Egypt Kee
46
Kee ŋga o Tafun Nyiɛkpɔɔ na yo u keenyanyofun Jeremiah pan mu wru waŋgrɛ kro haa yi kre.2 Kre kee ŋga yo Egypt ŋunu Pharaoh Neco pan, ŋmba ŋunɔwifɛɛnlɛ pra to Babylon ŋunu Nebuchadnezzar yiɛ Euphrates lɔɔ kre mbɛɛ na, chia ŋga pe yeeri Carchemish kre na, kre nyjila kre na Josiah biblɔ Jehoiakim pan mu jɔɔn li Judah tra nu yɛlɛ jijirɛ.
3 Egypt ŋunɔ wifɛɛnlɛ e eyɛ kna,
e ŋunɔwiyirɛ kpɔɛ,
na bɛɛlɛ kro wru,
e yili e sɛ ŋunɔ.
4 E krafi le e soolo pre na,
e pe wɔ fimi na, e tni pe na,
e e ŋunɔ wi juulee,
haa cha e le.
E e snimi nyu liɔ,
e yirɛ nyjɛ ni,
e eyɛ toni ŋunɔ yire wru,
e lawee cha e yire chiriri.
5 A yira ŋgi ni nyaa ŋga hin?
Fiɛrɛ kpɔɔ ki pe yii,
a praa ndru kro ni,
pe pe wifɛɛnlɛ pre ja ŋunɔ.
Pe feni nyaanyaa mbe shɔ,
fiɛrɛ tia hali pia kna,
mbe le pe kro.
Pan mi e Tafun Nyiɛkpɔɔ,
wre yo.
6 Mblɛ jeele ki tna tra pre
fɛ mu pra,
a faŋgafɛɛnlɛ n ja mbe fɛɛ shɔ.
Euphrates Lɔɔ kre lawee,
na shie ki nyjeeri haa,
bawa pe kro gbro mu to.
7 Waŋgra ŋgi ki yiri,
mu pe na Nile lɔɔ kre yi,
mu nyi mu lawee shɔ,
mu ta ŋga hin?
8 Egypt waŋgra kre ki yiri,
mu pe na Nile lɔɔ kre yi,
mu nyi mu lawee shɔ,
mu ta ma kre.
Waŋgra kre na yo mbo,
Mbe yiri mbe waŋgra,
kro shɔ mbe ta.
Mbe kakpɔɛ,
na yi leele kro kla.
9 Egypt, yo mu ŋunɔ wi soolo pre,
na mu sookɛɛ yirɛ pan na,
pe sɛ wi faŋga ni.
Ethiopia, na Libya wifɛɛnlɛ pre,
pe ŋunɔ wi yirɛ,
nyjɛ ni pe peyɛ toni kre tio,
mbe Lydia wolo pe bɛnyi,
na pe snimi wru.
10 La, kre ble kree wa o Tafun,
Nyiɛkpɔɔ Jaŋgafun wre kɛɛ,
wre we wi mbe fɔlɔ tɔ,
u loŋgoolo pre na.
U brɔfiɛn yiɛshiin,
kre we nyimi gbɔ mbe yɔɔ,
mbe nyimi gbɔ la
wa ki ta na.
Ŋgi na hin?
O Tafun Nyiɛkpɔɔ Jaŋgafun,
wre we sra kpɔɔ wɔ,
nyjeeri haa tra kre nu,
Euphrates lɔɔ kre mbɛɛ na.
11 Egypt leele, e sɛ Gilead na,
e sɛ tuwe haa cha,
e tuweele yire krɛrɛ ka n ja,
mbe tnumu tun.
Yi ka n wa mbe jaa mu tra.
12 Waŋgrɛ kro,
we e nyifɛɛrɛ kee yire loo,
ndro kro we mu nyɛnɛɛ loo,
tra yiɛ na.
Mu ŋunɔwifɛɛnlɛ we fɛ,
mbra gbroi peyɛ na,
mbra tuuri.
Nebuchadnezzar Paan Egypt Na
13 Ŋga Babylon ŋunu Nebuchadnezzar naa paan mbe wi na Egypt leele ni kre, o Tafun Nyiɛkpɔɔ na paara u keenyanyofun Jeremiah pan mbo,
14 Kre kee ŋga kpali Egypt tra nu,
mu ki yo Migdol na.
Sɛ ki kpali Memphis,
na Tahpanhes yire na.
Yo pe pan na pe peyɛ kna,
mbe wi mbe peyɛ shɔ.
Ŋgi na hin?
Brɔfiɛn yiɛshiin kre,
leele kuu na paan.
15 Ŋgi kie ti mbe mu,
ŋunɔwifɛɛnlɛ pre to hin?
Pia jaa yire pe yiɛ,
ŋgi na hin?
Mi e Tafun Nyiɛkpɔɔ wre,
mbe pe ŋunɔ mbe chan.
16 Mbe ti mbe praa gbroi,
Pie na tuuri,
mbra gbila peyɛ na.
Pie na yuu peyɛ pan mbo,
E yiri mbe o ndru,
mbe sɛ o tra nu o leele pan,
mbe shɔ o fiŋgefun,
brɔfiɛn yiɛshiin kre kɛɛ.
17 Na ki pan ma,
kee ŋga pie na yuu yi na,
Jaa Egypt ŋunu Pharaoh wre,
nyu u yuu na gble finfin,
u nyiɛnyɔɔrɔ nyjila tro.
18 Ŋga mi e Tafun Nyiɛkpɔɔ,
Jaŋgafun wree wa,
mu pe ŋulo kro ŋunu,
mu na le ŋga,
mbe ti mbe loŋgo wre
jaŋga ta e na,
mbe pe na nyua Tabor,
na nyua Carmel,
nyjɛ yi gede na nyaa,
nyuɛ lalaa yire yi.
19 Yire mblɛ ee wa,
mu tni Egypt tra nu kre,
e eyɛ kna,
pe paan mbe e yii,
mbe sɛ pe waŋgra nu haalee.
E kapɔɔ Memphis,
kre we tni waara. Kie ja,
hali ndro wa kro ki na.
20 Egypt waŋgra kre nyu,
na nabie chichie wi.
La, loŋgo wa we yiri,
nyjeeri haa wa,
mbe paan wi na ki ni,
we pe na naknɔ u nuu niɔ.
21 Ŋunɔwifɛɛnlɛ mblɛ,
Egypt sɛ hari pre,
pan pie pe na nuulo,
mblɛ pe ka mu kpɔɔ kpɔɔ,
a pia jaa yaka pe lɛ.
Pie krɔ kna mbe fɛ,
pia jaa yire loŋgo wre yiɛ.
Ŋgi na hin? Pe kla ble ki to.
22 Na pe loŋgo wre waa tin gri,
mu na paan pɔɔrɔ ni kre,
Egypt wifɛɛnlɛ pre we pe na,
wɔɔ u feni mbe shɔ.
Gbaanlɛɛ ni pie pan e na,
mbe e knumu,
mbe wo na klɔ tinyi yi.
23 Imi na ee nɛɛ na klɔ tinyi yi,
mbe da kpan,
pie e knumu mbe wo,
ŋgi na hin?
Pe nɛɛ mu wɛ kpatɔ na,
hali ndro wa jaa pe tɔɔnri.
24 Nyifɛɛrɛ we Egypt leele gbo,
ŋgi na hin?
Pie pe wru mbe le,
nyjeeri haa wa leele kɛɛ.
25 O Tafun Nyiɛkpɔɔ, Israel Nyiɛkpɔɔ Jaŋgafun wre yo mbo, “Ni paan mbe sɛɛn Amon ŋga kii wa Thebes kakpɔɔ na kre ndie tini, kre na Egypt sɛɛnlɛ, na ki ŋulo, na mblɛ pe peyɛ wru mu taa u na mu na kaan u na kre ni kro, 26 mbe pe wru mbe le Babylon ŋunu Nebuchadnezzar, na u loplombo mblɛ pe pe chaa mbe gbo pre kɛɛ. La, nyjila kaa wa na paan, mbe leele ndru mbe nɛɛ Egypt tra nu na na ki fa yi. Pan mi e Tafun Nyiɛkpɔɔ wre yo.”
27 Yire ni sumifɛɛnlɛ Israel leele,
mblɛ lɛ Jacob nanae pre,
yaa ti mbe gbun yɔ e na.
Haalee ŋga nu e nyi wa kre,
ni yo mbe e shɔ mbe yili wa,
mbe e nanae pre shɔ,
mbe yili pe tnibim nu.
Yire Israel leele ee ndru,
mbe tni wejinyiŋge nu,
a yaka wa e ta,
a ndro wa e le fiɛrɛ na.
28 Yire ni sumifɛɛnlɛ Israel wolo,
ni yuu e pan na yaa fiɛ.
Ŋgi na hin?
Mba fɛ mbe e wa.
Pan mi e Tafun Nyiɛkpɔɔ yo.
Kii wa na mbe waŋgrɛ nyjɛ nu,
ni e ni mu sɛ yire kro kla,
la, mba yire kla kro.
Mbe e ndie tini, kpra kolo na,
mba e ti, mbe e eyɛ ta
gblulu ma.