Babylon We To
50
Kee ŋga o Tafun Nyiɛkpɔɔ na yo u keenyanyofun Jeremiah pan mu wru Babylon tra kre na ki leele haa yi kre, mbo,2 Ki kpali waŋgrɛ yire kro nu,
mu ŋunɔ flaŋgaa yire nyjeeri,
mu kee yire kro kpali,
maashia ka ti.
Yo pe pan na,
Babylon paan mbe to.
Nyifɛɛrɛ we ki sɛɛn Bel kre gbo,
a fiɛrɛ we sɛɛn Marduk yii kpɔɔ.
Yirɛ nyjɛ pe sumi wa yire kro,
nyifɛɛrɛ we yi gbo,
mbe fiɛrɛ yi yii.
3 Waŋgra ka we yiri
nyjeeri haa wa,
mbe paan wi na Babylon ni.
Pie tra kre ja,
mbe ki sni waara.
A ndro wa jaa tni ki na na,
a ki leele, na ki yurɛ kro
we fɛ mbe ki ti.
4 Kre nyjila kre,
na ble kre waa to,
Israel na Judah leele we chaa,
mbe nyɛni, mbe mi,
pe Nyiɛkpɔɔ wre haa cha.
Pan mi Nyiɛkpɔɔ wre yo.
5 Pie Jerusalem kolo haa wie,
mbe kna mbe yiɛ le wa.
Pie pan mbe mbra mi,
pe Tafun Nyiɛkpɔɔ wre na.
Pie pan mbe mi na pre nyu nunu,
ŋga kie tni nyjila kro nu pe,
ŋga kia jaa fɛɛ fio.
6 Ni leele pre pe na mbaala,
mblɛ pe fun lɛ,
pe lefɛɛnlɛ pre pe wa mu fun,
mu tia pe sɛ na kila nyuɛ,
na nyambie na na tro,
mu pe wuuhaa kre fɛɛ.
7 Ŋmba we pe nya kro,
we na pe kuu.
A pe loŋgoolo pre we na yuu na,
o n pimi li, ŋgi na hin?
Pe sisaa pe,
mu pe Tafun Nyiɛkpɔɔ taan,
wre ŋmba wraa pe kaan,
kahaa chichie kre,
pe Tafun Nyiɛkpɔɔ,
ŋmba na pe tolɛɛlɛ
naa kaan wre,
pra sisaa pe mu u taan.
8 Yire ni leele pre,
e fɛ e yili Babylon tra nu,
e yiɛklu e fɛ e yili wa.
9 Mbe kanyaa le nyjeeri haa,
waŋgrɛ nyjɛ nu
faŋga nyi yire nu,
mbe pe paan Babylon tɔ.
Pie paan wi mbe ki shɔ.
Pe wi na snimi ni mu chin,
a pra wa mu la.
A na pe sɛ ŋunɔ pra ndru,
pe kro kɛ waara.
10 Kena pie pan,
mbe Babylon foolo jaŋga na.
A ki foolofɛɛnlɛ pre we yirɛ,
nyjɛ pe chaa ta mbe yɔɔ.
Pan mi e Tafun Nyiɛkpɔɔ
wre yo.
11 Babylon leele,
yire e na ni leele pre foolo fa,
na yeni yɛshɔɔrɔ kpɔɔ ni,
na napɔlɔ
ŋmba u shɔlɔ mbru wi.
Pan e naa pini na soo,
ŋmba yiɛ ki shɔ,
wra gble leni wi.
12 Nyifɛɛrɛ we Babylon
ŋga na e kaan kre gbo.
Waŋgrɛ kro nu,
ndro wa Babylon le,
mbe nya na,
kie kaari tablɔ tra gbeŋglen,
ŋga nu yaka wa pe.
13 O Tafun Nyiɛkpɔɔ krɔ,
ŋga ki kun kre ndra na,
kie ja kuraa ndro wa kro ki na.
Leele mblɛ pie na tro,
mbra ki nyaa pre,
kie pe fo, na ki pe ma.
14 Yire mblɛ e paan,
mbe wi na Babylon ni kre,
e lawee cha e yire,
e pe ŋu na e snimi yire ni.
Ŋgi na hin? Pe sisaa pe,
mu mi Nyiɛkpɔɔ wre taan.
15 E yire kokoe yire kro na,
e na pe gble.
Pe kɛnyi yire nyjeeri,
na pia jaa wi na e ni,
la, e pe nyinyi gedenyi yire,
na mboe yire kro juari e wo.
Mi e Tafun Nyiɛkpɔɔ wre,
ni fɔlɔ toni pe na.
E pe pe imi na pra plɛ pe kre.
16 Yaashia ti,
mbe pe yirɛ luufɛɛnlɛ pre,
kolo ta mbe yirɛ luu,
ndee mbe pe shɔlɔ kunfɛɛnlɛ pre,
mbe pe kolo ta,
mbe pe shɔlɔ kun.
Brɔfiɛn yiɛshiin kre ndra na,
fiɛrɛ we fumblɔ,
mblɛ pe yiri waŋgra ka nu,
mu pan mu tni pe nu pre yii,
mbe pe fɛ mbe sɛ
pe waŋgra nu, pe leelee pan.
17 Israel leele pe na mbaala,
mblɛ jira nini,
a pe fɛ mu nyina lɛ.
Assyria ŋunu wra klu,
mu pe tataara gbo,
a ŋmba wra taa
mu pe dɔɔya kuraa,
na wi Babylon ŋunu
Nebuchadnezzar.
18 Kena kee ŋga mi,
e Tafun Jaŋgafun,
Israel Nyiɛkpɔɔ wre yuu yi na,
mbe Babylon ŋunu wre,
na u leele ndie tini,
imi ndaa Assyria ŋunu
ndie tini kre.
19 La, mbe ndru mbe pan,
na Israel leele ni pe tra nu.
Pie sro nyjɛ pe fali
Carmel nyua na,
na Bashan tra nu ta mbe li.
Pie pe niŋge sro kro ta,
mbe li mbe yɔɔ,
Ephraim na Gilead,
nyambie lawee yire nu.
20 Na kre nyjila kre,
na ble kre waa to,
pie na pimi kee ka chaa
mbe nya, Israel na Judah
leele nu,
la, pia ka nya.
Pe chiɛri mblɛ na ni kɛ tɔ,
a pe kro pre,
mbe pe sisam ti mbe pe kɛ.
Mi pe Tafun Nyiɛkpɔɔ wre,
ni ki yo.
21 Babylon loŋgoolo pre,
e sɛ wi na Merathaim,
na Pekod leele ni.
E pe kɔŋgɔ ni,
e pe gbo pei, e pe dɔɔya.
E li kee ŋga,
mbe yo e pan kro na.
Pan mi e Tafun Nyiɛkpɔɔ yo.
22 Pie ŋunɔ gblee loo tra kre nu,
a pie lawee klaa gblee loo,
kpɔɔ tra kre nu.
23 Babylon na pe na tɔɔnrɔ yi,
mna waŋgrɛ kro gbun,
mu juari.
La, fuŋgaami ŋga,
pre na ki da.
Ki ja, mu waŋgrɛ kro fo.
24 Babylon, mu nsraa chaa,
mbe ni chin,
a fuŋga ni pɛlɛ mu ta mu yii,
fuŋga mu chin na pɛlɛ mu yii.
25 Ni ni ŋunɔwiyirɛ
tɛɛ haa kre nyaa,
a ni krɔ tɛɛ,
mu yili na yi ni fimi na,
ŋgi na hin?
Mi Nyiɛkpɔɔ Jaŋgafun,
wre tnumu ta mbe tun,
Babylon tra kre nu.
26 Kena yire haalee leele pre,
e pan e wi na pe ni,
e pe lawee yire gbun e juari,
e pe fa e ble na shɔlɔ,
e faa na ble titɛɛ.
E pe kla pei,
yaashia wa ti pe nu.
27 E pe ŋunɔwifɛɛnlɛ pre kro gbo,
yaa wa ti. Pe atɛ.
Ŋgi na hin? Pe kla nyjila,
na pe ndie tini nyjila ki da.
28 E loo kee nyjɛ,
mblɛ pe fɛ mu yili Babylon na,
mu pan Jerusalem na pre yuu.
Pe pan na mandiɛ boo na,
Nyiɛkpɔɔ fɔlɔ toni,
Babylon leele pre na,
u Suminyuŋgo ŋga pra kla fa,
kre ndra na.
29 E snimi wafɛɛnlɛ yeeri,
mbe pe paan wi,
na Babylon leele ni.
E pe kakpɔɔ kre fɛ e ku,
yaashia ti mbe pe wa fɛ,
mbe shɔ.
E pe kepele nyjɛ pra pe fa,
yire fɔlɔ tɔ pe na.
E pe pe imi na pra e pe kre.
Ŋgi na hin?
Pe e Tafun Nyiɛkpɔɔ,
Israel Nyiɛkpɔɔ cheche,
wre pe fiɛn.
30 Na ki ble kre waa to,
pie pe yirifumblɔ,
na pe ŋunɔwifɛɛnlɛ gbo,
mbe wo lete na.
Pan mi Nyiɛkpɔɔ wre yo.
31 Ŋu Babylon,
ŋmba mu muyɛ kpɔɔri,
ni nyibie sisaa kna mu na.
Ŋgi na hin?
Mu ndie tini ble to aŋga.
Pan mi Nyiɛkpɔɔ
Jaŋgafun wre yo.
32 Ŋu kpoŋmboorofun wre,
mu gbro mbe to,
a ma ndro ta mbe u mu yire.
Mbe kanhun le mu chiɛ yire na,
yie shɔ mbe le yirɛ,
nyjɛ yi mbra mu na kro nu.
33 Kee ŋga o Tafun Jaŋgafun Nyiɛkpɔɔ wre yuu yi kre mbo,
E na Israel,
na Judah leele pre fiŋge.
E na pe yii mu sɛ e waŋgra nu,
a e n naa chaa,
mbe pe ndru pe kro.
34 La, pe shɔfun wre sheli.
U mɛɛ yi,
o Tafun Jaŋgafun Nyiɛkpɔɔ.
Wre we pe kala yo pe pan,
mbe pe ŋga wejinyiŋge,
pe tra kre nu na.
La, Babylon leele,
pre wa wejinyiŋge ta.
35 Brɔfiɛn yiɛshiin paan,
Babylon na,
ki paan leele mblɛ pee wa,
mu tni wa kro na,
ki loplombo,
na ki kachimblɛ kro we ku.
Pan mi pe Tafun Nyiɛkpɔɔ yo.
36 Brɔfiɛn yiɛshiin paan,
pe kafinɛ keenyanyofɛɛnlɛ
pre na,
pe tni wa na pe jijiere ni,
fiɛrɛ titi ŋga kie pe
ŋunɔwifɛɛnlɛ pre yii,
a pie ku brɔfiɛn yiɛshiin
nyu na,
37 Brɔfiɛŋunu kie pe soolo,
na pe sookɛɛ yire kro kla.
A fumblɔ mblɛ pee wa,
pe wifɛɛnlɛ nu pre,
fiɛrɛ we ti pe kaari chiɛlɛ.
Pe loŋgoolo we pe keshiɛn
yirɛ kro foolo mbe sɛ.
38 Wam sisaa we yire tra kre nu,
mbe pe lɔɛ kro yua.
Babylon, bawa sɛɛnlɛ,
nyjɛ yi leele piɛri nyi,
mu tia ki leele kaari jijiele.
39 Tablɔ tra kre yurɛ,
na komboolo pie tni wa,
pre na kuweele ni.
Leele wa tni wa na fio,
hali dnunya nyu kɔɔrɔ.
40 Imi na o Tafun Nyiɛkpɔɔ,
wre na Sodom,
na Gomorrah kla fa kre,
pan we Babylon na chiɛ,
nyjɛ yi ki fɛ mu kun yire kla.
Kie ti mbe ndro,
wa jaa tni wa na fio.
Pan o Tafun Nyiɛkpɔɔ wre yo.
41 E le, ŋunɔwifɛɛnlɛ tataara,
plɛ paan,
nyjeeri haa tra kre nu,
pe yiri na paan.
Waŋgra kre kpɔɔ,
a ki ŋulo nɛɛ tataara.
Pe kanyaa le pe nu,
a pe yiri haalee wa na paan.
42 Pe kro bɛnyi, na snimi yii,
pe ndra sheli,
a ndro fooro n wa pe na.
Pan pe tini na paan,
na epo mbapilɛ waa,
na tini kpɔɔ.
Pee wa mu tni pe soolo na,
mu tɛni peyɛ na na paan,
na mu pe nya to,
mu chin na wifɛɛnlɛ lɛ.
Pe paan mbe wi,
na Babylon leele ni.
43 Ŋga Babylon ŋunu,
pe kee loo kre,
a ki tia u sɔɔnrɔ ku.
Fiɛrɛ tia wejiŋge be u na,
na se lɛɛ chlɔ yaa.
44 Imi na blɛkpɔɔ,
we yili Jordan lɔɔ klɔ nu,
mbra paan tra chichie,
ŋga nu mbaala kaa nu kre,
pan mbe pan,
mbe Babylon leele ni,
mbe yili pe tra kre nu,
mbe ki pe fo.
Ndro ŋmbi mbe wɔ,
mbe u kre tnumu,
ŋga tun ni pan hin?
Fɔna mi titi ki pe.
Ndro ŋmbi u da na ni ni hin?
Ndee mbe jaa ni nyu kaanri hin?
A ŋunu ŋmbi we jaa yire,
ni yiɛ hin?
45 E loo kee,
ŋga o Tafun Nyiɛkpɔɔ wre,
jawa mu wru Babylon haa,
na kee ŋga u yo mu tɛɛ,
na kie pe ki leele na.
Hali pie pan,
mbe pe biile kro yii jaŋga na,
mbe sɛ na pe ni.
A pe ndra na,
pie tra kre kro kla.
46 Ŋga ble Babylon we to,
tra ŋga kro we seeri.
A waŋgra ŋga kro,
we ki tiŋge loo.