Philistine Leele Kee
47
O Tafun Nyiɛkpɔɔ wre na Philistine leele kee yo u keenyanyofun Jeremiah pan, a Pharaoh na chin mna pan mu wi na ki leele ni Gaza na.2 O Tafun Nyiɛkpɔɔ wre na yo mbo,
E le imi na loŋgoolo yiri,
nyjeeri haa wa na paan,
pan pe nyi na lɔɔ ki nyi,
mu lawee shɔ mu ta mbe nyi,
mbe yira kro tɔ tra kre nu,
chiɛ yire na leele,
mblɛ pee wa yi na kro.
Leele mblɛ tra kre nu kro,
we nyɛni mbe julo.
3 Na biile lɛɛlɛ waa,
soolo dumble tiŋge loo,
na sookɛɛ jeelee tiŋge loo kre,
pie fɛ mbe pe biile ti,
fiɛrɛ we ti mbe pe kɛnyi gblɛ.
4 Ŋgi ndra na hin?
Philistine leele, kla ble da,
a pe mblɛ pie kro chiɛri,
mbe jaa ya Tyre,
na Sidon leele na kre,
mbe pe kro dɔɔya.
O Tafun Nyiɛkpɔɔ wre paan,
mbe Philistine leele,
mblɛ tolɛɛlɛ pra klu mu,
tni kuyɔɔsu ŋga pe yeeri,
Crete na pre kro wa shɔ.
5 Gaza leele we pe ndrɛ klu,
mbra kumu piin,
mbe Ashkelon leele
nyu pɔ pe na.
Yire Philistine leele,
mblɛ e kro chiɛri pre,
ŋgi nyjila e fooro lie
nyu we to wo?
6 Ŋgi ble o Tafun Nyiɛkpɔɔ,
brɔfiɛn yiɛshiin kre,
nyu we nyjii wo?
Brɔfiɛŋunu ndru mu sɛ le,
mu afoo nu.
Ti ma, mu tni titɛɛ mu wuu.
7 Mni brɔfiɛŋunu kre we pe,
mbe tni mbe wuu hin?
O Tafun Nyiɛkpɔɔ wre,
u paara mu ki ŋga tnumu,
na ki wi na Ashkelon leele,
mblɛ pee wa epo nyu na pre ni.