Nyiɛkpɔɔ Ammon Leele Ndie Tini
49
Kee ŋga o Tafun Nyiɛkpɔɔ na yo mu wru Ammon leele haa yi kre mbo,Kena bibilɛ n wa,
Israel tra nu ra?
Ndee krɔlifɛɛnlɛ,
n wa pe pan ra?
Kena yira ŋgi ki tia,
sɛɛn Molech
Gad leele tra kre shɔ,
mu ta ma hin?
A ki leele sɛ chiɛ yire shɔ,
mu ta ŋga hin?
2 La, nyjila kaa wa na paan,
mbe ni ti mbe ŋunɔ kun,
Ammon leele kakpɔɔ,
Rabbah kre na.
Pie wi mbe ki ja,
mbe kanhun le ki kabɛɛlɛ,
nyjɛ yi ki fɛ mu kun
yire kro na.
Leele mblɛ pra wi,
mu Israel leelee ni,
pe tra nu kre,
Israel leele we pe ni,
mbe yili pe tra nu na.
Pan Nyiɛkpɔɔ yo.
3 Yire Heshbon leele,
e gblee kun,
ŋgi na hin? Pe Ai kla.
Yire mblɛ ee wa mu tni,
kakpɔɔ Rabbah na kre,
e nyɛni kpɔɔ.
E kumu yonyi tɔ,
e na kumu pini.
Tutom we wo e na,
mbe e na feni,
mbra shie mbra paan,
pe paan,
mbe e sɛɛn Molech kre,
na ki pɛɛrifɛɛnlɛ,
na ki tafɛɛnlɛ pre tio,
mbe sɛ waŋgra fɔŋgɔ nu.
4 Yira ŋgi ki tia,
yire Ammon leele mblɛ,
e yiri mu ni taan,
na e landɛɛ lawee,
nyjɛ nu yirɛ chichiele nyi,
yire teeri na,
eyɛ kpɔɔri ma hin?
E kaan yirɛ nyjɛ yii wa,
e pan na,
na yuu na ndro wa jaa wi,
na e ni.
5 Mbe ti waŋgrɛ,
nyjɛ yi e fɛ mu kun yire,
fiɛrɛ wo e na kpɔɔ.
Pan mi e Tafun Nyiɛkpɔɔ,
Jaŋgafun wre yo.
Pie e kro yii,
jaŋga na mbe sɛ,
ndro wa kro,
mbra mblɛ pie fɛ,
mbe sɛ ndra pre le.
6 La, yire kee nyjɛ kɔkro,
mbe ndru,
mbe ti e e tnimu chichie,
lɛɛ kre ta na.
Pan mi Nyiɛkpɔɔ yo.
Nyiɛkpɔɔ We Edom Ndie Tini
7 Kee ŋga o Tafun Jaŋgafun Nyiɛkpɔɔ yo mu wru Edom tra kre leele haa yi kre mbo,
Kena kachimblɛ kɔ,
Teman na ra?
Kena jawala ŋgafɛɛnlɛ kɔ,
kachimblɛ pre nu ra?
Kena pe kachindɛ fun pe nu ra?
8 Yire mblɛ ee wa Dedan na kre,
e yiɛ kna e na feni,
e sɛ ndra,
nyua weele nyjɛ yi juo nu.
Ŋgi na hin?
Nyjila da mbe ni pan,
mbe Esau nɔɔ leele
pre ndie tini.
9 Kena na tinyi sɛnyi,
nyjɛ ni pe simi pini yire,
yoorifɛɛnlɛ waa pan,
mu yɛ yoori e lawee,
pia chiɛri yɛ ti e pan ra?
A na juolo pan juhaa blee,
nyjɛ pe chaa ma pe juu ra?
10 La, Esau nanae pre,
mbe pe yirɛ kro shɔ pe pan,
mbe praa tro kɛwaara,
a mbe pe fɛndrahɛɛ,
yire wɔ fimi na,
mbe pe ndrahaa,
cha mbe la.
Pe biile, na pe sele leele,
na pe tnifɛɛnlɛ kro we ku
mbe fun.
11 E sɛ e e bijile ti ni pan,
mbe pe le mbe pe ŋmaa ta,
a e lekuchiɛlɛ
we jaa dankna ni na.
12 Kee ŋga o Tafun Nyiɛkpɔɔ yuu yi kre mbo, “Na leele mblɛ pe n fna mbe ndietiniɛ ta pre, na pe waa ni ndietiniɛ ta, kena ŋgi kie ti mbe mba yire ndie tini hin? Mba e ti finfin.” 13 O Tafun Nyiɛkpɔɔ wre yo mbo, “Ni da mu niyɛ ŋga na Edom kakpɔɔ Bozrah kre we kaari kajaa, mbe praa ki le mbra tɛɛ, mbra kna mbra ki le na kpɔli yira yi, mbra pe suni. A ki mbɛɛlɛ chiɛ yire kro we ja, yia jaa kaari chiɛ na.”
14 Ni kee ka loo o Tafun Nyiɛkpɔɔ wre pan, na u ndro tun waŋgrɛ yire nu, mbo,
E yiri e eyɛ kna e sɛ wi,
e yiri e sɛ wi na Edom leele ni.
15 Edom waŋgra,
ni paan mbe mu pe fiɛn,
waŋgrɛ yire kro yiɛ,
mbe ndro kro mu le fiɛn.
16 Mu yɛkpɔɔmu kre mu fana.
Ndro n na mu fiɛ,
imi na mu jawa,
na pe mu fiɛ kre.
Nyuɛ chuuli chuuli ndrɛ na,
mu leele nyi mu tni.
Pan e nyi na nyuu,
ŋmba u sɛ u zeere le,
nyua gedeŋge na wi.
Bawa mbe e tini, mbe wa tra.
Pan mi Nyiɛkpɔɔ wre yo.
17 Edom we pe na kpɔli yira yi,
leele mblɛ pie na tro,
mbra ki nyaa pre,
kie pe fo, mbe pe pe weere ni,
mbe praa pe pini mbra tɛɛ,
imi na ki pe kre ndra na.
18 Imi na ndaa Sodom,
na Gomorrah kakpɔɛ yire,
na yi mbɛɛlɛ chiɛ yire kla kre,
pan chɔɔ Edom we pe,
ndro wa jaa tni wa na.
Pan mi e Tafun Nyiɛkpɔɔ,
Jaŋgafun wre yo.
19 Imi na jira we yili,
Jordan lɔɔ mbɛɛ klɔ nu,
mbe pan yurɛ kahaa,
tra chichie kre nu kre,
pan mbe Edom leele ni,
mbe yili pe tra nu nyaanyaa.
Ndro ŋmbi mbe wɔ,
mbe u sɛ wi na pe ni hin?
Ŋmbi u da,
na mi Nyiɛkpɔɔ ni hin?
A ŋmbi we jaa yire,
mbe ni nyu kaanri hin?
A ŋunu ŋmbi,
we jaa yire ni yiɛ hin?
20 Kena e loo, jawala ŋga,
o Tafun Nyiɛkpɔɔ wre,
wru na Edom leele ni,
na kee ŋga u chaa,
mbe ki kakpɔɔ Teman da.
Pie leele pre na pe biile kro,
yii mbe sɛ,
mbe tra kre kro kla.
21 Na Edom waa to,
pie ki tiŋge loo,
mbe waŋgra ŋga kro seeri.
Hali epo nyiɛ kre,
we ki tiŋge kre shɔ.
22 E le, imi na nyuu yirii nyjeeri,
mbe chuun mbra tri kre,
pan Bozrah loŋgoolo we pan,
mbe pe pe.
Pie pe kuɛn nyaa,
mbe Bozrah tɔ.
Kre ble kre,
Edom ŋunɔwifɛɛnlɛ lɛɛ,
we be na selɛɛ chlɔ yaa.
Damascus Kee
23 O Tafun Nyiɛkpɔɔ na Damascus kakpɔɔ kre kee yo mbo,
Leele mblɛ pee wa Hamath,
na Arpad kakpɔɛ,
yire na pre jawala kla.
Ŋgi na hin?
Mandiɛ sisaa le pe ndie.
A pra jijawi,
a pe titɛɛ cha mu la na shie,
na paan na epo nyumu yi.
24 Damascus leele sɔɔnrɔ ku,
a fiɛrɛ kpɔɔ tia pra feni.
Pe lɛɛ be,
a fiɛrɛ tia wejiŋge wɛɛri pe na,
na chlɔ chaa mbe se.
25 Mni ki le, a kakpɔɔ ŋga na,
yɛshɔɔrɔ na nyi fa,
a ni yiɛ naa wa ki na kre,
a leele n fɛ
mu yili ki na tun hin?
26 Na ble kre waa da,
Damascus yirifumblɔ,
we ku ki lete na,
mbe ki ŋunɔwifɛɛnlɛ nyu ku.
Pan mi Nyiɛkpɔɔ
Jaŋgafun wre yo.
27 Mbe kanhun le,
Damascus mboe yire na,
mbe ki ŋunu Ben-Hadad,
katoo kre kro shɔ.
Kedar na Hazor Kee
28 Kee ŋga o Tafun Nyiɛkpɔɔ na yo mu wru Kedar, na Hazor lawee nyjɛ Babylon ŋunu Nebuchadnezzar na sɛ wi mu shɔ yire haa yi kre mbo,
E yiri e sɛ wi na Kedar leele ni,
e leele mblɛ pee wa,
na shie yila finhaa wa pre kla.
29 E pe yonyi nyinyi,
na pe yurɛ yii e sɛ,
e pe asɛkɛ yire klɔ,
e sɛ na yi ni.
Yire na pe yirɛ,
na pe nyuuma ni kro.
Leele we gble le mbra yuu na,
fiɛrɛ kpɔɔ wa lawee kro nu.
30 Yire mblɛ ee wa,
mu tni Hazor na kre,
e yili nyaanyaa e fɛ.
E fɛ e sɛ ndra dnɛ weele nu,
ŋgi na hin?
Babylon ŋunu Nebuchadnezzar,
na u leele jawala wru e na,
a u ki kolo ta.
Pan mi Nyiɛkpɔɔ wre yo.
31 Babylon leele,
e yiri e sɛ wi,
na waŋgra ŋga leele,
pee wa wejinyiŋge nu,
na kaan peyɛ na pre ni.
Praa pe chiɛ krɔɛ tɔ,
a pe leele chiin,
pee wa mu tni peyɛ na.
Pan mi Nyiɛkpɔɔ wre yo.
32 E pe yurɛ foolo e sɛ,
pre leele mblɛ,
pe pe ndrɛ klu,
paala kolo na kre,
mbe pe gbun mbe nyina,
lawee kro nu.
A mbe ti kanyana kpɔɔ,
tuu pe na.
Pan mi Nyiɛkpɔɔ wre yo.
33 Hazor we kaanri,
ŋmbokuŋmboe tni haa.
Kie sni waara nyjila kro nu.
A ndro wa jaa tni wa.
Elam Kee
34 Nyjila ŋga nu Judah ŋunu Zedekiah na tni jɔɔn na kre, ki nsra mu, a o Tafun Nyiɛkpɔɔ na Elam kee yo Jeremiah pan mbo,
35 Le, ni Elam bɛŋɛ ka u kɛɛ,
kre nu u faŋga kro nyi.
36 Mbe ti loŋgoolo yiri,
kokoe yire kro na,
mbe paan pe gbun,
mbe nyina.
Kre waŋgra n wa,
mbe pia Elam leele pre,
plɛ yii mbe sɛ wa.
37 Mbe Elam leele pre kla,
pe loŋgoolo mblɛ pe pe chaa,
mbe gbo pre yiɛ na.
Mbe ti mbe kanyana kpɔɔ,
tuu pe na.
Pie ni krɔkuɔn sisaa kre nya.
Mbe pe kɔŋgɔ ni
na brɔfiɛŋunu ni,
mbe sɛ su na mbe pe dɔɔya,
mbe pe nyu to.
Pan mi Nyiɛkpɔɔ wre yo.
38 Mbe ni ŋujɔɔn kan Elam na,
mbe pe ŋulo,
na pe loplombo kro kla.
Pan mi Nyiɛkpɔɔ wre yo.
39 La, yire kee nyjɛ krɛrɛ kɔkro,
mbe ti mbe Elam ndru,
mbe pe na ki fa yi.
Pan mi e Tafun Nyiɛkpɔɔ
wre yo.