
23 Ŋu ni ndaa tɛɛ mna mbaala,
na pe lefɛɛnlɛ gbun,
mna mu tɛɛ mu falifɛɛnlɛ,
na pe nuulo
mblɛ ni pe fali gbun.
A ŋu ni ndaa ŋulo
na pe loplombo gbun.
24 La, fuŋga rɛ,
Babylon, na ki leele na ki da,
mbe ni fɔlɔ tɔ e na,
mbe ni leele pre ki nya.
Sisam kee nyjɛ pe pe Jerusalem,
na ki leele na kre ndra na.
Pan mi pe Tafun Nyiɛkpɔɔ
wre yo.
25 Babylon, pan mu nyi na nyua
ŋga ki waŋgra kro kla yi,
la, mi Nyiɛkpɔɔ we nyini sisaa,
kna mu na,
mbe kɛ wa mbe mu yii,
mbe mu ŋunɔ,
mbe chan tra mbrɛrɛ nu,
mbe mu fun bloŋgo nu.
26 Dnɛ ka wa kro mu na,
mbe pe jaa ki tɛɛ
mbe nyuŋgo sin na,
mu sni gbeŋglen,
na tablɔ tra yi nyjila kro nu.
Pan mi e Tafun Nyiɛkpɔɔ wre yo.
27 Waŋgra ŋulo pre,
e ŋunɔ flaŋgaa yire,
e eyɛ kna e pan e wi.
E bnɔɛ fɔ eyɛ nu,
e eyɛ kna e pan,
e wi na Babylon leele ni.
E kɛ wa e ŋulo yeeri, Ararat,
na Minni, na Ashkenaz na.
E wifɛɛnlɛ lopom wɔ,
mbe u pan na soolo ni,
mbe pe nɛɛ na kpatɔ lɛ.
28 E ti mbe Mede ŋulo,
na pe loplombo kro,
na waŋgrɛ nyjɛ yii wa
pe jaara yire kro,
pan mbe wi na Babylon ni.
29 Tra ŋga kro seeri,
ŋgi na hin?
O Tafun Nyiɛkpɔɔ wre
jawala wru,
na we ti mbe Babylon kaari
tablɔ tra,
mbe ndro wa jaa tni wa na,
a wa u jawala chinɛ ki na.
30 Babylon ŋunɔwifɛɛnlɛ
pre wi mu pra,
mu kro pe fɛndra hɛɛ yire nu.
Pe faŋga kɔ,
a pe kaari chiɛlɛ.
Pe kanhun le pe tnihɛɛ yire na,
mu pe kakpɔɛ jlonwee
nyu kɛɛn, nyjɛ ni pe yi kani
yire kuari.
31 Pe bitumblɔ taa peyɛ na,
na shie mandiɛ bɔ haa,
Babylon ŋunu wre pan,
na pe wi, mu o kakpɔɔ shɔ.
32 Pe lawee nyjɛ nu o tro,
na lɔɛ kuun yire shɔ mu ta,
mu kanhun le
fɛndrahɛɛ yire na.
A ki tia fiɛrɛ o ŋunɔwifɛɛnlɛ
pre yii.
33 Kee ŋga o Tafun Jaŋgafun Israel Nyiɛkpɔɔ wre yuu yi kre mbo,
Babylon pe na shunshun,
ŋga pe taanla,
mu ki pe mbrɛrɛ
shɔlɔ kun nyjila yi.
34 Babylon ŋunu
Nebuchadnezzar wre,
na pe na u Jerusalem
wru mu jɔli,
mu tia chaachaa
na wo o na.
Wra tia chia kre lam
na sni waara,
na gbolo nyumu
pe kna mu wo.
U wre na o yirɛ chichiele wru
mu jɔli, na foo yurɔ jɔli,
a lɛɛ wɛ u na,
a u ndru mu sɛ o jlo mu wo.
35 Jerusalem leele pre mbo,
“Pɔɔrɔ kee nyjɛ Babylon leele li,
wre na o biile na kre ndra na,
Nyiɛkpɔɔ u ti mbe yi yili pe na.
Babylon leele pe kala nya,
o leele mblɛ pra gbo pre tlo.”
Nyiɛkpɔɔ We Ya Israel Leele Na
36 Ki tia kee ŋga o Tafun Nyiɛkpɔɔ wre yuu yi kre mbo,
Jerusalem leele,
mbe e kala li mbe e ŋga,
mbe fɔlɔ tɔ e loŋgoolo pre na.
Mbe ti mbe Babylon lɔɛ kɔ,
mbe pe nyumu chaa la gbɔ haa.
37 Babylon we kaari kajaa,
mbe kro kramboe bri.
Kie kaari ŋmbokuŋmboe
tni haa,
mbe leele na ki le
na kpɔli yira yi,
a ndro wa jaa tni wa na.
38 Pan Babylon leele we na jlo,
mbra nyɛni na jirae biile lɛ,
39 Na klo waa pe ta,
mbe sukpɔɔ ka pe mbe pe ŋga,
a mbe ti pe gbɔ mbe pe yiɛshɔ.
Pie sni mbe ŋunu,
a pia jaa nyi na.
Pan mi pe Tafun Nyiɛkpɔɔ
wre yo.
40 Pan mbe pe yii mbe sɛ pe gbo,
na mbɔɔ pe yii na shie gbo haa.
Pan pie pe to,
na mbapilɛ na sikaala pe yii,
mu na shie na pe ni gbo haa.
41 Babylon kakpɔɔ ŋga mɛɛ
kra kpɔɔ waŋgra kro nu kre,
kie to loŋgoolo kɛɛ,
waŋgrɛ yire leele we ki le,
na kpɔli yira yi.
42 Babylon loŋgoolo we pan,
mbe ki tɔ na epo ki pan
mu ki li.
Kie pe na mbapilɛ ki waa,
mbe paan ki tɔ.
43 Ki chiɛ yire we sni waara,
mbe sni gbeŋglen
na tablɔ tra yi.
Ndro wa jaa tni tra kre nu,
a ndro wa jaa tro wa na.
44 Mbe Babylon leele sɛɛn Bel,
kre ndie tini,
a mbe ti mbe ki yira,
ŋga ki jɔli kro jlo mbe wo.
Waŋgrɛ leele wa na tini,
mbra paan ki pan na,
Babylon mboe yire kro we juari.
45 Israel leele,
e fɛ e yili wa,
e fɛ e yili ni krɔkuɔn sisaa kre nu,
kre ee ŋmaa ta.
46 Yaa ti mbe kee nyjɛ e ndru,
tra kre nu yire e le fiɛrɛ,
ndee mbe ti mbe gbun yɔ e na.
Kre yɛlɛ n wa,
mbe yaa kala fɔŋgɔ loo,
pɔɔrɔ kee bribri,
ee na ndru tra kre nu,
jaŋgafɛɛnlɛ we yiri,
mbe wi na peyɛ ni.
47 Ki nyjila we da,
mbe ni Babylon sɛɛnlɛ yire,
ndie tini,
nyifɛɛrɛ we waŋgra kre kro gbo,
mbe ki leele ku,
mbe sni ki lete na.
48 Na ki pan ma,
yira ŋga kii wa nyjeeri,
na tra yiɛ na kro,
yiɛ we shɔ na Babylon to.
Ŋgi na hin?
Lawee klafɛɛnlɛ we yiri,
nyjeeri haa wa mbe paan ki kla.
Pan mi Nyiɛkpɔɔ yo.
49 Ŋga Babylon leele,
Israel leele gbo kre ndra na,
ki fna mbe kla.
Kie ja imi na pra waŋgra kro ja,
fa kre.
50 Ni leele mblɛ e fɛ,
mu shɔ brɔfiɛn yiɛshiin kɛɛ kre,
yaa shie kuraa, e yili e fɛ.
Kii wa na e haa le na e tra ni,
na ee wa wa,
e na mi e Tafun Nyiɛkpɔɔ
wre sɔɔnri,
e na Jerusalem kee jawa.
51 E yuu na nyifɛɛrɛ e gbo,
na pe e tɛɛlɛ,
a ki tia nyifɛɛrɛɛ wa e yiɛ na,
ŋgi na hin?
Fumblɔ pan mu le,
o Tafun Nyiɛkpɔɔ
Suminyuŋgo cheche kre nu.
52 La, nyjila kaa wa na paan,
mbe ni Babylon sɛɛnlɛ
ndie tini,
mbe tro tra kre nu kro.
Kanyana we ti mbe ki leele na jiin,
tra kre nu poŋgo.
Pan mi e Tafun Nyiɛkpɔɔ
wre yo.
53 Hali na Babylon mboe gede,
mu sɛ su nyjeeri,
a pe mboe sin,
mu pe fɛndrahɛɛ
yire fɛ mu kun,
mbe ti mbe klafɛɛnlɛ pan,
mbe yi kla.
Pan mi e Tafun Nyiɛkpɔɔ
wre yo.
54 E loo, gblee ka kun
Babylon haa na paan.
Leele pe Babylon klai na paan,
a kra tini ma kre.
55 O Tafun Nyiɛkpɔɔ wre Babylon kla,
a we ti mbe pe yɛshɔɔrɔ gblee,
tataara kre nyu nyjii.
Pe loŋgoolo we paan le pe nu,
na epo nyumu ki fo,
mu le pe nu pɔɔrɔ ni,
na gblee kpɔɔ ni.
56 Lawee klafun wa we pan,
mbe Babylon kla.
We paan pe wifɛɛnlɛ yii,
mbe bɛnyi nyjɛ ni pe wii
yire kuari.
Ŋgi na hin?
O Tafun Nyiɛkpɔɔ wre,
u sisaapefɛɛnlɛ ndie tini,
a we fɔlɔ tɔ pe na imi ki fna.
57 Mbe ti mbe ki loplombo,
na ki kachimblɛ,
na ki ŋunɔwifɛɛnlɛ loplombo,
na wifɛɛnlɛ pre kro gbɔ mbe to.
Pie sni pia jaa yiri na.
Mi e Tafun Nyiɛkpɔɔ Jaŋgafun,
ŋmba wi ŋulo kro ŋunu wre
ni ki yo.
58 Kee ŋga o Tafun Jaŋgafun Nyiɛkpɔɔ wre yuu yi kre mbo,
Babylon mboe gbidinyi yire kro,
pie yi juari mbe wo,
mbe ki lawee pe mbrɛrɛ,
mbe pe kanhun le,
ki jlonwee krɔɛ yire na.
Babylon leele peyɛ fnai yirɛ,
nyjɛ pe pe yire na finfin,
nyjɛ na pe fnai yire kaari kejenyi,
na nyini kanhun.
Pe Sɛ Jeremiah Nyu Kee Ni Babylon Na
59 Ŋunu Zedekiah lopom ŋmba wra mbra u na titi na wi Neriah biblɔ Seraiah ŋmba tolɛɛ na wi Mahseiah wre. Wre Jeremiah na ŋga hlɛ mbe u sɛ na ki ni Babylon na, nyjila ŋga ni wre na Ŋunu Zedekiah naa shie wa kre. Kre nyjila kre na Zedekiah li yɛlɛ jijirɛ Judah jɔɔn kre na. 60 Jeremiah na kanyana nyjɛ yie Babylon nya yire krɛrɛ nyunɔ yurɔ hlɛ na, mna Seraiah ŋga, 61 mna yo u pan mbo, “Na e waa le Babylon na, mu gbeŋmba na mu yire kee nyjɛ tɔɔnri kpɔɔ mbe pe loo. 62 Na maa ki tɔɔnri mu kɔ, mbe mu nyiɛtali na, o Tafun Nyiɛkpɔɔ, ŋu mu yo na mu kre lawee ŋga kla, mbe ndro, ndee yurɛ kuraa wa jaa tni wa, a kie sni waara nyjila kro nu. 63 Na maa ki tɔɔnri mu kɔ, mbe mu dnɛ pɔ ki na, mbe sɛ ki wa Euphrates lɔɔ kre nu. 64 Mbe yo na, imi na hlɛ ŋga tii lɔɔ ŋga nu ŋga, pan chɔɔ Babylon we to, a kia jaa yiri na, kanyana ŋga mbe ti ki chia kre nya chɔɔ, kie ki leele kro nya na.”
Jeremiah kee yire nyu na to.