Moab Kee
48
O Tafun Israel Nyiɛkpɔɔ Jaŋgafun wre kee ŋga wra yo ni yo, mu wru Moab tra kre haa yi kre, mbo,Nebo chia kre atɛ, ŋgi na hin?
Pe paan mbe mu ja.
Pe paan mbe Kiriathaim kla,
mbe nyifɛɛrɛ ki leele gbo.
Ki leele fɛndrahɛɛ yire kro we ja,
mbe nyifɛɛrɛ pe gbo.
2 Moab yɛnyiŋge we kɔ.
Heshbon loŋgoolo paan,
mbe ki tɔ,
na yuu na e pan,
mbe o sɛ waŋgra kre kro ja.
Pie chia ŋga pe yeeri Madmen
kre kla na,
mbe ndro wa yaka loo wa na.
Brɔfiɛn yiɛshiin kre,
we pe kɔŋgɔ ni wa.
3 Horonaim leele nyɛni,
wejiwrɛ kpɔɔ,
na lawee klaa nyɛnɛɛ yi.
4 Pie Moab tra kre ja,
mbe ki biile na nyɛni.
5 Pie Luhith kolo yii,
mbra nyɛni titi mbra shie,
Na pe lawee klaa kre kee loo,
pie nyɛni mbe sɛ Horonaim na.
6 E fɛ nyaanyaa e e ndra ta,
e fɛ na nyaalam bubnɔ wi.
7 Moab leele,
ŋga e kaan e kepele,
na e swa taara na kre,
ndra na, pie mu tra kre kla.
A mu sɛɛn Chemosh kre,
pie kre na ki pɛɛrifɛɛnlɛ kro yii,
mbe sɛ waŋgra fɔŋgɔ nu.
8 E loŋgoolo pre we le,
e chiɛ yire kro na,
kre chia n wa mbe shɔ u kɛɛ.
Moab tra mbrɛrɛ,
na yi landɛɛ lawee yire kro,
yie kla.
Ŋgi na hin?
O Tafun Nyiɛkpɔɔ wre,
u paara.
9 E weŋge nyaara,
e wo Moab tra nu,
mbe yaka wa nyu wa na,
ŋgi na hin? Ki kla nyjila da.
E ki leele ŋga kuɛn,
mbe pe yiri na hanyiɛlɛ lɛ,
ŋgi na hin?
Nyjila da mbe tra kre,
sni waara,
mbe ndro wa jaa tni,
ki na na.
10 Ni chaa mbe e,
Moab leele pre gbo,
na e waa tia pe shɔ,
mbe ti suŋgɔ e yii.
11 Wejiŋge nyjii,
Moab tra kre na,
mu yire ki bimi,
pe n da mu ki leele yii,
mu sɛ waŋgra fɔŋgɔ nu tun.
Moab pe na simi,
ŋga pe ti ki gbolo nu,
a ki tnamu n chinɛ tun yi.
12 La, nyjila kaa wa na paan,
mbe ti mbe leele pan Moab na,
pie pe pe na simi
pe kna mu wo.
Pie pan mbe ki simi le yirɛ,
kna mbe wo,
mbe gboelee yire gbun,
mbe juari.
13 Na ki pan ma,
nyifɛɛrɛ we Moab leele gbo,
ŋgi na hin? Pe sɛɛn Chemosh,
kre n ja mu pe shɔ,
pan pie pe imi na Israel leele,
na peyɛ wru mu taa,
Bethel sɛɛn na,
a ki nsra ja mu pe shɔ kre.
14 Moab leele,
e yuu na ŋunɔwifɛɛnlɛ lɛ yire,
a ee wa bilɛ gbunfɛɛnlɛ,
faŋgafɛɛnlɛ ni.
15 Pe paan mbe Moab tra,
na ki chiɛ yire kro tɔ
mbe yi kla.
Pie pe yirifumblɔ,
mblɛ nu faŋga nyi titi pre,
lagboe knumu brɔfiɛŋunu ni.
Pan o Tafun Nyiɛkpɔɔ,
Jaŋgafun wre yo.
16 Moab klahaa mbra mna,
ki kanyana ble we da,
fuŋgaami.
17 Yire mblɛ ee wa mu tni,
mu mbra ki na kre,
e nyɛni e ki ŋga.
Yire mblɛ e mɛɛ,
ŋga kra ta fa chin kre,
e yo na Moab tra,
ŋga kraa wa jaŋga ni kre,
ki yɛnyiŋge kla fuŋga.
18 Yire mblɛ ee wa,
mu tni Dibon na kre,
ni e laari e yɛnyiŋge,
tnihaa kre na,
e pan e tni tra bloŋgo nu.
Ŋgi na hin?
Ŋmba u Moab kla kre,
paan e na,
u paan mbe e kakpɔɛ,
nyjɛ e mboe sin,
mu fɛ mu kun yire ja.
19 Yire Aroer leele,
e yili e yire kolo mbɛɛ na,
e na le.
E bilɛ na chiɛlɛ,
mblɛ pe feni mbe shɔ pre wie,
e pe wie,
na yira ŋga ki pan hin?
20 Pie yo pe pan na,
Pe Moab tra ki kla,
a nyifɛɛrɛ pe gbo.
E nyɛni e gble le kpɔɔ.
E ki kpali e tro,
Arnon lɔɔ mbɛɛ kre na kro,
na pe Moab kla.
21 O Tafun Nyiɛkpɔɔ,
Moab kakpɔɛ nyjɛ yii wa,
tra mbrɛrɛ nu kre,
leele ndie tini,
hali pe sɛ le Holon, na Jahzah,
na Mephaath na.
22 Hali mu tro mu sɛ Dibon,
na Nebo,
na Beth-Diblathaim na,
23 Na Kiriathaim,
na Beth-Gamul,
na Beth-Meon,
24 Na Kerioth, na Bozrah,
na Moab kabɛɛlɛ,
nyjɛ yii wa nyjɔ,
na haalee yire kro na.
25 Moab faŋga kre nyu to,
pe ki jaŋga kro kla.
Pan o Tafun Nyiɛkpɔɔ wre yo.
26 Moab leele we gbɔ mbe to,
ŋgi na hin?
Pe yiri mu mi Nyiɛkpɔɔ taan.
Pie gbila pe tuuroe nu,
mbe praa pe pini mbra tɛɛ.
27 Moab, ŋu mnaa Israel leele,
piin na tɛɛ kree?
Yire e naa Israel leele gble,
na pe pre na juolo chaa mu yii.
A kra tia na e pe kee yuu,
mbe e na ndra nyaara,
na kpɔli yira ka e nya.
28 Yire Moab leele,
e fɛ e yili e chiɛ yire na,
e sɛ ndra dnɛ ndoolo.
E pe na kotro ŋmba u sɛ,
u zeere le,
dnɛ wee nyu na wi.
29 O Moab leele,
yɛkpɔɔmu kre loo,
imi na pe gbun sini,
na kpoŋmbooro kee yuu.
30 Ni chin imi na,
e eyɛ kpɔɔri mu da,
nyjɛ e pini yire kro,
we pe waara,
e kpoŋmbooro kee yire,
krɛrɛ wa e ŋga yaka.
Pan mi e Tafun Nyiɛkpɔɔ
wre yo.
31 Ki tia mbe nyɛni,
mbe Moab leele ŋga,
mbe fooro li,
mbe Kir-Hareseth leele ŋga.
32 Mbe nyɛni mbe Sibmah ŋga,
hali mbe wɛ imi mbe nyɛni,
mbe Jazer leele ŋga na.
Ŋu kakpɔɔ Sibmah,
pan mu nyi na tre tiŋge,
ŋga klɛ ki fo,
mu sɛ Weŋge Epo kre kun,
hali mu sɛ da Jazer epo kre na,
la, mu loŋgo wre mu tinyi li
wee nyjɛ yi nyina yire,
mbru mu wo.
33 Tnamu, na yɛshɔɔrɔ,
kɔ Moab tra,
ŋga kra tna fa kre nu.
Ni tia simi kun,
pe simi fɛɛri ndoe yire nu.
Ndro n wa mbe simi ta,
mbe fɛɛri,
mbraa yɛshɔɔrɔ gblee leni na.
Pe gble leni wa,
la, yɛshɔɔrɔ gblee ma.
34 Gblee ŋga ki ndru wa kre,
ki yiri Heshbon na,
a praa ki ndru Jahaz,
na Elealeh na.
A gblee kre ndru Zoar na,
hali a pe ki loo Horonaim,
na Eglath-Shelishiyah na.
Hali Nimrim nyumu lawee,
yire kro yua.
35 Moab leele mblɛ pe sra woni,
na tuwe ndiom tɛɛn sroi,
na pe sɛɛnlɛ kaan,
nyambie lawee yire nu kro,
nyu we to.
Pan mi e Tafun Nyiɛkpɔɔ
wre yo.
36 Ni nyɛni ni lɛɛ na Moab,
na Kir-Hareseth leele kaan,
pan ni nyɛni na ndro bnɔ foo,
na kumu mɛɛ koni.
Ŋgi na hin?
Pe yɛtaara yirɛ nyjɛ pe fna,
mu cha yire, yi kro yili pe kɛɛ.
37 Leele pre kro pe ndrɛ klu,
mu pe nyutanyooro klu,
mu pe kɛnyi knumu,
na brɔfiɛn ni,
mu kumu yonyi pɔ sɛlɛ,
a ki nyina na fooro pe lii.
38 Moab zio yire ndrɛ na kro,
na lawee nyjɛ nu leele,
jiin na pini yire nu,
na mu da wa, ma yaka nya,
na fooro lie bɔkɔ.
Ŋgi na hin?
Ni Moab tra kre kla,
ni ki ja na chɔ yi,
a ndro wa jaa ki tɛɛ,
mbe yaka pe.
Pan mi e Tafun Nyiɛkpɔɔ wre yo.
39 Moab tra kre ja,
a ki leele na kuulo tɔɔnri,
nyifɛɛrɛ Moab leele gbo aŋga.
A leele na pe pini na tɛɛ.
Ndro Wa Shɔ Moab Na
40 Kee ŋga o Tafun Nyiɛkpɔɔ wre yo yi kre mbo,
“E le, e loŋgo wa paan,
mbe chuun mbe tro tra kre nu,
na nyuu wi,
we kuɛn nyaa
mbe Moab tra kre juule.
41 We wi mbe kakpɔɛ yire,
ndoe nyjɛ pe sin,
na ndra yi nu
ŋunɔ nyjila yire kro shɔ.
Ki ble kre,
Moab ŋunɔwifɛɛnlɛ pre,
lɛɛ we be, na selɛɛ chlɔ yaa.
42 Moab we kla,
kia pe waŋgra na,
ŋgi na hin? Ki leele yiri,
mu mi Nyiɛkpɔɔ taan.
43 Fiɛrɛ sisaa, na weele pɛɛlɛɛ,
na mɛnyi pɛɛlɛɛ yii wa,
na Moab leele sri.
Pan o Tafun Nyiɛkpɔɔ wre yo,
44 ŋmba we fɛ mbe shɔ,
fiɛrɛ kee yire nu kre,
we sɛ to wee nu,
a ŋmba we jaa yili,
wee kre nu kpan,
we sɛ to mɛnyi pɛɛlɛɛ yire nu.
Ŋgi na hin?
Moab kla nyjila ki da.
Pan mi Nyiɛkpɔɔ yo.
45 Moab leele mblɛ pie fɛ,
mbe sɛ ndra Heshbon na,
pre we sɛ yire wa,
mbe kɛ taa nyu na,
ŋgi na hin?
Kanhun we to Heshbon,
ŋga ŋunu Sihon,
naa le fa kre,
na kie shɔ mbe sɛ,
nyambie lawee,
nyjɛ nu Moab leele mblɛ pan
ŋunɔwiire tna pre nu.
46 Moab leele, yire mblɛ,
e sɛɛn Chemosh sumi kre,
e atɛ. Pe e kla aŋga.
Pe e bibilɛ, na e bichiɛlɛ yii,
mu sɛ waŋgra fɔŋgɔ nu.
47 La, ki blee wa na paan,
mbe ni Moab leele pre shɔ,
mbe pe ŋga pe tnihɛɛ lɛɛ yire.
Pan mi pe Tafun,
Nyiɛkpɔɔ wre yo.”
Kena kanyana nyjɛ kee o Tafun Nyiɛkpɔɔ wre na yo na Moab leele we nya yire yi kre.