Kaan Haa Wa Tɛ
3
Mi wi lewo ŋmba ni kala nya,Nyiɛkpɔɔ krɔkuɔn sisaa kre kɛɛ.
2 U ni ni mu yili nyisee na,
mu tia ni sɛ na nyaari na
ndramwɔɔ kprikpri nu.
3 U ni ndie tini gbee tataara,
hali ki nyu wa jaa to.
4 U tia ni hlɛ shɔɔnri ni na,
a ki tia ni wejikaara lɛ ni na,
a u ni kajle gbun mu kuari.
5 U wii na ni ni,
mu tia fooro na kanyana
ni fɛ mu kun.
6 U tia ni tni ndramwɔɔ nu,
mu pe na leele mblɛ pe ku
mu mu kre lɛ.
7 U ni le kagbla mu fɛ mu kun,
a ki tia mba jaa fɛ mbe shɔ,
a ki sɛ pe na jlɔnyi ni u ni pɔ.
8 Hali na ni gble le mu u yeeri,
wa kna mbe ni le.
9 U dnɛ badɛnyi koli
mu wo ni tro haa,
mu tia ni kna
mu sɛ na tro kofɛɛlɛɛ na.
10 Pan u pe na sisire
ŋmba u sni na ni sri wi,
na mu u nya to mu yo blɛkpɔɔ
u ja nyaa na ni sri.
11 U ni tini mu laa kolo kre na,
mu ni knumu bujibuji
mu ni ti wa.
12 U u bɛŋɛ tini mu foli,
mu ni ŋu na u snimi ni.
13 A snimi kre yili bɛŋɛ kre nu,
mu pan mu ni su loloŋgo na.
14 Leele kro ni pini na tɛɛ
nyjila kro nu,
mu ni le mɛɛ nu, na koni.
15 Nyiɛkpɔɔ tia kee kro sro
ni nyu na,
mu tia ndaa kala nyaa.
16 U ni taanla mu le bloŋgo nu,
mu tia ni gbonyi ka,
a ni ŋgaala pile.
17 Wejinyiŋge ni wa mu la,
a ki tia yɛshɔɔrɔ ka n wa ni nu.
18 A ki tia ndaa yuu na,
ni yɛnyiŋge fun,
a ni n na kaan yaka na,
ni Nyiɛkpɔɔ wre pan na.
19 Na ni ni kanyana,
na imi ni lami na tro jawa kre,
mbe ki ni yii fooro,
20 mbe ki jawa chiin,
mbe ki ni sɔɔnrɔ gbo.
21 La, kee ka naa wa,
na ni ki sɔɔnri,
mbe ki ti mbe ni dankna ta.
22 Kee kre yi na,
ndaa sɔɔnri na,
ŋga o Tafun Nyiɛkpɔɔ
wre koroo kpɔɔ kre na,
ki tia u n na o kla.
Ŋgi na hin?
U fooro chiɛn wa nyjila kro nu.
23 Bnimi kpan,
o yi nyaa na yira fɔŋgɔ yi,
a ki tia o na kaan
wre Nyiɛkpɔɔ na.
24 A ndaa yo ni jawala nu na,
O Tafun Nyiɛkpɔɔ wre
chiin wi ni yira kro,
ki tia wre na ni kaan.
25 Mblɛ pe kaan
o Tafun Nyiɛkpɔɔ wre na,
na u haa chaa kre,
u nyɔɔ pe na.
26 Kena ki nyu mu o ŋga
na oo frɔ ta mbe u shie,
mbe u ŋmaashɔmu kre shie.
27 Ŋga o ta mu pe yirifumblɔ ŋga,
ki nyu na oo wi mbe fna,
28 Na o kala nyaa,
ki fna mbe o frɔ tɛɛ
mbe tni gbrumm,
ŋgi na hin?
O Tafun Nyiɛkpɔɔ wre u ki pini ma.
29 Ki fna o oyɛ nyjii
kre nyjila kre nu,
ŋgi na hin? Kaanhaa we jaa pe tɛ.
30 Na ki pan ma,
yiɛ kna mu tɛɛ
ŋmba u ki chaa mbe ja wre pan,
mbe u ki ja,
mbe ki ti nyifɛɛrɛ mu gbo.
31 Ŋgi na hin?
O Tafun wre foorochinfun wi,
a wa lewo je ma nyjila kro nu.
32 Kii wa na we ti mbe o yiɛ je ya,
nde u fooro wa o na,
a u koroo kpɔɔ kre wa
nyjila kro nu.
33 Tna ma ki tna u pan,
na we ti mbe o na kala nyaa
mbe o yiɛ je.
34 A chaa ma u chaa,
mbe wre mblɛ pe yii
mu le nyuŋgo tra kre nu kre,
mbe pe o taanla mbe mbra tra,
35 mbe ki ti o ŋga ki fna o ta
kre cha mbe la,
wre Nyiɛkpɔɔ ŋmba
uu wa nyjeeri kre yiɛ.
36 Kena na pe ndro kala li
mu kpra fɛɛlɛ,
o Tafun Nyiɛkpɔɔ wre
wa ki chin ra?
37 Ndro ŋmbi we jaa paara
mbe ki pan ma,
na Nyiɛkpɔɔ ma u ki yo
mu tɛɛ na ki pe ma.
38 Nyiɛkpɔɔ ŋmba
uu wa nyjeeri wre,
wre nyuu ma kanyana kee,
na kee chichie yilii
na paan kre ra?
39 Yira ŋgi ki tia,
na Nyiɛkpɔɔ lewo
na nyjuro ndie tinii,
u sisam ndra na,
mbe wra taanri ŋga hin?
40 E ti mbe o wre titi kooloe
nyjɛ na o troi yire le chichie,
mbe ndru mbe sɛ o Tafun
Nyiɛkpɔɔ wre pan.
41 E ti mbe o lɛɛ wɔ
mbe kɛnyi yire nyjeeri,
mbe o Tafun Nyiɛkpɔɔ
wre tali mbe yo na,
42 O sisam pe,
mu yiri mu mu taan,
a mu n o sisamu ti mu o kɛ.
43 Mu krɔ kun na o ni,
a mu o kɔŋgɔ ni,
mu sɛ o gbo mu wo,
hali mu n o fooro le.
44 Mna tlo tɛɛ mu mu yɛ tɔ,
a ki tia na o nyiɛtali,
ki n ja na dani mu na.
45 Mu tia waŋgrɛ yire o je,
mu na o pini na tɛɛ.
46 O loŋgoolo pre kro
nyu nyaa gbankam,
na o tɛɛlɛ, na o pini na tɛɛ.
47 Pe o pɛɛri wee pɛɛlɛɛ,
mu tia fiɛrɛ o yii,
a pe o ta mu o kla.
48 Yetunyi ni fuu,
na lafolo ki fuu,
ŋgi na hin?
Pe ni leele pre kla.
49 Yotunyi yire ni fuu,
hali yia jaa kun.
50 Na Nyiɛkpɔɔ n yire nyjeeri wa,
mu ndra soo mu o le
mbe ya o na.
51 Kee nyjɛ ni nyaa
kre tia fooro ni nyiɛ yii.
Kaalɛɛ nyjɛ yi o kakpɔɔ
kre chiɛlɛ da kre ndra na.
52 Leele mblɛ pe ni yii
loŋgo finfin kre, pe ni tunu
mbe yii na hanyini wi.
53 Pra ni wa wee nu,
mna chaa mbe ni ku,
mna ni waari na dnɛ ni.
54 Nyumu naa chaa ni ndra tɔ,
a ndaa jawa na ni ku mu kɔ.
55 Ndaa yire wee ŋga nu
ndaa nyi kre nu,
mna mu mɛɛ yeeri
mu mu tali na,
Ni Tafun Nyiɛkpɔɔ.
56 A mna loo ni pan,
kena na ni nyɛni na mu yeeri,
na mu paan ya ni na kre,
maashia mu ndiile yurɔ.
57 Ndaa mu yeeri,
a mna flo mu da ni na,
mna yo ni pan na,
maashia fiɛ.
58 Nyiɛkpɔɔ, mu ni kee loo,
mu ni ŋmaa shɔ.
59 Nyiɛkpɔɔ, mu sisam kee
nyjɛ pe pini ni na yire nya,
kena jande, ni kee yo mu ni ŋga.
60 Mu nya imi, na ni loŋgoolo
pre ni pra mu da,
mu na jawala fɔɔn wrui ni na.
61 O Tafun Nyiɛkpɔɔ,
tɛɛlɛɛ nyjɛ pe ni tɛɛlɛ,
na jawala fuɛn
nyjɛ pe wrui ni na yire,
mu yi ndru.
62 Blenyini ŋga pe ni kee juu
na yuu,
na kolo chaa ni na.
63 Nyiɛkpɔɔ pe le,
na pe yire sholo,
ndee na pe tni o,
lambaara mɛɛ pe koni
na woni ni na.
64 Jande, fɔlɔ tɔ pe na
imi na ki fna,
O Tafun Nyiɛkpɔɔ,
yirɛ nyjɛ pe pe kɛnyi tɛɛ,
mu pe yire yi kro fɔlɔ tɔ pe na.
65 Pe sun,
mu ti mbe fooro pe yii.
66 Krɔ tɛɛ mu pe kɔŋgɔ ni,
mu pe kla,
mu pe nɔɔ pɔ tra ŋga yiɛ na.