Nyiɛkpɔɔ Jerusalem Ndie Tini
2
O Tafun Nyiɛkpɔɔ krɔ kunna Jerusalem ni,
ki tia u ki juule na ndramwɔɔ
kprikpri ni.
A ki yɛnyiŋge ŋga kra ta
mu yiri nyjeeri
kre kro kla tra mna.
Ŋga ble Nyiɛkpɔɔ krɔ na kun kre,
u nsra u Suminyuŋgo
kre sɔɔnri na.
2 Nyiɛkpɔɔ na Jacob nanae
pre tnihɛɛ yire kro kla,
hali u nsra pe fooro le.
Wra krɔkuɔn tɛɛ
mna Judah leele
fɛndra lawee yire kro juari.
U pe ŋulo, na pe loplombo
kro tre tra,
a nyifɛɛrɛ pe gbo.
3 Ŋga Nyiɛkpɔɔ krɔ na kun
kpɔɔ kre,
wra Israel jaŋga kro shɔ u kɛɛ.
A ŋga pe loŋgoolo na pan pe pan kre,
wra kɛ laa pe na,
a loŋgo wre na le Jacob nanae
pre nu na kanhun yi,
mna pe yirɛ kro sro.
4 Nyiɛkpɔɔ wre o ŋu na snimi ni
na u loŋgoolo lɛ wre,
mu mblɛ na o yiɛ na nyi,
a pe kee na tna o pan
kre gbo mu wo.
U tia o u krɔkuɔn kre gbra kun,
a ki pe na kanhun yi,
mu o kalonyi sro
Jerusalem na mu wo.
5 Nyiɛkpɔɔ pe na o loŋgo wi,
u o kla peii,
hali o ŋulo katoe yire kro,
u yi kla kro,
a o fɛndra hɛɛ yire kro u yi juari,
a ki tia Judah leele
na nyɛni na tro.
6 U tia u Suminyuŋgo
ŋga yi u tni haa kre,
sni waara na kagbla lam yi,
lawee ŋga nu pe fni na u sumi kre,
u ki kla.
O Tafun Nyiɛkpɔɔ wre
tia pe Jerusalem kee fɛɛ.
Ble kpɔɛ nyjɛ praa lii,
na Wuuble yire kro,
pe yi kee fɛɛ.
U krɔkuɔn sisaa kre tia,
u ŋulo na srawɔfɛɛnlɛ kro je.
7 O Tafun Nyiɛkpɔɔ
u Suminyuŋgo kre,
na u sragbunu kre je.
U ki wru mu le loŋgo kɛɛ,
yire na kakpɔɔ kre mboo kre,
na ki ŋunu katoo yire kro.
Loŋgoolo pre gble le,
o Tafun Nyiɛkpɔɔ
Suminyuŋgo wa,
mu yo ble kpɔɔ ka pe lii.
8 O Tafun Nyiɛkpɔɔ jawala le,
na we mboo ŋga pe sin,
mu fɛ mu Jerusalem kun
kre ja mbe wo.
U ki kra na maŋa ni,
mu chin na ki juari na woni.
U ki nyinyi gedenyi,
na ki mboo yire kro ja peii.
9 Kramboe juari
mu jlonwee nyu krɔɛ yire tɔ,
mu kɛɛn nyjɛ ni pe krɔɛ yire kani,
yire kro kuari mu yi kla.
Pe ŋunu wre, na u loplombo kro yii,
mu sɛ na pe ni waŋgra fɔŋgɔ na.
Ndro n wa,
na Nyiɛkpɔɔ mbra yire nyina na,
a keenyanyofɛɛnlɛ pre n na
Nyiɛkpɔɔ kee nyaa nyiɛlɛ na na.
10 Jerusalem chia kre loplombo
pre tni tra,
a nyu pɔ pe na.
Pe bloŋgo tɛɛ mu pe ndrɛ fa,
mu kumu yonyi tɔ na fooro lii.
A nyifɛɛrɛ tia, Jerusalem bichabɛɛlɛ
ndra soo soo.
11 Ni nyɛni, a ni nyiɛlɛ nyina,
a ni jawala na ni tɔɔra,
a wejiŋge be ni na.
Ŋgi na hin? Pe ni leele kla,
a ki tia biile na bifimble,
na jirei chia kre lete na.
12 A pe kna na pe loolo pre
wie mbo,
sena sro na nyumu nyi hin?
Pe wɔ mu to Jerusalem lete na,
na jirei.
Pee wa pe loolo kɛɛ,
a kumu na shie na pe ni.
13 Jerusalem, mni nyini
mbe mu bre hin?
Leele plɛ n da
mu kala nya imi tun.
Jerusalem, mu kanyana kpɔɔ
mu wɛ mu na,
hali mba jaa mu bre.
Jerusalem, klɛ nyjɛ mu na yire juo
na epo lam yi,
ndro ŋmbi we jaa mu tra hin?
14 Kee nyjɛ e keenyanyofɛɛnlɛ
pre naa yuu,
yire kro na pe kafinɛ,
mna pe kewɛɛ.
Pe nsraa e sisam kee nyjɛ e pini,
yire nyaa na yuu,
mbe e na chinɛ,
mbe ki ti mbe pia na e yii,
mbra sɛ waŋgra fɔŋgɔ nu.
Kee nyjɛ pra nyaa na yuu yire kro,
na e wa mu fun.
15 Leele mblɛ pe tro wa
na mu nyaa pre,
kɛnyi koori na woni mu na,
na mu le na kpɔli yira yi,
na ndra nyaara na yuu mbo,
“Kena kre kakpɔɔ ŋga praa yeeri
lawee chichie titi,
a ki yɛshɔɔrɔ ŋmbrɔ nsraa wa
tra yiɛ na kre, kre yi ŋgaa?”
16 Mu loŋgoolo kro nyu
mɛɛri mu na,
na mu pini na tɛɛ,
na ŋgaala chrɛ na yuu mbo,
“O u kla, ble ŋga o chaa
mbe nya kre,
kre ki da aŋga kre.”
17 O Tafun Nyiɛkpɔɔ wre kee
ŋga u jawa,
na u nyu kee kre u yo
mu tɛɛ fafa kre,
u ki pe.
U e kɔ mu wa,
hali e fooro n wa u na,
u tia e loŋgo wre uyɛ kpɔɔ e na,
mu tia u yiɛ shɔ e too na.
18 Jerusalem leele,
e nyɛni, e e tafun wre yeeri.
E nyɛni lafo na blee
mbe e yotunyi fo,
mbe wo e mboo kre na,
yaashia nyɛnɛɛ ti mbe wuu.
19 E yiri e nyɛni mbe nyiŋge paan se,
e nyɛni e wo e Tafun wre na.
E kɛnyi yire e u tali, ŋgi na hin?
klo tia e biile jre,
mu ku chia kre lete yire kro na.
20 O Tafun Nyiɛkpɔɔ,
kee ŋga jawa ɛ!
Leele mblɛ ndie mu da
mu tini imi tun hin?
Yira ŋgi ki pan,
a chiɛlɛ na pre titi biile,
mblɛ pe kori kaa ŋga hin?
Ndee a pra sɔfue,
na keenyanyofɛɛnlɛ kuu
Suminyuŋgo wa ma ŋga hin?
21 Ni loplombo na ni yirifumblɔ
pre ku ku,
mu sni lete na,
a nyanyjɛbɛɛlɛ na bichabɛɛlɛ,
na kuu brɔfiɛn yiɛshiin nyu na.
Nyiɛkpɔɔ, ŋga mu krɔ na kun kre,
mna tia pra pe gbo,
hali mu nsra pe fooro le.
22 Nyiɛkpɔɔ, imi na mu kɛ waa,
na leele yeerii ble kpɔɛ lie nu kre,
pan mu kɛ wa mu ni loŋgoolo yeeri,
a pe pan mu ni tɔ kokoo kro na,
Ŋga ble o Tafun Nyiɛkpɔɔ wre
krɔ na kun kre,
ndro nsra ja mu shɔ u kɛɛ,
ndee mbe ŋmaa ta.
Leele mblɛ keshian kraa wa
ni na kre,
ni loŋgo wre na pe kro kla.